Yehesikieli 3 - Wunta Mempori

¹ Ondae i Ue mepau ndi ongkue, ”Hei anano mia, kaanomo hapa anu kinitamu i ndi'ai. Kaanomo paluluno wunta andio ka lakomo, pepaumo a nsuku Isaraeli.”

² Ku'ungkahiomo ngangaku ka Doweeakune paluluno atuu ka kukaano.

³ Pau-Do ndi ongkue, ”Hei anano mia, kaanomo paluluno anu Kuweeakomu andio ka ihiiakono kompomu atuu.” Ka ku'amba kumaano. Namino mo'ahi kana siu hoani a laro ngangaku.

⁴ Ka Do'amba mepau ndi ongkue, ”Hei anano mia, lakomo, tepohaweako iramo suku Isaraeli ka pohaweomo luwuno pau-Ku ndi ondae.

⁵ Mentee ntu'u, omue komba tinena a asa tongku anu mpepau susua ka anu nahi marampau, sine a nsuku Isaraeli;

⁶ komba a hadio tongku anu mpepau susua ka anu nahi marampau, anu nahi uto'orio pauno. Bakanaano Kutenako a tongku anu kanatuu, ira mperorongeakomu.

⁷ Sine, suku Isaraeli nahi dobehe mperorongeakomu, hangano nahi domebehe mpomperorongea-Kune, hangano luwuno suku Isaraeli memotea ulu ka motea aroa.

⁸ Kitao, Aku mokomoteao aroamu umewaio moteano aroado, ka weweuko motea ulu umewai ira anu mpe'ulu watu.

⁹ Kana inta, anu moteaopo sekono watu Kupokomoteao aroamu. Siimo doitoako ira ka siimo pondende kumitao rupado, hangano ondae atuu suku anu mpe'ewa.”

¹⁰ Umarino atuu Ondae mepau ndi ongkue, ”Hei anano mia, pekokoongakonomo ka rongeomo luwuno pau-Ku anu Aku mohaweo ndi omue.

¹¹ Lakomo ka tepohaweako iramo mia pe'asa tongkumu a pontadia. Pepaumo ndi ondae ka potaemo: Kanandiomo pau-Do Ue Ala: ke domerongeo ke naahi.”

¹² Ka i'amba Penaa-Do i Ue tumande aku, ka kurongeo i bungkuku unino rundu anu langkai, tempono maramba-Do i Ue mewuatako i wawono inso a mpo'iangano.

¹³ Onaemo atuu unino inso a mpanino luwuno anu mentuwu anu ntepohahi asa ka anu susua, ka unino luwuno bolano umpeda ndi ondae, unino rundu anu langkai.

¹⁴ Penaa-Do i Ue tumande aku ka wawa aku. Ongkue lumako saru aroa nahi sanaa ka mokula aroa, hangano kae-Do i Ue moroso dumadai aku.

¹⁵ Aiwa aku a mia mentinadi anu mpo'ia a wiwi Ngkoro Kebari i Teli-Abibi. I ra'ai kupentoro tekokodoho i tonga-tongado opitu oleo tehineno.

I Yehesikieli pinoboi gagi podagai Isaraeli

¹⁶ Umarino opitu oleo haweomo pau-Do i Ue ndi ongkue,

¹⁷ ”Hei anano mia, Kupakosikomo gagi anu dumagaio suku Isaraeli. Tewala omue moronge pau inso a nganga-Ku, pauako iramo ntu'u a nee-Ku.”

¹⁸ Tempono Kupepau a mia mosa'o wineweuno, ”Omue asalakono hinuku mate!” ka nahi upauakono ntu'u ke nahi upompau hapa-hapa mompauakono mia mosa'o wineweuno atuu mongkona tuwuno anu mosa'o ka ikongko tuwu, mia mosa'o wineweuno atuu ta mate a laro salano, sine Aku tumuntuo reano ndi omue.

¹⁹ Sine, tewala upauakono mia mosa'o wineweuno atuu ka nahi pepokule inso a wineweuno anu mosa'o ka inso a ntumuwuno anu mosa'o, onae ta mate a laro salano, sine omue ukaduduiomo penaamu.

²⁰ Tempono mia mentee mepokule inso a menteeno, ka ipoweweu molengku, ka Kuponaakono watu tetidua i arono, onae ta mate. Tewala nahi upauakono ntu'u, onae ta mate a laro halano ka luwuno wineweu mentee anu wineweuno nahi ta rinambe, sine Aku tumuntuo reano ndi omue.

²¹ Sine, tewala upauakono mia mentee ka si poweweu hala ka onae nahi poweweu hala, onae ta kongko tuwu, hangano onae behe tumarimao ipinauako, ka omue ukaduduiomo penaamu.

I Yehesikieli gagi beebe

²² I ra'ai pabawa-Do i Ue lumimbu aku, ka Ondae mepau ndi ongkue, ”Lakomo pontuturako i lembono. I ra'ai Aku mepauakomu.”

²³ Lumako akumo i lembono. Menteeano, maramba-Do i Ue tengkita i ra'ai kana maramba anu umari kinitaku umpeda a Ngkoro Kebari, ka ku'amba menggolontu mesomba.

²⁴ Sine, Penaa-Do i Ue mewinso i laroku ka montade aku. Ka Do'amba mepauakune, Dopotae, ”Pekulemo, pe'ukomo i laro rahamu.

²⁵ Ka omue, anano mia, menteeano, omue ko'inonggoako koloro ka pinongu, ranta nahi upokompeluarako ka mewinso i tonga-tongado.

²⁶ Aku weweuo elomu metako a langiramu, ranta ka ugagi beebe ka nahi upokokuahako ira, hangano ondae atuu suku anu mpe'ewa.

²⁷ Sine, tempono Kupepauakomu, Aku umungkahio ngangamu ka kopauako ira: Kanandiomo pau-Do Ue Ala. Mia anu behe moronge, po'ineeomo irongeo; ka mia anu nahi behe moronge, po'ineeomo nahi rongeo, hangano ondae atuu suku anu mpe'ewa.”