Yehesikieli 40 - Wunta Mempori

PONGKITA MONGKONA TEMPO WO'OHU LAMORO 40–48 Luwuno pewowa langkai ka luwuno kintalano Raha Mempori anu wo'ohu

¹ A nta'u korua pulu ka olima umarino kimentinadi, a pompu'uano ta'u, tanggala hopulu wula atuu, a nta'u kohopulu ka opaa umarino ninangi kota atuu, a oleo mbo'u atuu pabawa-Do i Ue lumimbu aku ka Dowawa aku

² a laro luwuno pongkita-Do i Ue i wita Isaraeli ka Donaa aku a wawo asa torukuno anu ondau ntu'u. I wawono atuu, i selatano, hinao asa anu kana kota.

³ I ra'aimo Dowawa aku. Kitaomo, hinao mia anu tengkita kana mala ka a ngkaeno hinao koloro lena saru tuko posongka. Onae mentade a mpewowa langkai.

⁴ Mia atuu mepau ndi ongkue, ”Hei anano mia, kitaomo saru pepenteeo ka perorongeakono ntu'u ka pekokoongakono temoiko luwuakoano anu Aku mopokitao ndi omue. Hangano, onaemo pu'uno omue winawa i ndi'ai, ka kupopokitao luwuno atuu ndi omue. Pauako iramo luwuno anu kinitamu a nsuku Isaraeli.”

⁵ Kitao, hinao rere watu i bungkuno lumimbuo Raha Mempori. A ngkaeno mia atuu hinao tuko posongka, onoo hiku ondauno. Hiku andio asa pelengkae lalu ondau sekonopo hiku biasa. Onae sumongkao rere watu atuu: mokapano asa tuko ka mantandeno asa tuko.

⁶ Ka i'amba hawe a mpewowa langkai anu me'aro i sabaano oleo ka mewuatako a luwuno ensano, isongkao montoweano pewowa langkai atuu: maluano asa tuko.

⁷ Bolongko podagaa ondauno asa tuko ka maluano asa tuko, sekono olono orua bolongko podagaa me'olo olima hiku. Montoweano pewowa langkai i larono anu umpeda bansalano pewowa langkai atuu onaemo asa tuko.

⁸ Ka i'amba sumongkao bansalano pewowa langkai atuu: oalu hiku maluano

⁹ ka karu rere watuno orua hiku, ka bansalano pewowa langkai atuu kongko i larono.

¹⁰ A mpewowa langkai i sabaano oleo atuu hinao otolu bolongko podagaa a sompo apano; otolu bolongko mengkena songkano ka orua karuno rere watu a orua apano mengkena mbo'u songkano.

¹¹ Ka i'amba sumongkao maluano sala mewinso a mpewowa langkai atuu: maluano hopulu hiku ka ondauno pewowa langkai atuu hopulu ka otulu hiku.

¹² I arono bolongko atuudo hinao olotino mokapano asa hiku ka kanatuu koa mbo'u songkano olotino i apano anu susua. Songkano bolongko podagaa atuu onoo hiku a orua apano.

¹³ Ka i'amba sumongkao pewowa langkai atuu inso a rere i bungkuno bolongko podagaa anu asa hawe a rere i bungkuno bolongko podagaa anu susua; maluano rua pulu ka olima hiku inso a rere hawe a rere.

¹⁴ Isongkao mbo'u bansalano pewowa langkai atuu: nomo pulu hiku ka lumimbuo bansalano pewowa langkai atuu hinao kintala.

¹⁵ Inso i arono pewowa langkai i bungkuno hawe i arono bansalano pewowa langkai i larono, olono lima pulu hiku.

¹⁶ Hinao ba opia pentangoa metarali i larono lumimbuo pewowa langkai atuu a luwuno bolongko podagaa ka luwuno karuno rere watu, saru mbo'u a bansalano pewowa langkai. A luwuno karuno rere watu atuu mengginori gambarano keu kuruma.

¹⁷ Ka i'amba wawa aku a kintala i bungkuno, mentee ntu'u, lumimbuo kintala atuu hinao ba opia bolongko, porokono tolu pulu. Bolongko atuudo winangu i wawono asa horo watu.

¹⁸ Horo watu atuu kongko i horido pewowa langkai tumondao ondauno. Onaemo atuu horo watu i totono.

¹⁹ Ka i'amba sumongkao maluano kintala atuu inso i larono pewowa langkai i totono hawe i bungkuno pewowa langkai i larono, maluano asa etu hiku. Ka i'amba melempa i aroku te'aro i utara

²⁰ ka mentee ntu'u, hinao pewowa langkai anu me'aro i utara ka tewinso kintala i bungkuno. Onae sumongkao ondauno ka maluano.

²¹ Bolongko dagaano, otolu sompo apano, luwuno karuno rere watu, ka bansalano pewowa langkai mengkena songkano saru pewowa langkai amba-ambano; lima pulu hiku ondauno ka rua pulu ka olima hiku maluano.

²² Luwuno pentangoano, bansalano pewowa langkai ka luwuno gambara keu kurumano mengkena mbo'u songkano saru pewowa langkai anu me'aro i sabaano oleo. Mia mokompewuatako a mpewowa langkai atuu telalo a opitu anano ensa; bansalano pewowa langkai kongko i tompano te'alaako i larono.

²³ A kintala i larono hinao asa pewowa langkai anu tepo'aro saru pewowa langkai i utara mengkena teweweuno saru pewowa langkai i sabaano oleo; isongkao inso a mpewowa langkai atuu hawe a mpewowa langkai utara olono asa etu hiku.

²⁴ Ka i'amba wawa aku te'aro i selata, mentee ntu'u, hinao asa pewowa langkai anu me'aro i selata. Onae sumongka ira bolongko podagaano, luwuno karuno rere watuno, bansalano pewowa langkai; songkano mengkena saru anu susua.

²⁵ Lumimbuo pewowa langkai atuu ka bansalano pewowa langkaino hinao ba opia pentangoa, mengkena saru anu susua. Ondauno pewowa langkai atuu lima pulu hiku ka maluano rua pulu ka olima hiku.

²⁶ Hinao opitu anano ensa pewuatakoa i tu'ai, ka bansalano pewowa langkai kongko i tompano te'alaako i larono. A mpewowa langkai atuu, a luwuno karuno rere watuno, ngginori gambarado keu kuruma, asa ngkeu i apano anu asa ka anu asa mbo'u i apano anu susua.

²⁷ I selatano kintala i larono hinao mbo'u pewowa langkai. Isongkao inso a mpewowa langkai atuu hawe a mpewowa langkai i selatano; olono asa etu hiku.

²⁸ Ka i'amba wawa aku a kintala i larono telalo a mpewowa langkai selata. Isongkao pewowa langkai atuu; songkano mengkena saru anu susua.

²⁹ Luwuno bolongko podagaano, luwuno karuno rere watuno ka bansalano pewowa langkai, songkano mengkena saru anu susua. Lumimbuo pewowa langkai atuu ka bansalano pewowa langkai hinao ba opia pentangoa; ondauno pewowa langkai atuu lima pulu hiku ka maluano rua pulu ka olima hiku.

³⁰ Lumimbuo hinao ba opia bansalano pewowa langkai, ondauno rua pulu ka olima hiku ka maluano olima hiku.

³¹ Bansalano pewowa langkai me'aro a kintala i bungkuno ka a luwuno karuno rere watuno ngginori gambarado keu kuruma ka hinao oalu anano ensa pewuatakoa.

³² Ka i'amba wawa aku i sabaano oleo kintala i larono ka isongkao pewowa langkaino; songkano mengkena saru anu susua.

³³ Luwuno bolongko podagaano, luwuno karuno rere watuno, ka bansalano pewowa langkai, songkano mengkena saru anu susua. Lumimbuo pewowa langkai atuu ka bansalano pewowa langkai hinao ba opia pentangoa; ondauno pewowa langkai atuu lima pulu hiku ka maluano rua pulu ka olima hiku.

³⁴ Bansalano pewowa langkai me'aro a kintala i bungkuno ka a luwuno karuno rere watuno ngginori gambarado keu kuruma i asambalino i ndi'ai ka i asambalino raane, ka hinao oalu anano ensa pewuatakoa.

³⁵ Ka i'amba wawa aku a mpewowa langkai utara ka isongkao; songkano mengkena saru anu susua.

³⁶ Luwuno bolongko podagaano, luwuno karuno rere watuno ka bansalano pewowa langkai, songkano mengkena saru anu susua, ka lumimbuo hinao ba opia pentangoa. Ondauno pewowa langkai atuu lima pulu hiku ka maluano rua pulu ka olima hiku.

³⁷ Bansalano pewowa langkai me'aro a kintala i bungkuno, ka a luwuno karuno rere watuno ngginori gambarado keu kuruma, i asambalino i ndi'ai ka i asambalino raane, ka hinao oalu anano ensa pewuatakoa.

³⁸ Hinao mbo'u asa bolongko, pewowa pewinsoano a bansalano pewowa langkai; i ra'ai powo'ohiado mia pesomba tinunu.

³⁹ A laro bansalano pewowa langkai atuu hinao orua meda i asambalino i ndi'ai ka orua meda i asambalino raane, ponsumbelea pesomba tinunu, pesomba po'onini hala, ka pesomba pontolosi sala.

⁴⁰ I manggalino bansalano pewowa langkai, te'alaako i bungkuno, hinao orua meda, ka i koanano bansalano pewowa langkai atuu orua mbo'u meda.

⁴¹ Gagi a mpewowa langkai atuu hinao opaa meda i asambalino i ndi'ai ka opaa meda i asambalino raane; luwuno oalu meda ponsumbelea pesomba.

⁴² Hinao mbo'u opaa meda tiano pesomba tinunu, anu wineweu inso a watu pinole. Ondauno asa ka entonga hiku, maluano asa ka entonga hiku, ka mantandeno asa hiku. I ra'ai ininaa luwuno parewa ponsumbele pesomba tinunu ka pesomba sinumbele.

⁴³ Kai anu ondauno asa pelengkae pinasa liimbu bolongko atuu, ka i wawono luwuno meda atuu ninaa bau pesomba.

⁴⁴ I bungkuno pewowa langkai te'alaako i larono hinao orua bolongko a kintala i larono; asa i apano pewowa langkai utara saru arono me'aro i selata, asa mbo'u i apano pewowa langkai selata saru arono me'aro i utara.

⁴⁵ Onae mepau ndi ongkue, ”Bolongko andio, anu arono me'aro i selata, tiado sando mpesomba anu mpo'angga a Raha Mempori.

⁴⁶ Bolongko anu i arono me'aro i utara, onaemo tiado sando mpesomba anu mpo'angga a meda pontunua pesomba. Ondae inuleno i Sadoki ka butu koa ondae inso a inuleno i Lewi anu moiko umpeda ndi Ondae i Ue moweweu pesomba.”

⁴⁷ Ka i'amba sumongkao kintala i larono, asa anu mensiu opaa anu ondauno asa etu hiku ka maluano asa etu hiku. Meda pontunua pesomba kongko i arono Raha Mempori.

Raha Mempori anu wo'ohu 40:48–41:26

⁴⁸ Ka i'amba wawa aku a bansalano Raha Mempori. Onae sumongka ira karuno rere watuno, mokapano olima hiku anu i asambalino i ndi'ai ka olima hiku anu i asambalino raane. Maluano pewowa atuu hopulu ka opaa hiku ka rere i horino singge rere otolu hiku.

⁴⁹ Ondauno bansala atuu ruapulu hiku ka maluano hopulu ka orua hiku. Mia mpokompewuatako i tu'ai telalo a hopulu anano ensa ka umpeda a orua karuno rere watu atuu hinao ba opia karuno, asa i asambalino i ndi'ai ka asa i asambalino i raane.