Yehesikieli 35 - Wunta Mempori

Tekuda-Do i Ue a Ntorukuno Seiri 35:1-15

¹ Haweomo pau-Do i Ue ndi Ongkue,

² ”Hei anano mia, po'aroomo rupamu a ntorukuno Seiri, pauomo anu ta gagi umewaio

³ ka potaemo ndi onae: Kanandiomo pau-Do Ue Ala: Ongkue ta gagi ewaimu, hei torukuno Seiri. Aku tumandeo kae-Ku umewaiko ka weweuko boni-boni ka nahi tepekakaako.

⁴ Aku mokogagio luwuno kotamu tekale-kale ka omue gagi boni-boni. Ka kotumo'orio nine Ongkuemo Ue.

⁵ Hangano i laro aroamu mo'ia aroa pe'iwalia mapa'api-api inule ka omue meweengako ira to Isaraeli a laro mpabawano ponai i tempono domemasusa, tempo pohukua pokotompa,

⁶ Onaemo pu'uno, hangano Ongkue anu tuwu, kanandiomo pau-Do Ue Ala, Aku mokogagiko tiano po'uwua rea ka rea ta lumuluko. Menteeano omue saala hangano mo'uwu rea, ka rea ta lumuluko.

⁷ Aku mokogagio torukuno Seiri boni-boni ka nahi tepekakaako saru mokotampula ira inso ndi onae mia anu mpekule-kule.

⁸ Aku mokobukeakono mentorukunono mia memate pinepate. A luwuno pongku witamu a luwuno wita lembomu, ka a luwuno bangano koronomu ta matumbole mia anu memate pinepateako ponai.

⁹ Aku mokogagiko boni-boni ranta nahina tampulaano ka luwuno kotamu nahi ta pino'iangi mbo'u. Ka komiu mento'orio nine Ongkuemo Ue.

¹⁰ Omue motae: Orua tongku atuu ka orua wita atuu ta gagi tiaku ka kita mpe'ueo, kahinaano Ondae i Ue kongko Ira i tu'ai,

¹¹ onaemo pu'uno, hangano Ongkue anu tuwu, kanandiomo pau-Do Ue Ala, Aku weweuko kana uweweu ira a laro ntekuda ka mahakino aroamu, anu me'umbaako inso a o'aliamu ndi ondae. Aku mepopokita ndi omue i tempono Kubitarako.

¹² Kotumo'orio nine Ongkue, Ue, rumongeo luwuno pepauki anu pinaumu te'aro a luwuno torukuno i Isaraeli, kanandio: Luwuno torukuno atuu gagiomo boni-boni ka pineweengako ndi ontae gagi kaangato.

¹³ Saru pinau atuu omue mompelangka-langkai umewai Aku ka hadio ntu'u paumu ndi Ongkue; Ongkue rumongeo.

¹⁴ Kanandiomo pau-Do Ue Ala: Asa wawotolino ira mpo'unde i tempono Kupokogagiko boni-boni.

¹⁵ Kana omue mo'undeakono tia pusakado suku Isaraeli, anu gagiomo boni-boni, kanandiomo Aku weweuko. Kogagi boni-boni, hei Torukuno Seiri, luwuno Edomi, nahina tebinta. Ka ira mento'orio nine Ongkuemo Ue.”