Yehesikieli 4 - Wunta Mempori

Pogambaraa pongkadua kota Yerusale 4:1–5:17

¹ ”Omue, anano mia, alaomo asa watu tela, naaomo i aromu ka nggoriomo i wawono kota Yerusale.

² Nggoriomo i wawono kota atuu a laro kontongaano tekadu: pontadeomo asa bente pongkadua, howuomo wita gagi rere watu pongkadua, naaomo pekemaado sorodadu ka potudaomo luwuno parewa porumpai lumimbuo kota atuu.

³ Ka i'amba alaomo labu medempe ka pontadeomo atuu i olomu saru kota atuu gagi rere labu ka po'aroomo rupamu te'aro a ngkota atuu. Kota atuu a laro kontongaano tekadu, ka omuemo anu kumaduo. Onaemo andio tondonino a nsuku Isaraeli.

⁴ Pepombolemo omue i manggalimu ka Aku mopotembio hukudo suku Isaraeli ndi omue. Opia oleo tehineno omue mepombole kanatuu, kanatuumo tehineno utembio hukudo.

⁵ Kanandiomo Kutantuio ndi omue: Te'opia hadiono ta'u hukudo suku Isaraeli, kanatuumo hadiono oleo utembio hukudo; hadiono tolu etu sio pulu oleo.

⁶ Mansano upokotampulaomo tempo atuu, pepombolemo anu kompenduano, sine i koanamu ka tembiomo hukudo suku Yehuda i larono pato pulu oleo. Kutantuiakomumo asa oleo tiano asa nta'u.

⁷ Po'aroomo rupamu a pongkadua Yerusale saru tokia tetande ka pauomo anu ta gagi umewaio kota atuu.

⁸ Kitao, Aku umonggoakomu koloro, ranta nahi upokompewolili inso a horimu anu asa a horimu anu susua ranta kau pokotampulao tempo pongkaduamu.

⁹ Umarino atuu alaomo gandu, jelai, wua inahu motaha langkai, wua ihahu motaha kodei, sorogumu, ka sekoi ka i'amba naaomo luwuno atuu a laro asa kuro ka weweuomo gagi roti tiamu. Onaemo atuu kaangamu i larono upepombole a horimu, tolu etu ka sio pulu oleo.

¹⁰ Kaanga anu asalakono ka ukaano mobeano rua pulu sikala asa oleo; kaanomo atuu a luwuno tempo anu tinantui.

¹¹ Uwoi anu asalakono ka u'inuo asa ntia onoo hini hadiono; inuomo atuu a luwuno tempo anu tinantui.

¹² Kaanomo roti atuu kana roti jelai bonggoli ka asalakono tunuo a wawo ta'ino mia anu mokariomo i arodo.”

¹³ Ondae i Ue mepau, ”Kanatuumo to Isaraeli ira mpongkaa kaanga anu mokoburu i olodo luwuno tongku ba isua Aku tumadi ira.”

¹⁴ Ka ku'amba sumangki, ”Oo, Ue Ala, menteeano, nahi kuhori kinokoburuti ka inso tempo kumongura hawe kanandio-andio nahi kuhori mongkaa anu mateako onaeno ke torea kinaano kondehora lambaha, bau mowai mbo'u nahi hori mewinso a ngangaku.”

¹⁵ Ka i'amba pau-Do i Ue ndi ongkue, ”Moikoomo, Ku'eheakomu mompake ta'ino sapi euno ta'ino mia ka tunuomo rotimu i wawono.”

¹⁶ Umarino atuu Ondae mepau ndi ongkue, ”Hei anano mia, menteeano, Aku rumopuo pepatinda kaanga i Yerusale. Ondae ira mpongkaa roti anu tetantui mobeano saru aroa anu salalaro ka mpo'inu uwoi anu sa'uno tetidahi saru aroa bulalingo,

¹⁷ ka domemakuraako kaanga ka inua, ka luwuno gagi bulalingo, ka do'amba memate hangano salado.