Yehesikieli 39 - Wunta Mempori

¹ Ka omue, anano mia, pauomo anu ta gagi umewaio i Goge ka potaemo: Kanandiomo pau-Do Ue Ala: Kitao, Aku gagi ewaimu, hei Goge petewawa anu lalu i wawono i wita Meseki ka Tubali.

² Aku dumiiko ka tumaateko, saru moboiko inso i tompano utara ka wawako a luwuno torukuno Isaraeli.

³ Aku tumunduhio wo'emu inso a ngkae manggalimu ka dumontaio ana mpanamu inso a ngkae koanamu.

⁴ A wawo luwuno torukuno i Isaraeli omue komate saru luwuno sorodadumu saru luwuno tongku anu tumondako. Aku meweengakomu a luwuno rupano manu-manu lambaha ka a ngkondehora mo'ila gagi kaangado.

⁵ Omue kotebangku a mpada, hangano Ongkue anu pauo, kanandiomo pau-Do Ue Ala.

⁶ Aku mompotii api i wawono Magoge ka a luwuno mia anu manangai dompo'ia i wita wiwi ntahi. Ka ira mento'orio nine Ongkuemo Ue.

⁷ Aku mokomengkaao nee-Ku anu mempori i tongano bawaa-Ku Isaraeli ka nahi Kupo'ineeo mbo'u nee-Ku anu mempori kinokoburuti, ranta luwuno tongku ira mento'orio nine Ongkuemo Ue, Anu Tedoa Mempori i Isaraeli.

⁸ Mentee ntu'u, ta hawe ka ta gagi oleo anu Kupauomo, kanandiomo pau-Do Ue Ala.

⁹ Palilino luwuno kota i Isaraeli ira mpeluarako, mpolangao api, ka mentunuo pepatinda parewa mpeteano i Goge, kana kanta kodei ka langkai, wo'e ka ana mpana, tuko pontunduhi ka kansai. Domentunuo i larono opitu nta'u.

¹⁰ Ondae nahi ira mpo'ala keu inso a mpada ke mpobansi keu a ntobu, hangano api ira mpolangaakono pepatinda parewa mpetea atuu. Ira merontuo luwuno mia anu rumontu ira ka momuru ira mia anu momuru ira, kanandiomo pau-Do Ue Ala.

¹¹ A oleo atuu Aku moweeakono i Goge asa po'ianga, isua onae ba ikinaburu i Isaraeli, i Lembono Pesakiakoa i sabaano oleo inso i tahi ka kaburu atuu ta umonsoi ira mia anu mpesakiako. I ra'ai i Goge ta kinaburu saru luwuno mia hadio anu tumondao, ka po'ianga atuu ta nineeako Lembono Hamoni Goge.

¹² Suku Isaraeli ta kumaburu ira i larono opitu wula mokomorinao wita atuu.

¹³ Luwuno palilino wita mpetonda kumaburu ira. Mongkona atuu mokogagi ira teto'ori a oleo Kupokomengkaao maramba-Ku, kanandiomo pau-Do Ue Ala.

¹⁴ Ba opia mia pinesusua ka domelakopio mpiha wita atuu ka mengkaburu ira wata ngkoroi anu da matumbole a wawo wita saru tinoo mokomorinao. Umarino opitu wula atuu da mpepo'ungke ira.

¹⁵ Tewala domelakopio wita atuu ka asa mia mohawe wukuno mia, onae asalakono monaa petondoni i horino hawe ka domengkaburuo puu mpokaburu i Lembono Hamoni Goge.

¹⁶ Hamona mbo'u neeno kota. Kanandiomo dompokomorinao wita atuu.

¹⁷ Omue, anano mia, kanandiomo pau-Do Ue Ala: Potaemo a luwuno rupano manu-manu ka luwuno kondehora mo'ila: Impepumpumo ka ime'aiwamo, impepumpumo inso a luwuno siuno a mpelimbua pesomba anu Kuweweuakomiu, asa pelimbua pesomba anu langkai a wawo luwuno torukuno Isaraeli. Komiu mpongkaa bau ka mpo'inu rea.

¹⁸ Baudo sorodadu komiu mengkaano ka reado petewawano wawontolino komiu me'inuo. Luwudo kana bimba lakino, ana bimba, bembe lakino, ka sapi lakino, luwuno pinotuwu mewalo inso i Basani.

¹⁹ Komiu mpongkaa taba ranta ka imemowohi ka mpo'inu rea ranta ka imemolangu a mpelimbua pesomba anu Kuweweuakomiu.

²⁰ Komiu memowohiako kaanga a mpelimbua-Ku onaemo ngara ka anu mesawikio, ka luwuno sorodadu, kanandiomo pau-Do Ue Ala.

²¹ Aku mopokitao maramba-Ku a luwuno tongku ka ira mengkitao pohuku dinontai-Ku ka kae-Ku anu tumunduhi ira.

²² Suku Isaraeli ira mento'orio nine Ongkuemo Ue, Ue Alado, mompu'u oleo atuu ka nahina tampulaano.

²³ Luwuno tongku mbo'u ira mento'orio nine hangano salado suku Isaraeli asalakono melako a laro mpontadia, ka hangano mpelelu nahi dompetenunu ndi Ongkue, Kuwunio rupa-Ku ndi ondae. Kupeweengako ira a ngkaedo iwalido ka luwudo memateako ponai.

²⁴ Menunu saru mokoburua ka polimpaido Kuweweu ira ka Kuwunio rupa-Ku ndi ondae.

²⁵ Onaemo pu'uno, kanandiomo pau-Do Ue Ala: Kanandio-andio, Aku momuleo teweweuno i Yako ka mehohawao luwuno suku Isaraeli. A nee-Ku anu mempori Ongkue gagi mahaki aroa.

²⁶ Ira mengkolupeo mokoburuado ka luwuno pe'ewa anu pinopokitado ndi Ongkue tempono dowali mpo'iangario witado merodo ira nahina mompodengke maupo hapa koa.

²⁷ Tempono Kuwawa ira mpekule inso i tongado luwuno tongku ka pumpu ira inso i witado iwalido ka tempono Kupopokitao mempori-Ku ndi ondae i arodo hadio tongku,

²⁸ ira mento'orio nine Ongkuemo Ue, Ue Alado, anu wawa ira a laro pontadia i tongado luwuno tongku ka wali pumpu ira i witado ka nahi Kupo'ineeo maupo te'asa mia inso ndi ondae mo'ia i ra'ai.

²⁹ Nahi Aku wunio mbo'u rupa-Ku ndi ondae, hangano Aku motiio Penaa-Ku i wawodo suku Isaraeli, kanandiomo pau-Do Ue Ala.”