Yehesikieli 29 - Wunta Mempori

Pinau anu ta gagi umewaio Masiri ka i Pirao 29:1-16

¹ A nta'u kohopulu, wula kohopulu, tanggala hopulu ka orua, haweomo pau-Do i Ue ndi ongkue,

² ”Hei anano mia, po'aroomo rupamu ndi Pirao, mokole i Masiri ka pauomo anu ta gagi umewaio ka luwuno Masiri.

³ Pepaumo ka potae: Kanandiomo pau-Do Ue Ala: Menteeano, Ongkue gagi ewaimu, hei Pirao, mokole i Masiri, buaea langkai anu mepombole i tongano luwuno anano koronomu, ka anu motae: Koro Nili atuu ongkue me'ueo. Ongkuemo anu weweuo.

⁴ Aku mompasa kai a asemu ka weweuo bou inso a luwuno ana ngkoronomu mpetako a karansamu. Aku tumandeko inso a ntongano luwuno ana ngkoronomu saru luwuno bou mpetako a karansamu.

⁵ Aku metadiakomu i pada one, humbee, omue saru luwuno bou a luwuno ana ngkoronomu. Omue kotedonta a mpada ka nahi ta binini ke pinumpu. Aku meweengakomu gagi kaangado kondehora mo'ila ka manu-manu i laro meene.

⁶ Luwuno palilino Masiri ira mento'orio nine Ongkuemo Ue. Omue kana tuko balo a suku Isaraeli.

⁷ Tempono dome'iniakomu kae, omue tepudu telupe ka belaio luwu oweado; tempono dompetumbo ndi omue, omue tepudu ka uweweu ira luwu kobangku-bangku.

⁸ Onaemo pu'uno kanandiomo pau-Do Ue Ala: Mentee ntu'u, Aku mompotii ponai ndi omue ka mokotampulao mia ka kondehora inso ndi omue

⁹ ranta wita Masiri ta gagi boni-boni ka terawo. Ka ira mento'orio nine Ongkuemo Ue. Upotae: Koro Nili atuu ongkue me'ueo, ongkuemo anu weweuo,

¹⁰ ka mentee ntu'u, Ongkue gagi ewaimu ka ewaino luwuno ana ngkoronomu. Aku weweuo wita Masiri gagi tekale-kale, mokari ka nahi mewalo, ka boni-boni mompu'u inso i Migido hawe i Siene, tendeano hawe a mpetidaa Etiopia.

¹¹ Nahina maupo te'asa mia ta telaloio, tendeano nahina maupo te'asa kondehora. Wita atuu nahi ta pino'iangi i larono pato pulu nta'u.

¹² Aku weweuo wita Masiri boni-boni i tongano luwuno wita anu rinopuomo ka luwuno kotano ta gagi boni-boni i tongano luwuno kota anu kinale-kale i larono pato pulu nta'u. Aku sumiarawo ira to Masiri i olodo luwuno tongku ka weweu ira ntepoponsua a luwuno wita.

¹³ Hangano kanandiomo pau-Do Ue Ala: A pokotampulaano pato pulu nta'u atuu Aku pumpu ira to Masiri inso i tongano luwuno tongku a ntesiarawoado.

¹⁴ Aku momuleo teweweuno Masiri ka mokule ira i wita Patirosi, wita insoado, ka i ra'ai ondae megagi poparentaa anu molema.

¹⁵ I olodo luwuno poparentaa onae gagi anu lalu molema ka nahi polio mompelangka-langkai mbo'u a luwuno tongku susua. Aku weweu ira tedoa molema ranta nahi ira mempabawa mbo'u a luwuno tongku.

¹⁶ Ondae nahi gagi mbo'u pine'ala-alado suku Isaraeli, sine tendeano mopoto'oriakono Isaraeli salado tempono dompepokule ndi ondae mpepetulungi. Ka Masiri ta tumo'orio nine Ongkuemo Ue Ala.”

Masiri gagi tambono i Nebukanesa 29:17-21

¹⁷ Ka i'amba, a nta'u korua pulu ka opitu, wula ko'aasa, tanggala asa wula atuu, haweomo pau-Do i Ue ndi ongkue,

¹⁸ ”Hei anano mia, i Nebukanesa, mokole i Babeli, tumena ira sorodaduno mpeteahako ntu'u umewaio Tirusi. Luwuno ulu londaomo ka luwuno owea telohuiomo, sine moiko onae maupo sorodaduno nahi dompohawe me'uraa inso ndi Tirusi a mpeteahakodo umewaio.

¹⁹ Onaemo pu'uno, kanandiomo pau-Do Ue Ala: Wita Masiri Kuweeakono i Nebukanesa, mokole i Babeli. Onae ta wawao kaeano saru moweweu porontua ka pomurua. Onaemo atuu tambodo sorodaduno.

²⁰ Aku weeakono wita Masiri gagi sulono a inanggano, hangano domeweweua-Kunemo, kanandiomo pau-Do Ue Ala.

²¹ A oleo atuu Aku motuwuo tanduno suku Isaraeli ka weweuko mokompepau mbo'u i tonga-tongado. Ka ira mento'orio nine Ongkuemo Ue.”