Yehesikieli 30 - Wunta Mempori

Pohuku-Do i Ue i Masiri 30:1-19

¹ Haweomo pau-Do i Ue ndi ongkue,

² ”Hei anano mia, pauomo anu ta gagi ka potaemo: Kanandiomo pau-Do Ue Ala: Ponsabangimo: Adoo, oleo atuu!

³ Oleo atuu umpedaomo, oleo-Do i Ue umpedaomo, oleo menseru wongi-wongi; onaemo atuu tempodo luwuno tongku.

⁴ Ponai hawe a nto Masiri ka doitoa a nto Etiopia, i tempono mia memate matumbole i Masiri, kaeano pinolaiako, ka luwuno pandasino rinongka.

⁵ To Etiopia, Puti, Ludi, luwuno witado to Ara, Libia, ka luwuno mia inso i wita anu ntepo'asa saru ondae ira memate ntebangkuako ponai meronga ondae.

⁶ Kanandiomo pau-Do i Ue: Luwuno mia anu mpokowalio Masiri ira memate ntebangku, ka pompelangka-langkaino Masiri hangano rosono ta tetadi. Inso i Migidoli hawe i Siene ira memate ntebangkuako ponai, kanandiomo pau-Do Ue Ala.

⁷ Onae ta tesosaelo i tongano luwuno wita anu boni-boniomo ka luwuno kotano tewinso a laro kota anu tehoaomo.

⁸ Ira mento'orio nine Ongkuemo Ue, i tempono Kupolangao api i Masiri ranta luwuno mia anu mempokowalio rinopu.

⁹ A oleo atuu luwuno tinena-Ku ira ronga mpelungka mempodengkeo Etiopia anu roodo. Doitoa umalu ira a oleo hukuano Masiri. Hangano, mentee ntu'u, oleo atuu ta hawe!

¹⁰ Kanandiomo pau-Do Ue Ala: Aku mokotampulao kaeano Masiri telalo ndi Nebukanesa, mokole i Babeli.

¹¹ Onae meronga sorodaduno anu lalu melambaha i olodo luwuno tongku, ira mehawe mpekansa-kansao wita atuu. Ira mebutao ponai umewaio Masiri ka mebuketiakono wita atuu mia anu mempinepate.

¹² Aku mokomo'are ira ana ngkoro Nili ka meweengakono wita atuu a ngkaedo mia melambaha. Aku rumopuo wita atuu saru luwuno ihino telalo a mia mehawe. Ongkue, Ue, anu pauo.

¹³ Kanandiomo pau-Do Ue Ala: Aku mokotampulao luwuno lahumoa ka luwuno pinesombai inso i Memipisi. Nahi ta hina mbo'u petewawa i wita Masiri ka Aku moweweu doitoa i ra'ai.

¹⁴ Aku rumopuo Patirosi ka molangao api i Soani, ka Tebe dinontaiako pohuku.

¹⁵ Aku lumuarakono tekuda-Ku ndi Sini, benteno Masiri, ka mokotampulao kaeano Tebe.

¹⁶ Aku molangao api i Masiri, Sini ta mondidi-ndidi, Tebe ta pinongko'ala ka luwuno rere watuno ta rinongka.

¹⁷ Luwuno ana ntama kontuwuado Oni ka Pi-Beseti ira memate ntebangkuako ponai ka luwuno beine ira mewinawa gagi mia tinawa.

¹⁸ I Tahapanesi oleo ta gagi wongi-wongi i tempono Kupuduo pasangano Masiri i ra'ai, ka pompelangka-langkaino hangano rosono tampula. Kota atuu ta tumutuwio seru ka luwuno anano beine ira mewinawa gagi mia tinawa.

¹⁹ Aku modontaiakono pohuku Masiri. Ka ira mento'orio nine Ongkuemo Ue.”

Pabawano Masiri tampula 30:20-26

²⁰ A nta'u kohopulu ka asa, wula ko'aasa, tanggala opitu wula atuu, haweomo pau-Do i Ue ndi ongkue,

²¹ ”Hei anano mia, Kupuduomo kae morosono i Pirao, mokole i Masiri. Kitao, kaeno nahi winalu ka itompa ke maupo winutuako powalu ka iwali moroso montande ponai.

²² Onaemo pu'uno, kanandiomo pau-Do Ue Ala: Kitao, Ongkue gagi ewaino i Pirao, mokole i Masiri. Aku puduo kaeno, moiko anu da moroso maupo anu tepuduomo, ka Aku dumontaio ponai inso a ngkaeno.

²³ Aku sumiarawo ira to Masiri i olodo luwuno tongku ka sumiarawo ira a luwuno wita.

²⁴ Aku mokorosoo kaeno mokole i Babeli ka weeakono ponai-Ku a ngkaeno. Sine Aku puduo kaeno i Pirao ka ta meraali i arono kana mia anu mapari mobelano.

²⁵ Mentee, Aku mokorosoo kaeno mokole i Babeli, sine kaeno i Pirao ta tedonta telupe. Ira mento'orio nine Ongkuemo Ue, i tempono Kupeweengakono ponai-Ku a ngkaeno mokole i Babeli ka ipe'impahiakono umewaio wita Masiri.

²⁶ Aku meweengako ira i olodo luwuno tongku ka sumiarawo ira a luwuno wita. Ka Ira mento'orio nine Ongkuemo Ue.”