Yehesikieli 42 - Wunta Mempori

Bolongko tiado sando mpesomba 42:1-14

¹ Ka i'amba wawa aku a kintala i bungkuno te'alaako i utara ka iwawa aku a bolongko anu tepo'aro saru kintala rinere ka winangu i utarano.

² Ondauno winangu i utarano atuu asa etu hiku ka maluano lima pulu hiku.

³ Tepo'aro saru anu rua pulu hiku inso a kintala i larono ka saru horo watu a kintala i bungkuno hinao tambi anu tepopo'aro ka metuda otolu.

⁴ I arono bolongko atuudo hinao sala kodei te'aro i larono anu maluano hopulu hiku ka ondauno asa etu hiku. Luwuno pewowa pewinsoano kongko i utarano.

⁵ Luwuno bolongko a ntudano i wawono lalu kodei sekonopo luwuno bolongko a ntudano i totono ka tudano i tongano winangu atuu hangano luwuno tambi atuu mongkaa po'ianga hadioopo.

⁶ Luwuno bolongko atuu metuda otolu ka nahina karuno kana anu hina a kintala i bungkuno. Onaemo pu'uno luwuno bolongko i wawono kodeiopo sekono luwuno bolongko i totono ke i tongano.

⁷ I bungkuno hinao rere watu anu meraka saru pededeno bolongko ka tepo'umpeda saru kintala i bungkuno. Rere watu atuu tepo'aro saru luwuno bolongko; ondauno lima pulu hiku.

⁸ Hangano, pededeno bolongko anu mehori saru kintala i bungkuno ondauno lima pulu hiku, sekonopo tepodedeno bolongko anu tepo'aro saru Raha Mempori atuu ondauno asa etu hiku.

⁹ Te'alaako i totono bolongko andiodo hinao pewowa mewinso inso i sabaano oleo tewala mia mingki mewinso i larono inso a kintala i bungkuno.

¹⁰ Po'iangano pewowa atuu i tompano rere watu i bungkuno. Te'alaako i selata, i arono kintala rinere atuu, ka i arono winangu atuu hinao mbo'u ba'opia bolongko,

¹¹ ka i arono hinao sala kodei. Luwuno bolongko andio mengkena tadeno saru luwuno bolongko i utarano, moiko ondauno ka maluano, maupo luwuno pewowa meluarako ka posongkano. Kana luwuno pewowa pewinsoa i utarano,

¹² kanatuumo luwuno pewowa pewinsoa a luwuno bolongko i selatano. Hinao mbo'u pewowa i tompano sala anu montowea i horino rere watu, pewowa pewinsoa inso i sabaano oleo tewala mia ineheno mewinso i larono luwuno bolongko.

¹³ Ka i'amba mepau ndi ongkue, ”Luwuno bolongko i utara ka luwuno bolongko i selata anu me'aro a kintala rinere onaemo luwuno bolongko mempori. A mpo'ianga atuu luwuno sando mpesomba, anu me'umpedaako ndi Ondae i Ue, mengkaano luwuno pesomba tedoa mempori. I ra'ai domenaao luwuno pesomba tedoa mempori, pesomba kaanga, pesomba po'onini hala, ka pesomba pontolosi sala, hangano po'ianga atuu mempori.

¹⁴ Tewala mpewinso ira sando mpesomba a mpo'ianga mempori, ondae nahi ira mpeluarako a kintala i bungkuno ba napi linohu i ra'ai sangka anu pinokonado tempono dompoweweu pesombaa, hangano sangka atuu mempori. Ondae asalakono pompokona sangka susua, se'eluno napi dome'aiwa a mpo'iangado bawaa.”

Luwuno songkano kintalano Raha Mempori 42:15-20

¹⁵ Mansano umari sumongkao luwuno winangu i larono atuu, iwawa aku te'aro a mpewowa langkai anu me'aro i sabaano oleo, ka i'amba sumongkao lumimbuo kintalano Raha Mempori atuu.

¹⁶ Apano i sabaano oleo isongkaakono tuko posongka, lima etu hiku montonda tuko posongka. Ka i'amba wolilio pe'aroano

¹⁷ ka sumongkao apano i utara, lima etu hiku montonda tuko posongka. Onae wolilio mbo'u pe'aroano

¹⁸ i apano selata ka sumongkao, lima etu hiku montonda tuko posongka.

¹⁹ Ka i'amba wolilio pe'aroano i apano sumooano oleo ka sumongkao, lima etu hiku montonda tuko posongka.

²⁰ Kanatuumo isongkao opaa apano. Lumimbuo po'ianga atuu hinao rere watu: ondauno lima etu hiku ka maluano lima etu hiku, monsiao anu mempori ka nahi mempori.