Yehesikieli 31 - Wunta Mempori

I Pirau kana keu arasi anu tinuehi 31:1-18

¹ A nta'u kohopulu ka asa, wula ko'otulu, tanggala asa wula atuu, haweomo pau-Do i Ue ndi ongkue,

² ”Hei anano mia, pauakonomo i Pirao, mokole i Masiri, ka a mia hadio anu mentondao: Isema mokomengkenaakomu a laro langkaimu?

³ Kitaomo Asuri, i ndi'ipua keu arasi i Libano, mesampa tekosi ka melewe marombo; keuno tedoa ondau, punsuno i olono laro nseru.

⁴ Uwoi hadio ntu'u weweuo ka ilangkai tahi malua moko'ondauo, weweuo korono waa lumimbuo kalawatano; ka umuwoio telalo a pangkorono a luwuno keu i pada.

⁵ Onaemo pu'uno tuwuno lalu ondau inso a luwuno keu a mpada; luwuno sampa motutuno gagi hadio, luwuno sampano gagi ondau hangano waaano uwoi anu hadio ntu'u.

⁶ A sampa motutuno mpeseno luwuno manu-manu i laro meene, i totono sampano luwuno kondehora mo'ila mpe'ana; ka luwuno tongku langkai mpe'engo i totono.

⁷ Onae tekosi hangano langkaino, hangano ondauno luwuno sampano; hangano hakano lumele a uwoi anu hadio ntu'u.

⁸ Luwuno keu arasi a bonde-Do Ue Ala nahi ta mokonangio, keu sinobari nahi ta mokomengkenaakono luwuno sampa motutuno, ka keu beranga nahi ta pinokomengkena saru luwuno sampano. Luwuno keu a bonde-Do Ue Ala nahi pinokomengkena saru onae a ntekosino.

⁹ Aku weweuo tekosi ntu'u saru luwuno sampano anu hadio ntu'u. A bonde Paradesi, a bonde-Do Ue Ala luwuno keu mosiri ndi onae.

¹⁰ Onaemo pu'uno, kanandiomo pau-Do Ue Ala: Hangano onae tuwu ondau, untuno kontasi-tasi i olono laro nseru, ka onae gagi mompelangka-langkai hangano ondauno,

¹¹ ka Kupeweengakonomo a ngkaeno asa mia anu pabawa i olodo luwuno tongku, ka iwineweu menunu saru wineweuno anu mosa'o; Ongkue sumaario.

¹² Mia mehawe, anu lalu melambaha i olodo luwuno tongku, ira mentuehio ka mebintao. I wawono luwuno torukuno ka a luwuno lembono luwuno sampano ntedodonta ka luwuno bangano korono i wita atuu luwuno sampa motutuno ntepupudu. Luwuno tongku i tolino melako inso a mpeneoano ka mebintao.

¹³ A ngkeu anu tebangku atuu mpeseno luwuno manu-manu i laro meene ka i olono sampa-sampano mpo'ia kondehora mo'ila.

¹⁴ Luwuno atuu gagi ka i'amba luwuno keu a wiwi uwoi nahi dompompelangka-langkai ka nahi weweuo untuno kontasi-tasi i olono laro nseru, ka luwuno anu mo'oso hadio uwoi nahi pompelangka-langkai mpiha. Hangano, luwudo mempineweengako iramo a laro matea, a laro tolino anu lalu i totono, i tongado anano mia anu mpetii iramo a laro ngkaburu.

¹⁵ Kanandiomo pau-Do Ue Ala: A oleo ipetii a ntolinodo mia mate, Kuweweuo tahi malua mpo'inombo hangano onae. Kubuntoo luwuno korono, ranta uwoino anu hadio ntu'u tebunto. Hangano onae Kuweweuo torukuno Libano mo'inombo ka luwuno keu a mpada moleu.

¹⁶ Rumongeo unino tedontano, Kuweweuo luwuno tongku mpondidi-ndidi i tempono Kupotiio a ntolinodo mia mate meronga ondae anu mpetii iramo a laro ngkaburu. Luwuno keu a bonde Paradesi, keu anu tebiniki anu lalu moiko i Libano, luwuno anu mo'oso hadio uwoi, ta tetarero i tolino anu lalu i totono.

¹⁷ Ondae mbo'u mpetii meronga onae a ntolinodo mia mate, po'iangado mia anu memate pinepateako ponai; kanatuu koa mbo'u anu mpe'engo-engo i totono, tepo'asano i olodo luwuno tongku.

¹⁸ Saru isemake omue pinokomengkenaako i olodo luwuno keu a bonde Paradesi a laro mongkona marambaa ka langkaia? Omue kopinotii i tolino anu lalu i totono meronga luwuno keu a bonde Paradesi ka omue tepombole i tongado mia anu nahi petindi meronga luwuno mia anu memate pinepateako ponai. Onaemo atuu i Pirao saru luwuno mia hadio anu tumondao, kanandiomo pau-Do Ue Ala.”