Yehesikieli 25 - Wunta Mempori

LUWUNO PINAU ANU TA GAGI UMEWAIO LUWUNO TONGKU LAMORO 25–32 Pinau anu ta gagi umewaio inuleno i Amoni

¹ Haweomo pau-Do i Ue ndi ongkue,

² ”Hei anano mia, po'aroomo rupamu a inuleno i Amoni ka pauomo anu ta gagi umewai ira!

³ Pauako iramo inuleno i Amoni: Rongeomo pau-Do Ue Ala: Kanandiomo pau-Do Ue Ala: Hangano omue mebooliako ’Losoko!’ mongkona po'ianga mempori-Ku tempono ilinimpai memporino, mongkona wita Isaraeli tempono wita atuu pinokogagi boni-boni, ka mongkona suku Yehuda tempono ondae asalakono melako a pontadia,

⁴ onaemo pu'uno, mentee ntu'u, Aku meweengakomu a mia inso i sabaano oleo gagi miano. Ira mpowangu pekemaado i olomu ka mpowangu po'iangado. Ira mengkaano wua ngkeu kaangamu ka me'inuo susuno pinotuwumu.

⁵ Aku weweuo Raba gagi tongampada tiado unta ka luwuno kotado inuleno i Amoni gagi po'iangado bawaano bembe bimba. Ka komiu mento'orio nine Ongkuemo Ue.

⁶ Hangano kanandiomo pau-Do Ue Ala: Hangano upetopaakono kaemu ka metundoakono karumu, saru mo'undeakono luwuno o'aliano aroamu te'aro wita Isaraeli,

⁷ onaemo pu'uno, mentee ntu'u, Aku tumandeo kae-Ku umewaiko ka meweengakomu gagi pomuruado luwuno tongku. Aku mokotampulako inso i tongano luwuno tongku ka mepateko inso a luwuno wita, saru rumopuko. Ka kotumo'orio nine Ongkuemo Ue.”

Pinau anu ta gagi umewaio Moabi

⁸ Kanandiomo pau-Do Ue Ala, ”Hangano motae Moabi: Mentee ntu'u, suku Yehuda atuu mengkena kana luwuno tongku susua,

⁹ onaemo pu'uno, mentee ntu'u, Aku weweuo wita mantandeano Moabi te'ungkahi hangano tekaleno luwuno kota hawe a luwuno kota petidaano, tekosino wita atuu: Beti-Yesimoti, Baala-Meoni ka Kirataimi.

¹⁰ Aku meweengakono Moabi meronga inuleno i Amoni a mia inso i sabaano oleo gagi tiado, ka si rinambe mbo'u inuleno i Amoni i olodo luwuno tongku.

¹¹ Aku modontaiakono pohuku ndi Moabi. Ka ira mento'orio nine Ongkuemo Ue.”

Pinau anu ta gagi umewai ira to Edomi

¹² Kanandiomo pau-Do Ue Ala, ”Hangano Edomi mombalo a nsuku Yehuda ka sala mpoweweu anu langkai hangano moweweu pombaloa ndi ondae,

¹³ onaemo pu'uno, kanandiomo pau-Do Ue Ala, Aku tumandeo kae-Ku umewaio Edomi ka mokotampulao inso ndi onae mia ka kondehora saru weweuo gagi tekale-kale. Inso i Temani hawe i Dedani ira memate tebangkuako ponai.

¹⁴ Saru kaedo bawaa-Ku Isaraeli Aku weweuo pombalo-Ku ndi Edomi. Ira meweweuo Edomi menunu saru tekuda ka mokulano tekuda-Ku. Ka ira mento'orio nine Ongkuemo anu mombalo, kanandiomo pau-Do Ue Ala.”

Pinau anu ta gagi umewai ira to Pelisiti

¹⁵ Kanandiomo pau-Do Ue Ala, ”Hangano to Pelisiti mpoweweu pombaloa ka saru po'o'alia i laro aroa dompombalo ponaa-naa aroa ira mpompepate saru aroa mpe'iwali hawe a inulemiu,

¹⁶ onaemo pu'uno, kanandiomo pau-Do Ue Ala: Mentee ntu'u, Aku tumandeo kae-Ku umewai ira to Pelisiti ka mokotampula ira to Kereta saru mepate ira anu da ntebinta i wiwi ntahi.

¹⁷ Aku weweuo pombaloa anu lansara ndi ondae tinondaako petunduhi tekuda. Ka ira mento'orio nine Ongkuemo Ue, i tempono Kuweweuo pombaloa ndi ondae.”