Yehesikieli 38 - Wunta Mempori

Pau-Do i Ue mongkona i Goge i wita Magoge 38:1–39:29

¹ Haweomo pau-Do i Ue ndi ongkue,

² ”Hei anano mia, po'aroomo rupamu ndi Goge i wita Magoge, onaemo petewawa anu lalu i wawono i wita Meseki ka Tubali, ka pauomo anu ta gagi umewaio.

³ Potae: Kanandiomo pau-Do Ue Ala: Kitao, Aku gagi ewaimu, hei Goge, petewawa anu lalu i wawono i wita Meseki ka Tubali.

⁴ Aku dumiiko mompokonaakomu kai a asemu ka wawako meluarako saru luwuno sorodadumu, luwuno sorodadu mpengara. Luwudo mpesangka soompo, asa tepumpua langkai saru kanta langkai ka kodei, ka luwuno hinao ponai.

⁵ To Peresia, Etiopia, ka Puti tumonda ira ka luwuno saru kanta ka songko mpetea,

⁶ to Gomeri saru luwuno sorodaduno, i Beti-Togarima inso i tompano utara saru luwuno sorodaduno, hadio tongku tumondako.

⁷ Omue pepatindamo saru luwuno tepumpuno mia anu moroko saru omue ka gagimo pepekaduduiado.

⁸ Tehine ntu'u umarino atuu komohawe parenta. Mapata'u-ta'u lembuino omue kolumako i asa wita anu wali winangu umarino peteaa. Palilino mepinumpu inso i olodo hadio tongku a wawo luwuno torukuno Isaraeli anu tehineomo tekale-kale. Ondae mewinawa mpeluarako inso i tongado luwuno tongku ka luwuno roodo dompo'ia.

⁹ Omue me'umbaako kana angi mokora ka aiwa kana seru anu tumutuwio asa wawontolino, omue saru luwuno bawaano sorodadumu; hadio tongku tumondako.

¹⁰ Kanandiomo pau-Do Ue Ala: A oleo atuu meluarako tinoo i laro aroamu ka omue weweuo pinewowolo mosa'o.

¹¹ Omue motae: Aku sumapoio wita anu luwuno kotano nahi merere watu ka sumapoi ira mia anu mentuwu roodo ka manangai, luwuno anu mpo'ia a mpo'ianga nahi merere watu, nahina lansono ke pewowa langkai.

¹² Tinoomu komorontu ka mompomuru, saru tumandeo kaemu a ntekale-kaleano anu waliomo pino'iangario ka a bawaa-Ku anu pinumpu inso i tongado luwuno tongku. Ondae hinaomo pinotuwudo ka arataa, saru mpo'ia i tonga-tongano wita.

¹³ Wita Seba ka Dedani, saru luwuno puu mpebalu-baludo to Tarasisi ka luwuno anu mempabawa ira mpotae ndi omue: Nde ko'aiwa morontuke, pumpu ira tepo'asamu komiu mpomuru, wawa ira salaka ka wulaa, umala ira pinotuwu ka arataa, ka mporontua anu hadio ntu'u?

¹⁴ Onaemo pu'uno, pauomo anu ta gagi, hei anano mia ka potaemo ndi Goge: Kanandiomo pau-Do Ue Ala: I tempo atuu, tempono bawaa-Ku Isaraeli tekonai memanangai, omue komoposoo ira.

¹⁵ Omue ko'aiwa inso a mpo'iangamu, inso i tompano utara, saru hadio tongku anu tumondako. Luwudo mpesawi a ngara, asa tepumpua anu langkai ka sorodadu anu moroso.

¹⁶ Omue mentade umewai ira bawaa-Ku Isaraeli kana seru anu tumutuwio tolino. A tempo anu ta hawe mongkona atuu ta gagi, ka Aku wawako umewaio wita-Ku, ka domento'ori Aku luwuno tongku, i tempono Kupopokitao mempori-Ku ndi omue i arodo, hei Goge.

¹⁷ Kanandiomo pau-Do Ue Ala: Omuemo atuu, mongkona isema Kupepau i tempo i ndi'ipua molalo luwuno tetenaa-Ku, luwuno nabi Isaraeli, anu mapata'u-ta'u mempauo anu ta gagi i tempo atuu nine Aku wawako umewai ira bawaa-Ku.

¹⁸ I tempo atuu, tempono i Goge aiwa umewaio wita Isaraeli, kanandiomo pau-Do Ue Ala, tesingkaomo tekuda-Ku. A laro ntekuda-Ku,

¹⁹ a laro mahakino aroa-Ku, ka a laro api tekuda-Ku, Aku mepau: A oleo atuu ta gagi lelu anu mongkokongiri i Wita Isaraeli.

²⁰ Luwuno bou a ntahi, manu-manu i laro meene, luwuno kondehora mo'ila, luwuno kondehora melera ka melele i tolino ka luwuno mia i wawontolino ira medoito mengkitao rupa-Ku. Luwuno torukuno ta tehoa, luwuno pu'u ntorukuno ta tewingke, ka sompo rere watu ta tebangku a wita.

²¹ Aku mompoboi ponai a luwuno torukuno-Ku umewaio i Goge, kanandiomo pau-Do Ue Ala, ranta ponaino sompo mia ta sumapoio pepaekompono.

²² Aku humukuakono haki lele ka rea. Aku mompotii usa marombo, usa seru baku, api, ka walira i wawono, a wawo nsorodaduno, ka a wawo hadio tongku anu tumondao.

²³ Aku mopokitao langkaino pabawa-Ku ka mempori-Ku, saru mokomengkaao koroi-Ku i arodo hadio tongku. Ka ira mento'orio nine Ongkuemo Ue.