Yehesikieli 41 - Wunta Mempori

¹ Ka i'amba wawa aku i larono bolongko langkaino Raha Mempori ka isongkao karuno rere watuno. Karuno rere watu anu i asambalino i ndi'ai onoo hiku mokapano ka anu i asambalino raane onoo hiku mbo'u.

² Maluano pewowa atuu hopulu hiku ka maluano rereno horino olima hiku i asambalino i ndi'ai ka olima hiku i asambalino raane. Isongkao mbo'u bolongko langkai, ondauno pato pulu hiku ka maluano rua pulu hiku.

³ Ka i'amba lumako a bolongko i larono. Isongkao karuno rere watuno: mokapano orua hiku, ka maluano pewowano onoo hiku ka maluano rereno horino opitu hiku i asambalino i ndi'ai ka opitu hiku i asambalino raane.

⁴ Isongkao bolongko i larono atuu; ondauno rua pulu hiku ka maluano rua pulu hiku mengkena saru maluano bolongko langkai. Ka i'amba mepau ndi ongkue, ”Onaemo andio bolongko tedoa mempori.”

⁵ Ka i'amba sumongkao rereno Raha Mempori atuu, mokapano onoo hiku ka bolongko tiangino lumimbuo Raha Mempori atuu, maluano opaa hiku.

⁶ Luwuno bolongko tiangino atuu otolu ntuda ka porokono tolu pulu a sompo tudano. Lumimbuo rereno Raha Mempori hinao tumbono mokorosoo luwuno bolongko tiangino atuu, hangano luwuno bolongko andio nahi pino'asa a rereno Raha Mempori.

⁷ Luwuno bolongko tiangino kolangka-langkaino inso a ntudano amba-ambano hawe a ntudano ko'otolu mengkena saru tetiangi langkaino tumbono a sompo tudano lumimbuo Raha Mempori atuu. Hinao ensa a pewuatakoa i wawono ranta mia mokompewuatako inso a ntudano i totono lumako a ntudano i wawono telalo a ntudano i tongano.

⁸ Kukitao nine Raha Mempori atuu hinao pundasino anu lalu mantande lumimbuo gagi pundasino luwuno bolongko tiangino atuu; songkano asa tuko buke, onoo hiku mantandeno.

⁹ Mokapano rere i bungkuno bolongko tiangino olima hiku; maluano a mpundasino Raha Mempori anu pino'inee mooa olima hiku. I olono pundasino winangu atuu ka

¹⁰ luwuno bolongko olono rua pulu hiku lumimbuo winangu atuu.

¹¹ Hinao ba'opia pewowano bolongko tiangino lumako a moa atuu, asa pewowa i utarano ka asa pewowa i selatano. Maluano po'ianga anu mooa atuu olima hiku limbu-limbu.

¹² Winangu anu me'aro a kintala rinere i sumooano oleo maluano pitu pulu hiku. Rere anu lumimbuo mokapano olima hiku ka ondauno sio pulu hiku.

¹³ Ka i'amba sumongkao Raha Mempori atuu; ondauno asa etu hiku. Kintala rinere saru winangu ka rereno, asa etu hiku mbo'u;

¹⁴ Maluano i arono Raha Mempori saru kintala rinere i sabaano oleo asa etu hiku mbo'u.

¹⁵ Ka i'amba sumongkao winangu anu me'aro a kintala rinere i sumooano oleo saru luwuno tambino a orua apano, ondauno asa etu hiku. Bolongko langkai, bolongko i larono, ka bansala i bungkuno

¹⁶ tinutuwiako dopi. Lumimbuo otolu bolongko atuu hinao ba'opia pentangoa metarali ka luwuno tambi i arono montoweano pewowa langkai atuu; luwuno tinutuwiako dopi, mompu'u inso a horo hawe a luwuno pentangoano, sekono luwuno pentangoa andio tererei,

¹⁷ hawe i wawono pewowa ka bolongko i larono ka i bungkuno mbo'u. A luwuno rereno i larono ka i bungkuno ngginori

¹⁸ gambarado kerubi ka keu kuruma, i olono orua kerubi asa ngkeu kuruma, ka singge kerubi atuu hinao orua rupano.

¹⁹ Asambalino anu asa rupano mia ka asambalino anu susua rupano singa anu me'aro a ngkeu kuruma atuu; kanatuumo luwu iwineweu lumimbuo Raha Mempori.

²⁰ Inso a horo hawe i wawono pewowa mengginori kerubi ka keu kuruma a rereno Raha Mempori.

²¹ Luwuno karu pewowano bolongko langkai tadeno mensiu opaa. I arono bolongko tedoa mempori tengkita asa anu kana tadeno

²² meda pontunua pesomba inso a ngkeu, mantandeno otolu hiku, ondauno orua hiku ka maluano orua hiku. Luwuno siuno, empehino ka rereno inso a ngkeu. Ka i'amba mepau ndi ongkue, ”Onaemo andio meda anu kongko i aro-Do i Ue.”

²³ Bolongko langkai hinao orua pewowa, bolongko anu tedoa mempori:

²⁴ Singge pewowa atuu hinao orua tondo, onaemo orua tondo anu mokompewolili, orua tondo a mpewowa anu asa ka orua tondo a mpewowa anu susua.

²⁵ A luwuno pewowano bolongko langkai andio mbo'u mengginori kerubi ka keu kuruma, kana a luwuno rere. I bungkuno, i arono bansalano Raha Mempori atuu hinao ensa keu.

²⁶ A orua rereno horino bansala atuu hinao ba'opia pentangoa metarali ka nggorido keu kuruma.