Yehesikieli 32 - Wunta Mempori

Penani ponsabangi mongkona i Pirao 32:1-32

¹ A nta'u kohopulu ka orua, wula kohopulu ka orua, tanggala asa wula atuu, haweomo pau-Do i Ue ndi ongkue,

² ”Hei anano mia, penaniakomo ponsabangi mongkona i Pirao, mokole i Masiri ka potaemo ndi onae: Omue mongkenao koroimu saru singa mongura i olodo luwuno tongku. Sine, omue kana naga a ntahi malua; luwuno korono uweweuo tehento, uwoi uwewuiakono karumu ka weweu ira korono merege.

³ Kanandiomo pau-Do Ue Ala: Aku tuma'oo buani-Ku rumakoakomu tepumpuno hadio tongku, ka tumandeko a laro buani-Ku.

⁴ Kupepasiakomu a wita, Kupetadiakomu a mpada. I wawomu Kutena ira mpedongko luwuno manu-manu i laro meene, saru baumu Kupokomowohi ira kondehora asa wawontolino.

⁵ Baumu Kunaao a wawo mentorukuano, luwuno lembono Aku mokobukeakono wata ngkoroimu.

⁶ Tolino Kupopo'inuakono reamu anu waa, humbee, luwuno mbo'u torukuno; luwuno bangano korono ta bukeako onae.

⁷ Tempono Kupepateko, langi Aku tumutuwio ka anano wula Kuweweuo megawu. Mata'oleo Kututuwiakono seru ka wula nahi pepansariako wanta.

⁸ Luwuno anu mepansari i langi Aku mokowongi-wongio i wawomu. Wongi-wongia Kupotiio a wawo witamu, kanandiomo pau-Do Ue Ala.

⁹ Kupokodanggarao aroado hadio tongku, tempono Kuwawa komiu gagi mia tinawa i tongado luwuno tongku, a luwuno wita anu nahi imento'orio.

¹⁰ Aku weweuo hadio tongku ntededengke hangano omue ka luwuno mokoledo ira mpondidi-ndidi hangano omue, tempono Kupebatu-batuako ponai-Ku i arodo. Ondae singge mia ta doitoakono mpiha tuwuno a oleo pokotompaamu.

¹¹ Hangano, kanandiomo pau-Do Ue Ala: Ponaino mokole i Babeli ta hawe ndi omue.

¹² Aku weweu ira mia hadio anu mentondako ntebobangkuako ponaido sorodadu, luwuno anu tedoa melambaha i olodo luwuno tongku. Pompelangka-langkaino i Masiri ta pinudu ka mia hadio anu tumondao luwuno rinopu.

¹³ Luwuno kondehorano Aku mepate ira inso a wiwino luwuno korono langkai; karuno mia nahi ta wewuio mbo'u ka i larono nahina pinotuwu wewuio.

¹⁴ Ka i'amba uwoino Aku mokomolinoo, luwuno korono Aku weweuo waa kana lana, kanandiomo pau-Do Ue Ala.

¹⁵ I tempono Masiri Kupokogagio boni-boni, saru mbo'u pingko pinokotampula luwuno ihino wita ka luwuno palilino Kutunduhi ira luwu; ka ira mento'orio nine Ongkuemo Ue.

¹⁶ Ndio ponsabangi anu asalakono pinenaniako. Bawaano beinedo luwuno tongku ira mpenaniakono, ira mpenaniakono Masiri ka a luwuno mia hadio anu tumondao, kanandiomo pau-Do Ue Ala.”

¹⁷ A nta'u kohopulu ka orua, wula ko'aasa, tanggala hopulu ka olima wula atuu, haweomo pau-Do i Ue ndi ongkue,

¹⁸ ”Hei anano mia, poporongeomo ponsabangi, omue saru bawaano beinedo luwuno tongku anu tedoa moroso, mongkona mia hadio i Masiri ka potii iramo i tolino anu lalu i totono ntepohaweako ira anu mpetii iramo a laro ngkaburu.

¹⁹ Inso ndi semake omue lalu tekosi? Petiimo ka pepombolemo meronga luwuno mia anu nahi dompetindi!

²⁰ Ira ntebangku i tongado mia anu memate pinepateako ponai. Masiri pineweengakoomo a mponai; onae rinende saru luwuno anu tumondao.

²¹ Luwuno anu mempabawa anu moroso ka mosia saru luwuno anu mpokowali ira mpepau mongkona onae inso i tongano tolinodo mia mate: Ondae mpetii iramo ka mpepombole, mia anu nahi dompetindi atuu, anu mate pinepateako ponai.

²² I tu'aimo Asuri saru luwuno tepo'asano ka luwuno kaburu lumimbuo. Luwuno mia anu mate pinepate, tebangkuako ponai.

²³ Kaburuno ninaa a ondaloano ntu'u inso a laro ngkeke ka tepumpuado anu mentondao kongko lumimbuo kaburuno. Luwuno mia anu mate pinepate, tebangkuako ponai; ondae atuu anu mpowawa doitoa i tolinodo mia mentuwu.

²⁴ I tu'aimo Elami saru mia hadio anu tumondao lumimbuo kaburuno. Luwuno mia anu mate pinepate, tebangkuako ponai. Ondae atuu mia nahi dompetindi anu mpetii i tolino anu lalu i totono ka anu mpowawa doitoa i tolinodo mia mentuwu. Ondae mentembio mokoburua meronga luwuno mia anu mpetii a laro ngkaburu.

²⁵ I tongado luwuno mia memate pinepate pinatinda poturiano saru luwuno mia hadio anu tumondao lumimbuo kaburuno. Luwuno mia anu nahi dompetindi, anu mate pinepateako ponai, hangano doitoa ndi ondae pinosaba iramo a i tolinodo mia mentuwu. Ondae mentembio mokoburuno meronga luwuno mia anu mpetii a laro ngkaburu. Ondae meninaa i olodo mia mempinepate.

²⁶ I tu'aimo Meseki ka Tubali saru luwuno mia hadio anu tumondao lumimbuo kaburuno. Luwuno mia anu nahi petindi, anu mate pinepateako ponai, hangano ondae mpompokodoito i tolinodo mia mentuwu.

²⁷ Nahi domempinombole meronga luwuno sorodadu anu memate ntebangku i tempono i ndi'ipua, anu mpetii i tolinodo mia mate saru luwuno parewa mpeteado ka anu ponaido meninaa i totono uludo saru kantado a wawo luwuno wukudo. Hangano, doitoako ira sorodadu atuu pabawaio tolinodo mia mentuwu.

²⁸ Omue, Pirao, kopinudu ka mepombole i tongado mia anu nahi dompetindi meronga mia anu mempinepateako ponai.

²⁹ I tu'aimo Edomi, luwuno mokoleno ka luwuno petewawano, anu meninaa meronga mia memate pinepateako ponai, maupo domemoroso. Ondae mempinombole meronga luwuno mia nahi dompetindi ka mia anu mpetii a laro ngkaburu.

³⁰ I tu'aimo luwuno petewawa inso i utara, ondae luwu, ka luwuno to Sidoni, anu memokoko'ii mpetii meronga mia anu memate pinepate, maupo saru rosodo dompokodoitoomo koroido ondaedo. Mia anu nahi dompetindi atuu mpepombole meronga mia anu memate pinepateako ponai ka mentembio mokoburuado meronga mia anu mpetii a laro ngkaburu.

³¹ I Pirao ta kumita ira luwu ka tetarero a nteweweudo mia hadio anu tumondao. I Pirao saru luwuno sorodaduno memate pinepateako ponai, kanandiomo pau-Do Ue Ala.

³² Hangano Ongkue mowawa doitoa ndi onae i tolinodo mia mentuwu, ka i Pirao saru luwuno mia hadio anu tumondao mempinombole i olodo mia nahi dompetindi meronga mia anu mate pinepateako ponai, kanandiomo pau-Do Ue Ala.”