Yehesikieli 26 - Wunta Mempori

Pinau anu ta gagi umewaio Tirusi 26:1-21

¹ A nta'u kohopulu ka asa, tanggala asa wula tinantui, haweomo pau-Do i Ue ndi ongkue,

² ”Hei anano mia, hangano Tirusi mepau mongkona Yerusale: Losoko! Masolaomo pewowa langkaido luwuno tongku atuu; onae ta melimba ndi ongkue ranta ka kugagi buke, sine onae gagi tekale-kale,

³ onaemo pu'uno kanandiomo pau-Do Ue Ala: Kitao, Aku gagi ewaimu, hei Tirusi. Aku weweuo hadio tongku mpentade umewaiko, kana tahi malua mosaba ira bombano.

⁴ Ira meropuo luwuno rere watuno Tirusi ka mehoao luwuno menarano. Awuno Aku tumadio ranta ka imorina inso ndi onae ka onae Aku mokogagio torukuno watu anu londa.

⁵ Onae ta gagi pompuaia buani a tonga ntahi malua, hangano Ongkue anu pauo, kanandiomo pau-Do Ue Ala. Onae ta gagi pomuruado luwuno tongku.

⁶ Luwuno anano beine anu mpo'ia a wita motu'i ira memateako ponai. Ka ira mento'orio nine Ongkuemo Ue.

⁷ Hangano, kanandiomo pau-Do Ue Ala: Mentee ntu'u, Aku wawao i Nebukanesa, mokole i Babeli inso i utara, mokoledo luwuno mokole, ka i'ewaio Tirusi mompake ngara, kareta, sorodadu mpengara, ka tepumpuno sorodadu anu hadio.

⁸ Onae ta mepateako ira ponai anamu beine a mpada, mompotade rere watu pongkadua, motuda ira parewa porumpa ka pasao kanta umewaiko.

⁹ Tiiano parewa porumpano, ta pino'aro a luwuno rere watumu, ka luwuno menaramu ta pinobangkuako uaseno.

¹⁰ Ngarano hadio ntu'u ranta omue ta tumutuwiko awuno. Hangano pongkopa-kopano pelempado sorodaduno mpengara ka ke'i-ke'ino karetado, luwuno rere watumu mpondidi-ndidi tempono ipewinsoki ira pewowa langkaimu kana mia mompewinsoki kota anu te'ungkahiomo hangano porumpa.

¹¹ Saru luwuno karuno ngarano onae ta lumolandao luwuno pesalaamu. Onae ta mepateako ira ponai palilimu, ka luwuno tugu pinerorohimu ta tebangku a wita.

¹² Ira merontuo kaeamu ka mpomuruo luwuno balu-balumu. Ira mehoao luwuno rere watumu ka mpobangkuo luwuno rahamu anu tekosi, ka i'amba tinadi watu, keu, ka awumu a laro ntahi.

¹³ Aku mokotampulao maroano penanimu ka unino katapimu nahi ta teronge mbo'u.

¹⁴ Aku mokogagiko torukuno watu anu londa ka hangano kanandio omue kogagi pompuaia buani ranta nahi kowinangu mbo'u, hangano Ongkue, Ue, anu pauo, kanandiomo pau-Do Ue Ala.

¹⁵ Kanandiomo pau-Do Ue Ala ndi Tirusi: Nde nahi ta mondidi-ndidike wita i wiwi ntahi rumongeo runtuno tedontamu, tempono mia anu mapari mobelado mperaali hangano pompepatea lumele i tonga-tongamu?

¹⁶ Luwuno mia pinemota'udo tongku anu i wiwi ntahi ta metii potorodo ka mentadi ira lemba meloedo ka melohuo sangkado anu mesora-sora. Ondae ipabawai ira doitoa ka mpentoro a wita; sompo tempo ira medoito ka ntededengke hangano omue.

¹⁷ Ira mpenaniako ponsabangi mongkona omue ka ira mpotae ndi omue: Nde kana'umpe kau mansa ropu, tampula inso a ntahi malua, hei kota anu inunde-unde kota anu pabawa a ntahi, omue saru palilimu, anu mompokodoito a mpalili i wita motu'i?

¹⁸ Kanandio-andio, wita i wiwi ntahi gagi doito a oleo tedontaamu, humbee, wita anu i wiwi ntahi ntewuka hangano tampulaamu.

¹⁹ Hangano kanandiomo pau-Do Ue Ala: I tempono Kupokogagiko kota tekale-kale, kana luwuno kota anu nahina mbo'u palilino, tewala kupokonte'iliakomu tahi malua ka i'aluko mowo,

²⁰ ka Aku motiiko meronga luwuno mia anu mpetii a laro ngkaburu a tongku i ndi'ipua. Aku weweuko mo'ia i tolino anu lalu tetotoako kana tekale-kaleno i ndi'ipua, meronga luwuno mia anu mpetii a laro ngkaburu, ka siimo dompo'iangariko mbo'u mia, ka nahi pesabaako mbo'u i witado mia mentuwu.

²¹ Ongkue tumantuiakomu poko'ariano tumuwumu anu mongkokongiri ka nahi kohinawe mbo'u. Omue dome'ungkeko mia, sine nami hinawe mbo'u ranta nahina tampulaano, kanandiomo pau-Do Ue Ala.”