Yehesikieli 27 - Wunta Mempori

Penani ponsabangi mongkona Tirusi

¹ Haweomo pau-Do i Ue ndi ongkue,

² ”Hei anano mia, penaniakonomo ponsabangi mongkona Tirusi,

³ ka pauakonomo Tirusi anu po'iangano a mpewowa mewinso a ntahi malua ka anu mebalu-balu saru luwuno tongku a hadio wita i wiwi ntahi: Kanandiomo pau-Do Ue Ala: Hei Tirusi, omue motae, ’Ongkuemo tekosia anu soompo’

⁴ Wita pinabawaimu i tongano tahi malua; anu pande ntu'u mowanguakomu weweuo tekosimu soompo.

⁵ Asangkoroimu domeweweuo inso a ngkeu sanobari Seniri, dome'alao keu arasi Libano meweweuakomu karuno somba.

⁶ Keu tarabanti inso i Basani pinake pebosemu; horomu domeweweuo inso a wuku tindu pinotako a ngkeu cemara inso i wiwi ntahi Kitimi.

⁷ Sombamu wineweu inso a lena alusu anu mpesora-sora inso i wita Masiri; onaemo atuu tondonimu. Tendamu wineweu inso a nsawu wungo motu'a ka sawu wungo mongura inso i wiwi ntahi Elisa.

⁸ To Sidoni ka Ariwadi gagi puu mpebosemu; luwuno anu mempande ntu'u, hei Tirusi kongko ndi omue, ondae gagi puu mpesumombamu.

⁹ Mia memota'uno Gebali saru luwuno anu mempande ntu'u kongko ndi omue, ira mpokomoikoo masolamu. Luwuno kapala a ntahi saru anu mpo'angga a ngkapala mpetiima ndi omue ira mentobosio pebalu-baludo.

¹⁰ To Peresia, Ludi, ka Puti, anu gagi sorodadumu kongko a laro nsorodadumu. Kanta ka songko ndinoe ndi omue; luwuno tumiangio marambamu.

¹¹ To Ariwadi ka sorodaduno mekongko i wawono luwuno rere watu lumimbuko ka to Gamadi i wawono luwuno menaramu. Domendoe ira kantado a luwuno rere watu lumimbuko; ondae meweweuo tekosimu ka isoompo.

¹² Tarasisi mebalu-balu saru omue hangano luwuno kaeamu hadio ntu'u. Ondae mpotobosiako salaka, labu, tima mopute, ka tima mo'ito euno balu-balumu.

¹³ Yawani, Tubali, ka Meseki mpebalu-balu saru omue. Ondae mpotobosiako ata, luwuno parewa mala euno balu-balumu.

¹⁴ Inso i Beti-Togarima ondae mpotobosiako ngarano kareta, ngara pesawia, ka bagali euno balu-balumu.

¹⁵ To Rodosi mpebalu-balu saru omue, ka hadio wita i wiwi ntahi gagi wita po'asaamu. Ondae mpowawa wuku tindu ka keu sora ndi omue gagi po'owahi.

¹⁶ Edomi mebalu-balu saru omue hangano hadiono hasilimu. Ondae mpotobosiako paramata watu rea, sawu wungo mongura, sangka mpesora-sora, sawu lena alusu, watu manaha, ka watu delima euno balu-balumu.

¹⁷ Yehuda ka wita Isaraeli mpebalu-balu saru omue. Ondae mpotobosiako gandu inso i Miniti, mire, siu hoani, lana, ka balasee euno balu-balumu.

¹⁸ Damasi mebalu-balu saru omue hangano hadiono hasilimu, hangano luwuno kaeamu hadio ntu'u, saru anggoro inso i Heleboni ka wulu bimba inso i Sakahari.

¹⁹ To Dani ka to Yunani inso i Usali mpotobosiako labu pinalu, keu mo'ahi ka towu euno balu-balu anu hina i olono balu-balumu.

²⁰ Dedani mo'asa kuli pelampi pesawia a ngara ndi omue.

²¹ To Ara ka luwuno petewawano Kedari mpo'asa ana bimba, bimba lakino, ka bembe lakino ndi omue. A laro luwuno mongkona atuu ondae mpebalu-balu saru omue.

²² Puu mpebalu-baludo to Seba ka Raema mpebalu-balu saru omue. Ondae mpotobosiako luwuno rampa-rampa moiko ntu'u ka luwuno watu paramata anu masuli olino saru wulaa euno balu-balumu.

²³ Harani, Kane, Edeni, Asuri ka Kilimadi mpebalu-balu saru omue.

²⁴ A luwuno olumu ondae me'asa ira lemba meloe tekosi ntu'u, sawu wungo motu'a, sangka mpesora-sora, umpeo tekosi mperupa-rupa sorano saru koloro linisu anu moroso.

²⁵ Luwuno kapala Tarasisi mewawaakomu balu-balu atuu. Bukeako inula mobea omue i tonga ntahi malua.

²⁶ A ntahi malua puu mpebosemu wawako. Sine, angi mokora i sabaano oleo umaluko a ntonga ntahi malua.

²⁷ Arataamu, parewamu, balu-balumu, anu mpo'angga a ngkapalamu ka luwuno puu mpesumombamu, luwuno puu mpo'anggamu ka puu mpebalu-balumu saru luwuno sorodadumu anu mekongko ndi omue, humbee, meronga luwuno anu mpe'ula a ngkapalamu, toondu a laro ntahi malua a oleo tedontaamu.

²⁸ Rumongeo peboolido puu mpesumombamu mondidi-ndidiomo wita motu'i pehori-horimu.

²⁹ Ondae mpetii inso a ngkapala, luwuno anu mpebose. Anu mpo'angga a ngkapala ka luwuno puu mpesumomba, a wita motu'i dompentade.

³⁰ Ponsabangi meroku, pebooli pompemasusa pinoporonge ndi omue; mponaa awu a wawo uludo, mpelundi-lundi a laro pampawu.

³¹ Ondae mpekeru londa, hangano omue, ka mpebooako sawu po'inombo; ondae mpengese, sumanga mompemarasai hangano omue; asa ponsabangi anu mompokomasusa.

³² A laro masusa hangano omue ondae mpenaniako ponsabangi, mensabangiko: Isema kana Tirusi, anu rinopuomo a ntonga ntahi malua?

³³ Umarino luwuno parewamu hawe inso a ntahi omue mompokomowohi hadio tongku, saru hadiono arataa ka balu-balumu omue mompokokaea luwuno mokole ntolino.

³⁴ Kanandio-andio omue tampula luwu hangano tahi tondu i totono tahi malua; balu-balu ka luwuno anu mpe'ula a ngkapalamu toondu saru omue.

³⁵ Luwuno palilino wiwi ntahi ntededengke mengkitako; luwuno mokoleno mebiibi, rupado ntengkuru.

³⁶ Puu mpebalu-baludo luwuno tongku mpomansu i aromu, poko'ariano tuwumu mongkokongiri, ka tampulakomo mpiha.”