Yehesikieli 33 - Wunta Mempori

PINAU ANU TA GAGI POMPEROROHIANO ISARAELI LAMORO 33–48 Anggaano i Yehesikieli gagi puu mpodagai

¹ Ka i'amba haweomo pau-Do i Ue ndi ongkue,

² ”Hei anano mia, pepaumo a luwuno mia pe'asa tongkumu ka potaeako iramo: Tewala Kupotiio ponai i asa wita ka palilino wita atuu me'alao asa mia i olodo ka mempakosio onae gagi puu mpodagai,

³ ka i'amba puu mpodagai andio kumitao ponai atuu hawe i witano, ka ipuurio tawuwua mopoto'oriako ira tongkuno,

⁴ tewala asa mia lano irongeo unino tawuwua atuu, sine nahi behe ipinopoto'oriako ranta ka ihawe ponai atuu mepateo, ka reano i'aluo koroino onaeno.

⁵ Irongeo unino tawuwua, sine nahi behe ipinopoto'oriako, reano umaluo koroino onaeno. Tewala beheo ipinopoto'oriako, ikaduduio penaano.

⁶ Posuleno, puu mpodagai anu kumitao haweno ponai atuu, sine nahi puurio tawuwua ka tongkuno nahi dompohawe pepopoto'ori, ranta ka ihawe ponai atuu ka ipepateo asa mia inso i olodo, mia atuu pinepate a laro salano, sine reano mia atuu Aku tumuntuo inso a mpuu mpodagai atuu.

⁷ Omue, anano mia, Aku pakosiko gagi puu mpodagaido suku Isaraeli. Tewala omue moronge asa pau inso a nganga-Ku, popoto'oriako ira hangano Ongkue.

⁸ Tewala Ongkue mepau a mia mosa'o gauno: Hei mia mosa'o gauno, omue manasa mate! Ka nahi upompau hapa-hapa mopoto'oriakono mia mosa'o gauno atuu inso a nsala ntumuwuno, mia mosa'o gauno atuu ta mate a laro salano, sine reano mia atuu Aku tumuntuo inso ndi omue.

⁹ Sine, tewala omue mopoto'oriakono mia mosa'o gauno atuu ka ipepokule inso nsala ntumuwuno, sine nahi behe mepokule, onae ta mate a laro salano, sine omue ukaduduiomo penaamu.

¹⁰ Omue, anano mia, pauako iramo suku Isaraeli: Omiu mpotae kanandio: Polimpaia ka hala mami pinopotembiomo ndi omami ka onaemo pu'uno ka kimpe'i'isei; kana'umpe ka kimpokotuwu koa mpiha?

¹¹ Pauako iramo: Hangano Ongkue anu tuwu, kanandiomo pau-Do Ue Ala, nahi Kupe'eheo mateno mia mosa'o gauno, tendeano inehe-Ku a mpepokuleno mia mosa'o gauno atuu inso a nsala ntumuwuno ka ituwu. Pepokulemo, Pepokulemo inso a nsala ntumuwumu anu mosa'o wineweumu atuu! Tembio ka i'asalakono komiu memate, hei suku Isaraeli?

¹² Omue, anano mia, pauako iramo mia pe'asa tongkumu: Menteeno mia mentee nahi kaduduio i tempono itedonta a polimpaia, ka mosa'ono mia mosa'o gauno komba onae itetiduako i tempono ipepokule inso a gauno anu mosa'o; ka mia mentee nahi pokotuwu hangano menteeno, i tempono ipoweweu hala.

¹³ Tewala Ongkue mepau a mia mentee, ’Omue manasa tuwu!’ sine onae merorohio menteeno ka moweweu molengku, luwuno poweweuno mentee nahi ta dinoa, ka onae asalakono mate a laro molengkua wineweuno.

¹⁴ Tewala Ongkue mepau a mia mosa'o gauno, ’Omue manasa mate!’ sine onae mepokule inso a halano saru moweweu moleoa ka menteea,

¹⁵ mia mosa'o gauno atuu mokuleo ginadeno mia, umowahio euno rinontuno, tumondao luwuno atora anu mompowee tuwua ranta nahi poweweu molengku mbo'u, onae manasa tuwu, nahi ta mate.

¹⁶ Luwuno halano anu wineweuno nahi ta pinewowolo mbo'u. Onae moweweuomo moleoa ka menteea, ka onae manasa tuwu.

¹⁷ Sine, mia pe'asa tongkumu mpotae, ’Wineweu-Do i Ue nahi mentee!’ Kahinaano ondaemo mpoweweu nahi mentee.

¹⁸ Tewala mia mentee mepokule inso a menteeno ka moweweu molengku, onae asalakono mate hangano mongkona atuu.

¹⁹ Posuleno, tewala mia mosa'o gauno mepokule inso a gauno anu mosa'o ka onae moweweu moleoa ka menteea, onae manasa tuwu hangano mongkona atuu.

²⁰ Sine omiu mpotae, ’Wineweu-Do i Ue nahi mentee!’ Aku bitara komiu, singge mia montonda peleluno, hei suku Isaraeli.”

Lele tedontano Yerusale

²¹ A nta'u kohopulu ka asa umarino kimentinadi, wula kohopulu, tanggala olima wula atuu, haweomo ndi ongkue asa mia anu toola inso i Yerusale ka ipotae, ”Kota atuu ninangiomo!”

²² Pabawa-Do i Ue tumutuwi aku tempono wongi napi hawe mia anu toola atuu ka Ondae i Ue umungkahio ngangaku tamo haweano mia anu tola atuu tempono mo'oru. Ngangaku te'ungkahiomo ka nami kubeebe mbo'u.

Isaraeli motea aroa i witano ka a pontadia

²³ Ka i'amba haweomo pau-Do i Ue ndi ongkue,

²⁴ ”Hei anano mia, mia anu mpo'ia a nterawoano andio, i wita Isaraeli, motae kanandio: I Burahima asa-asano koa tempono ihaweo wita andio gagi tiano. Ontae andio mehadio, manasa wita andio wineako gagi tiato.

²⁵ Onaemo pu'uno, pauako iramo: Kanandiomo pau-Do Ue Ala: Omiu mpongkaa bau saru reano, matamiu te'aro a luwuno lahumoamiu, ka omiu mpo'uwu rea. Nde komiu mpe'ueo mpihake wita andio?

²⁶ Omiu mperorohio ponaimiu ka meweweu ira anu mokoburu. Sompo mia sumosa'aio kombiano pe'asa miano. Nde komiu mpe'ueo mpihake wita andio?

²⁷ Pauako iramo kanandio: Kanandiomo pau-Do Ue Ala. Hangano Ongkue anu tuwu, mia anu mpo'ia a nterawoano ira memate ntebangkuako ponai. Luwuno mia anu mpada Aku weengako ira a ngkondehora mo'ila gagi kaangado. Luwuno mia anu a laro bente ka kunepo ira memateako haki lele.

²⁸ Aku weweuo wita andio boni-boni ka nahi tepekakaako, ka pompelangka-langkai hangano rosono tamo tampula. Luwuno torukuno i Isaraeli ta gagi boni-boni, ranta nahina maupo te'asa mia mosia telaloio.

²⁹ Ira mento'orio nine Ongkuemo Ue, i tempono Kuweweuo wita andio boni-boni ka nahina mekakaakono hangano luwuno wineweu mokoburu anu wineweudo.

³⁰ Omue, anano mia, luwuno mia pe'asa tongkumu mempopauko umpeda a luwuno rere watu ka a mpewowano luwuno raha, ka mpepau pada ondaedo, singge mia a mpe'asa miano. Aiwamo ka rongeomo hapa anu pinau-Do i Ue!

³¹ Ondae me'aiwa ndi omue kana palili mpehowu ka mpentoro i aromu gagi bawaa-Ku. Ondae merongeo pinaumu, sine nahi domeweweuo. Ngangado bukeako luwuno pau pongkekewoi, sine aroado mpo'ungke me'uraa anu komba tiado.

³² Mentee ntu'u, ndi ondae omue kana asa mia anu menaniako powadi pongkekewoi saru suara molino ka pande memae katapi. Domerongeo pinaumu, sine nahi domeweweuo.

³³ Tewala gagi mongkona atuu – mentee ntu'u ta gagi! – ira mento'orio nine asa nabi kongko i tonga-tongado.”