Yehesikieli 24 - Wunta Mempori

Potundaano kawali anu menta'ilasi 24:1-14

¹ A nta'u ko'osio, wula kohopulu, tanggala hopulu wula atuu, haweomo pau-Do i Ue ndi ongkue,

² ”Hei anano mia, buriomo tanggala oleo andio, humbee, tanggala oleo andio. A oleo koa mbo'u andio mokole i Babeli mompu'u sumapoio Yerusale.

³ Pauomo asa potundaano a nsuku anu umewa ka potaeako ira: Kanandiomo pau-Do Ue Ala: Naaomo kawali a wawo api, naaomo, ka uwuomo mbo'u uwoi i larono;

⁴ naaomo batuno bau i larono, luwuno batuno anu moiko, pa'a ka torukuno; pokobukeakonomo atuu saru luwuno wuku bininiki.

⁵ Alaomo bimba anu tebiniki, ka potudaomo mbo'u keu ponahu i totono, po'ineeomo ninahu atuu ka irede ka luwuno wukuno gagi molusa i larono.

⁶ Onaemo pu'uno kanandiomo pau-Do Ue Ala: Masolaomo kota anu buke pasua rea, kawali menta'ilasi i larono ka ta'ilasino nahi tetadi inso ndi onae! Luarakonomo nte'o'asa mpole siimo ipinontendeako undi.

⁷ Hangano, rea anu inuwuno da hinawe i tonga-tongano. Onae umuwuo a wawo pongku watu anu londa. Nahi uwuo a wawo wita ranta ka ipokotutuwio pampawu.

⁸ Ka itesingka tekuda-Ku ka moweweu pombaloa, Kunaao reano atuu a wawo pongku watu anu londa ka si tetutuwi.

⁹ Onaemo pu'uno, kanandiomo pau-Do Ue Ala: Masolaomo kota anu buke pasua rea! Ongkue mbo'u mokolangkaio howuno keu.

¹⁰ Potudaomo tehadio keu, polangaomo api, weweuomo bauno ka itetunu, uwoino mo'are, ka luwuno wukuno mo'ai.

¹¹ Naaomo kawali mooa atuu a wawo waro api, ka itetunu ka malano gagi motaha, ranta regeno terawo i larono ka ta'ilasino te'onini.

¹² Nahina tuduno pe'isei, hangano ta'ilasino anu mokapa nahi pokote'onini inso ndi onae, maupo a laro api.

¹³ Hangano omue kumokoburutiakono mokoburua koroimu, onaemo pu'uno inehe-Ku mokomorinako, sine omue nahi gagi morina inso a mokoburumu. Omue nahi kopinokomorina mbo'u hawe ka itemonto tekuda-Ku ndi omue.

¹⁴ Ongkue, Ue, anu pauo. Mongkona atuu ta gagi, ka Ongkue anu weweuo. Nahi Ku'ontoo ka nahina pompehohawa, nahina mbo'u pe'o'ole. Aku bitarako montonda pelelu ka wineweumu, kanandiomo pau-Do Ue Ala.”

Mateno beineno i Yehesikieli gagi tondonino tedontano Yerusale

¹⁵ Ka i'amba haweomo pau-Do i Ue ndi ongkue,

¹⁶ ”Hei anano mia, kitao, Aku umalao inso ndi omue onae anu tedoa ukekewoio, kana ikonao tula, sine siimo ponsabangi ke maupo mengese, ka siimo poluarako uwoi mata.

¹⁷ Pompemasusamo penoro-noro, si poweweu ponsabangi matea. Wutuomo ramba-ramba ulumu ka pakeomo empehi karumu, si tutuwio i totono rupamu, ka si pongkaa roti po'inombo.”

¹⁸ I tempono mo'oru ongkue mepau a tongku atuu ka mansano ngkiniwia beineku mate. A mo'oruno mbo'u ongkue moweweu kana anu kupinarentaako.

¹⁹ Tongku atuu mpotae ndi ongkue, ”Nahi komiu pauakamike hapa pengkonaano anu wineweumiu andio ndi omami?”

²⁰ Kusangki ira, ”Pau-Do i Ue haweomo ndi ongkue,

²¹ Pauako iramo suku Isaraeli: Kanandiomo pau-Do Ue Ala: Menteeano Aku kumokoburutio po'ianga mempori-Ku, pabawaa anu pino'undeakomiu, pinemoikono matamiu ka po'eheno sumangamiu. Luwuno anamiu tama ka beine anu binintamiu ira memate ntebangkuako ponai.

²² Komiu meweweuo kana anu wineweuku: I totono rupamiu nahi komiu mentutuwio ka roti po'inombo nahi komiu mpongkaa;

²³ mompake ramba-ramba a ulumiu ka empehino karumiu; ka nahi komiu mponsabangi ke mpengese. Sine, komiu memate hangano salamiu ka pada pompemasusa.

²⁴ Kanatuumo i Yehesikieli gagi petondonimiu; mengkena kana anu wineweuno komiu meweweuo. Tewala gagiomo atuu, komiu mento'orio, nine Ongkuemo Ue Ala.

²⁵ Omue, anano mia, kombake a oleo Ku'alao bentedo, peramba-ramba anu mompokosanaa, pinemoikono mata, ka tekewoino sumangado, saru luwuno anado tama ka beine,

²⁶ a oleo atuu asa mia anu tola ta hawe mowawa lele ndi omue?

²⁷ A oleo atuu ngangamu ta te'ungkahi ka komepau a mia anu tola atuu ka nahi kobeebe mbo'u. Hangano kanandio omue kogagi petondonido. Ka ira mento'orio nine Ongkuemo Ue.”