Yehesikieli 36 - Wunta Mempori

Pokowo'ohuno Isaraeli 36:1-38

¹ ”Hei omue, anano mia, pauomo anu ta gagi mongkona luwuno torukuno i Isaraeli ka potaemo: Hei luwuno torukuno i Isaraeli, rongeomo pau-Do i Ue!

² Kanandiomo pau-Do Ue Ala: Iwali atuu mepau mongkona omiu: Losoko! Luwuno pongku wita inso i ndi'ipua gagiomo tiato.

³ Onaemo pu'uno, pauomo anu ta gagi ka potae: Kanandiomo pau-Do Ue Ala: Mentee ntu'u ondae mpokogagi komiu boni-boni ka mpokonsii komiu inso a mpetengi-tengimiu ka imegagi tiado toreano luwuno tongku, ka imegagi wua wiwi ka popauado mia.

⁴ Onaemo pu'uno, hei luwuno torukuno Isaraeli, rongeomo pau-Do Ue Ala: Kanandiomo pau-Do Ue Ala a luwuno torukuno ka pongku, a luwuno bangano korono ka lembono, a ntekale-kaleano anu boni-boni ka luwuno kota anu binintaomo, anu gagiomo pomurua ka pasinggiriado toreano luwuno tongku a mpehori-horino.

⁵ Onaemo pu'uno, kanandiomo pau-Do Ue Ala: Ongkue manasa mepau a laro api mahakino aroa-Ku umewaio toreano luwuno tongku ka luwuno Edomi, anu tumantuio wita-Ku gagi tiano saru luwuno po'unde ka pontetewehi, ranta wita pompakambia atuu gagi pomurua.

⁶ Onaemo pu'uno, pauomo anu ta gagi mongkona wita Isaraeli ka potaemo a luwuno torukuno ka pongku, a luwuno bangano korono ka lembono: Kanandiomo pau-Do Ue Ala: Mentee ntu'u, Ongkue mepau a laro mahakino aroa-Ku hangano imentembiomo mokoburua anu wineweudo tongku.

⁷ Onaemo pu'uno, kanandiomo pau-Do Ue Ala: Mesumpa Aku nine luwuno tongku pehori-horimu manasa ondaedo mentembio mokoburuado.

⁸ Sine omiu, luwuno torukuno Isaraeli, ta wali mentumba ka mompowee wua tiado bawaa-Ku Isaraeli, hangano ira ronga mpekule.

⁹ Hangano kitaomo, Umpeda Aku ndi omiu ka merio komiu; komiu me'inangga ka pinorawoi inii.

¹⁰ I wawomiu Aku mokohadioo porokono mia, luwuno suku Isaraeli, nahina tebinta. Luwuno kota ta pino'iangi mbo'u ka luwuno anu tekale-kale ta wali winangu.

¹¹ Aku mokohadioo porokono mia ka kondehora i wawomu, ka ira ntetiangi hadio ka mpe'ana ue. Aku weweu komiu wali pino'iangi kana amba-ambano ka moweweu moiko ndi omiu laluaopo sekono se'eluno. Ka komiu mento'orio nine Ongkuemo Ue.

¹² Aku weweuo mia, bawaa-Ku Isaraeli, mpekule-kule i wawomu. Ira mpentorokiko ka omue gagi tia pusakado, ka omue nahi koweweu ira mbo'u nahina inule.

¹³ Kanandiomo pau-Do Ue Ala: Hangano mia mpotae mongkona omue: Omue mongkaa mia ka weweuo tongkumu nahina inule,

¹⁴ onaemo pu'uno, nahi komongkaa mbo'u mia ka nahi weweuo mbo'u tongkumu nahina inule, kanandiomo pau-Do Ue Ala.

¹⁵ Nahi Kupo'inee ira mbo'u mia mempopauo mokoburua anu wineweudo luwuno tongku ndi omue. Nahi komontembi mbo'u pontetewehido luwuno tongku ka nahi weweuo mbo'u tongkumu nahina inule, kanandiomo pau-Do Ue Ala.”

¹⁶ Haweomo pau-Do i Ue ndi ongkue,

¹⁷ ”Hei anano mia, suku Isaraeli anu mpo'ia i witado mengkokoburutiakonomo pelelu ka poweweudo wita atuu. Peleludo mengkena kana mokoburuno hawe wulano beine i aro-Ku.

¹⁸ Aku umuwuo tekuda-Ku ndi ondae hangano rea anu inuwudo i wita atuu ka hangano domengkokoburutiakono lahumoado.

¹⁹ Aku sumiarawo ira i olodo luwuno tongku, ranta ka dontesiarawo i luwuno wita. Aku bitara ira menunu saru pelelu ka poweweudo.

²⁰ Maupo isua domelako i olodo luwuno tongku, domengkokoburutio nee-Ku anu mempori, tempono domempasinggiri ira mia: Dompotae ondae bawaa-Do i Ue, sine ondae asalakono mpeluarako inso i wita-Do.

²¹ Ongkue merioo nee-Ku anu mempori, anu kinokoburutido suku Isaraeli i olodo luwuno tongku, ba isua domelako.

²² Onaemo pu'uno, pauako iramo suku Isaraeli: Kanandiomo pau-Do Ue Ala: Komba hangano omiu Kuweweuo, hei suku Isaraeli, sine hangano nee-Ku anu mempori anu imengkokoburutio i olodo luwuno tongku ba isua imelako.

²³ Aku mokomemporio nee-Ku anu langkai anu kinokoburutiomo i olodo luwuno tongku, ka anu kinokoburutimiu i tonga-tongado. Ka luwuno tongku ira mento'orio nine Ongkuemo Ue, kanandiomo pau-Do Ue Ala, tempono Kupopokitao mempori-Ku ndi omiu i arodo luwuno tongku.

²⁴ Aku umala komiu inso a luwuno tongku ka pumpu komiu inso i luwuno wita saru wawa komiu mpekule i witamiu.

²⁵ Aku umuwuo i wawomiu uwoi molino ranta ka imegagi morina. Aku mokomorina komiu inso a luwuno mokoburua ka lahumoamiu.

²⁶ Aku moweeakomiu aroa anu wo'ohu ka penaa anu wo'ohu ilaro aroamiu. Aku tumadio inso a ngkoroimiu aroa anu motea ka moweeakomiu aroa anu molusa.

²⁷ Penaa-Ku Aku numaao i laro aroamiu ka Aku weweu komiu mentuwu montonda luwuno pompakosi-Ku ka mpe'ini mpiha a luwuno atora-Ku saru meweweuo.

²⁸ Komiu mpo'ia i wita anu Kuweeako iramo uempu'umiu. Komiu megagi bawaa-Ku ka Ongkue gagi Ue Alamiu.

²⁹ Aku motola komiu inso a luwuno mokoburumiu. Aku motuwuo gandu saru mokohadioo hasilino, ka nahi powawa mbo'u mokoninggoa ndi omiu.

³⁰ Aku mokohadioo mbo'u wuano luwuno keu ka hasilino leremiu, ka nahi impontembi mbo'u pontetewehi i tongado luwuno tongku hangano mokoninggoa.

³¹ Komiu nterorambe a mpelelumiu anu mosa'o ka wineweumiu anu nahi moiko. Komiu memokoburuakono koroimiu hangano sala ka wineweumiu anu mokoburu.

³² Komba hangano omiu Kuweweuo, kanandiomo pau-Do Ue Ala, to'oriomo atuu. Imponto'orimo memokoko'ii ka po'ineeomo imempinokoko'ii hangano pelelumiu, hei suku Isaraeli.

³³ Kanandiomo pau-Do Ue Ala: A oleo Kupokomorina komiu inso a luwuno salamiu, Aku weweuo luwuno kota pino'iangario mbo'u ka luwuno anu tekale-kale wali winangu.

³⁴ Wita anu tehineomo nahi inangga ta wali inangga, ka si po'ia mbo'u nahi inangga i arodo luwuno mia anu ntelalo.

³⁵ Ira mpotae: Wita anu tehineomo nahi inangga andio gagi kana Bonde Paradesi ka luwuno kota anu tekale-kaleomo, boni-boni, ka terawo, kanandio-andio pino'iangario ka mebente.

³⁶ Luwuno tongku pehori-horimiu anu da mpo'ia ira mento'orio nine Ongkuemo Ue, anu wali wanguo hapa anu terawoomo ka wali mompahoakono anu nahi inangga. Ongkue, Ue, anu pauo ka Aku weweuo.

³⁷ Kanandiomo pau-Do Ue Ala: Mongkonamo andio anu inehe-Ku mbo'u dome'emao suku Isaraeli ka Kuweweuo ndi ondae: weweu ira mehadio kana bawaano bimba.

³⁸ Kana hadiono bimba tiano pesomba mempori, kana hadiono bimba i Yerusale a luwuno porame-rameado, kanatuumo luwuno kota anu tekale-kaleomo bukeako tahino mia. Ka ira mento'orio nine Ongkuemo Ue.”