Yehesikieli 34 - Wunta Mempori

Ondae i Ue Puu Pompakambido Isaraeli anu moiko, umewai ira puu pompakambi anu mosa'o 34:1-31

¹ Ka i'amba haweomo pau-Do i Ue ndi ongkue,

² ”Hei anano mia, pauomo anu ta gagi umewai ira puu mpopakambido to Isaraeli, pauomo anu ta gagi ka potaemo ndi ondae, a luwuno puu mpopakambi atuu: Kanandiomo pau-Do Ue Ala: Masola iramo puu mpopakabido to Isaraeli, anu pakambio koroino onaeno! Kombake luwuno bimba anu asalakono domempakambi ira puu mpopakambi atuu?

³ Omiu mperapio susuno, wuluno imeweweuo sangka, ka mensumbeleo anu mewalo. Sine bimba atuudo nahi imempakambi ira.

⁴ Anu molema nahi mpokorosoo, anu mahaki nahi mempakulio, anu mobela nahi mewaluo, anu tesaa nahi mewawao mekule, anu tetadi nahi me'ungkeo, tendeano imelolandaako ira pobobarasaia ka lambaha.

⁵ Hangano kanandio ondae ntesiarawo hangano nahina puu pompakambi. Ondae gagi kaangado luwuno kondehora mo'ila tempono dontesiarawo.

⁶ Luwuno bimba-Ku ntesaa a luwuno torukuno ka pongku anu mantande. Humbee, i luwuno wita atuu bimba-Ku ntesiarawo, nahina maupo te'asa mia anu merio ira ke umungke ira.

⁷ Onaemo pu'uno, hei luwuno puu mpopakambi, rongeomo pau-Do i Ue:

⁸ Hangano Ongkue anu tuwu, kanandiomo pau-Do Ue Ala, menteeano luwuno bimba-Ku gagiomo kaangado luwuno kondehora mo'ila hangano nahina anu pakambi ira; luwuno puu pompakambi-Ku nahi domperio ira bimba-Ku, tendeano pakambio koroino onaeno, sine luwuno bimba-Ku nahi domempakambi ira.

⁹ Onaemo pu'uno, hei luwuno puu pompakambi, rongeomo pau-Do i Ue:

¹⁰ Kanandiomo pau-Do Ue Ala: Ongkue isa'a gagi ewaido puu pompakambi atuu ka wali tumuntu ira bimba-Ku inso a ngkaedo. Aku mokompenaa-naa ira mempakambio luwuno bimba-Ku. Luwuno mbo'u puu pompakambi atuu nahi ira mempakambio mbo'u koroido. Aku sumintaki ira bimba-Ku inso a ngangado, ranta nahi gagi mbo'u kaangado.

¹¹ Hangano kanandiomo pau-Do Ue Ala: Menteeano Ongkue isa'a merio ira bimba-Ku ka umungke ira.

¹² Kana asa mia puu pompakambi umungkeo bimbano i tempono bimba atuu teponsia inso a bawaano bimbano, kanatuumo Aku umungke ira bimba-Ku ka kumadudui ira inso a luwuno po'ianga, ba isua domensiniarawo a oleo menseru ka wongi-wongi.

¹³ Aku wawa ira mpeluarako inso a luwuno tongku ka pumpu ira inso i luwuno wita ka wawa ira i witado. Aku pakambi ira a wawo luwuno torukuno i Isaraeli, a luwuno bangano korono ka a luwuno po'iangado mia i wita atuu.

¹⁴ A ntongampada anu moiko Aku pakambi ira a wawo luwuno torukuno i Isaraeli anu ondau i tu'aimo pakambiado. A mpopakambia anu moiko atuu ira mpepombole ka ewo anu mewalo gagi kaangado a luwuno torukuno i Isaraeli.

¹⁵ Ongkue isa'a anu pakambi ira bimba-Ku ka Aku mo'inee ira mpepombole, kanandiomo pau-Do Ue Ala.

¹⁶ Anu tetadi Aku umungkeo, anu tesaa Aku wawao mekule, anu mobela Aku waluo, anu mahaki Aku mokomorosoo, saru anu mewalo ka anu moroso Aku dumagai ira. Aku pakambi ira kana'umpe menteeano.

¹⁷ Hei omiu bimba-Ku, kanandiomo pau-Do Ue Ala: Mentee ntu'u, Aku gagi puu mpobitara i olodo bimba saru bimba, ka i olodo bimba lakino ka bembe lakino.

¹⁸ Napi upesompooke pingkoo pada ewo anu moiko? Asalakonoke komiu mbo'u melolandaakono karumiu pada ewo anu susua? Napi mpesompooke me'inuo uwoi anu molino? Asalakonoke uwoi anu tebinta mbo'u imewewuiakono karumiu?

¹⁹ Nde luwuno bimba-Ku asalakonoke ira mpongkaa ewo anu umari linolandano karumiu ka mpo'inu uwoi anu umari winewuino karumiu?

²⁰ Onaemo pu'uno, kanandiomo pau-Do Ue Ala ndi ondae. Menteeano Ongkue isa'a gagi puu mpobitara i olodo bimba anu mewalo saru bimba anu morungku.

²¹ Hangano luwuno anu molema imedandaakono kompo ka oweamiu saru mentanduakono tandumiu ranta imensaari ira mpeluarako inso a walado,

²² ka Kukadudui ira bimba-Ku, ka si domegagi mbo'u kaangado ka Aku gagi puu mpobitara i olodo bimba ka bimba.

²³ Aku mompotoro ndi ondae asa mia puu pompakambi, i Daudi, tetenaa-Ku, anu ta pakambi ira. Onae ta pakambi ira ka gagi puu pompakambido.

²⁴ Ongkue, Ue, gagi Ue Alado saru tetenaa-Ku i Daudi gagi mokole i tonga-tongado. Ongkue, Ue, anu pauo.

²⁵ Aku mowutu pedandia manangai saru ondae ka mokotampulao kondehora lambaha inso i wita atuu, ranta ka dompokompo'ia rodo i pada one ka mpoturi a luwuno tobu.

²⁶ Aku weweu ira ka luwuno anu a mpehori-horino pongku-Ku gagi ronso. Aku motiio usa a tempono. Onaemo atuu usa ronso.

²⁷ Luwuno keu a lere ta mompowee wuano ka wita atuu ta mompowee hasilino. Ira mentuwu rodo i witado. Ira mento'orio nine Ongkuemo Ue i tempono Kupuduo keu pasangado ka motola ira inso a ngkaedo mia anu mpe'ata ira.

²⁸ Ondae nahi ira mbo'u megagi pomuruado luwuno tongku, ka kondehora mo'ila nahi ta merangkami ira. Ira mpo'ia rodo nahina anu mompokodoito.

²⁹ Aku mompatindaako ira lere teto'ori, ranta i wita atuu nahina maupo te'asa mia ta mate mokoninggo ka nahi dompontembi mbo'u mokoburua poweweudo luwuno tongku.

³⁰ Ira mento'orio nine Ongkuemo Ue, Ue Alado, kumongkomi ira, ka ondae suku Isaraeli, ondaemo bawaa-Ku, kanandiomo pau-Do Ue Ala.

³¹ Omiumo luwuno bimba-Ku, bimba pakambia-Ku, ka Ongkuemo Ue Alamiu, kanandiomo pau-Do Ue Ala.”