Yehesikieli 23 - Wunta Mempori

I Ohola ka i Oholiba mepaekompo ira 23:1-49

¹ Haweomo pau-Do i Ue ndi ongkue,

² ”Hei anano mia, hinao orua beine, anano asa ine.

³ Ondae mebelesu i Masiri, ondae mebelesu i tempono da domemongura. I ra'ai wua radado pinisi-pisi, radado da moondo inini-ini.

⁴ Neeno anu te'aka i Ohola, ka neeno uaino i Oholiba, ondae mia-Ku. Ondae me'anaako ira ana ntama ka beine. Mongkona needo, i Ohola onaemo Samaria ka i Oholiba onaemo Yerusale.

⁵ I Ohola mebelesu sekono onae mia-Ku. Onae tesingka a luwuno kinekewoino, a nto Asuri, luwuno sorodadu

⁶ anu mpesangka sawu wungo motu'a, luwuno bupati ka anu mempabawa. Luwuno mia mongura anu montama, anu mpesawi a ngara.

⁷ Onae mebelesu saru ondae, luwuno to Asuri bininiki. Onae kumokoburutio koroino saru luwuno mia ndi sema imingki mewowaliakono, ka saru luwuno lahumoano.

⁸ Onae nahi bintao pebelesuno mompu'u inso i Masiri. Hangano tempono imongura dompewowaliakonomo mia, ka ondae me'ini-inio rada moondono saru mpoweeo pebelesudo ndi onae.

⁹ Onaemo pu'uno, onae Kupeweengakono a ngkaedo kinekewoino, a ngkaedo to Asuri ndi sema imingki mewowaliakono.

¹⁰ Ondae mesungkeo pinekaria winunino, luwuno anano tama ka beine merinako ka onae pinepateako ponai. Hangano kanandio onae gagi wua wiwido beine hangano pohuku dinontaiomo ndi onae.

¹¹ I Oholiba, uaino, kumitao mongkona atuu, sine onae laluaopo imingki mewowali sekonopo akano, ka pebelesuno ilaloio pebelesuno akano.

¹² Onae tesingka a nto Asuri, a luwuno bupati ka anu mempabawaio, a nsorodadu anu mpesangka soompo ka anu mpesawi a ngara, luwuno mangalitau anu montama.

¹³ Kukitao ikokoburutio koroino. Peleludo orua ira mengkena.

¹⁴ Tendeano onae tetiangi pebelesuno. Ikitao gambarano tama ngginori a rere, gambarado to Kasidimi, ngginori a laro sora motaha melanga,

¹⁵ tongano binooako peboo ntonga, uluno mompake peboo ulu anu hinao ndoe-ndoeno, luwuno tengkita kana petewawa sorodadu kana rupado to Babeli inso i Kasidimi, wita hinaado.

¹⁶ Umarino kumitao matano, onae mingki mewowaliako ira ka montena mia lumako ndi ondae i wita Kasidimi.

¹⁷ Ka i'amba to Babeli me'aiwa ndi onae, a mpoturia pewowalia ka mengkokoburutiakono pebelesuado. Umarino gagi mokoburu hangano ondae, onae meliahako inso ndi ondae.

¹⁸ Hangano onae weweuo pebelesuno nahi pewuni-wuni ka mopokitao pinekaria winunino, Ongkue mbo'u meliahako inso ndi onae hangano mokoburu, kana Kupeliahako inso ndi uaino.

¹⁹ Onae moweweu laluaopo hadio pebelesuno rumambeo tempono da imongura ipebelesu i wita Masiri.

²⁰ Onae mingki mewowaliako ira luwuno wali-walino mpebelesu, anu pinekaria winunino kana anuno kalide anu tepanano uwoino kana tepanano uwoi anuno ngara.

²¹ Omue mosisiriakono mokoburua tempo da umongura, tempono to Masiri me'ini-inio radamu ka mempisi-pisio wua rada ana beinemu.

²² Onaemo pu'uno, hei Oholiba, kanandiomo pau-Do Ue Ala, lano meliahakokomo inso a luwuno kinekewoimu, sine mentee ntu'u, Aku tumena ira ka dompelelu me'ewaiko. Aku wawa ira umewaiko inso a mpehori-horimu:

²³ to Babeli ka luwuno to Kasidimi, to Pekoda, to Soa ka to Koa, ka luwuno to Asuri mperonga saru ondae, mangalitau anu montama, luwuno bupati ka luwuno anu mempabawa, luwuno petewawa sorodadu ka luwuno sorodadu, luwuno anu mpesawi a ngara.

²⁴ Ondae me'aiwa me'ewaiakomu kareta mpetea, kareta meroda, ka asa tepumpuado luwuno tongku. Ira mpopatinda kanta langkai ka kodei saru songko umewaiko limbu-limbu. Aku meweengakono pohuku andio ndi ondae ka ira mebitarako montonda songkado.

²⁵ Aku mombaloakono mosiri-Ku ndi omue, ka ira meweweuko a laro ntekuda, enge ka birimu ira menseseio ka ondae anu da tebinta i olomiu ira memate tebangkuako ponai. Ondae merako ira anamu tama ka beine ka toreano i olomiu ta kumaano api.

²⁶ Ira melohulambeko ka merontuo luwuno peramba-rambamu.

²⁷ Aku weweuo ka upena-naakono mokoburumu ka pebelesumu mompu'u inso i wita Masiri, ranta nami upesili-sili mata mbo'u ndi ondae ka nahi domerinorambe mbo'u to Masiri.

²⁸ Hangano kanandiomo pau-Do Ue Ala: Kitao, Aku meweengakomu a ngkaeno mia anu ino'aliaakomu, maupo upeliahakomo inso ndi ondae.

²⁹ Ira meweweuakomu po'o'aliaako, merontuo luwuno hasilino pine'iseiakomu, ka mebintako kolambe-lambe, ranta pinekaria winuni pebelesumu tengkita. Mokoburumu ka pebelesumu

³⁰ mowawaakomu mongkona andio, hangano omue mebelesu saru tumonda ira tongku ka kumokoburutiakono koroimu lahumoado.

³¹ Omue tuwu tumondao peleluno akamu, onaemo pu'uno Aku mopo'inuko inso a mpialano.

³² Kanandiomo pau-Do Ue Ala: Omue asalakono mo'inu inso a mpialano akamu, piala anu ondalo ka malua, onaemo piala anu hadio ihino; omue gagi pengingisia ka pasinggiria.

³³ Omue kobuke molangua ka masusaa. Piala mongkokongiria ka boni-bonia, pialano akamu Samaria.

³⁴ Omue uminuo ranta ka ipingko, ngumaio peha-pehano, ka urakuo wua radamu. Hangano Ongkue anu pauo, kanandiomo pau-Do Ue Ala.

³⁵ Onaemo pu'uno, kanandiomo pau-Do Ue Ala: Hangano omue kumolupe Aku ka mebungkui Aku, kanandio-andio tembiomo asa-asamu mokoburumu ka pebelesumu.”

³⁶ Ka Do'amba i Ue mepau ndi ongkue, ”Hei anano mia, Behekoke bitara ira i Ohola ka i Oholiba ka pauako ira luwuno wineweudo anu mokoburu?

³⁷ Hangano ondae monsosabo, kaedo meranoako rea. Ondae monsosaboako mesombai ira lahumoado, maupo ana ntamado anu pine'anaako ana-Ku dopesombaakono gagi pesomba laro api a luwuno lahumoado ka igagi kaanga.

³⁸ Umarino atuu, ondae mbo'u meweweuo mongkona andio ndi Ongkue: Ondae mensosa'aio po'ianga mempori-Ku a oleo atuu ka mengkokoburutio luwuno oleo Saba-Ku.

³⁹ Tempono domensumbele ira anado tiado lahumoado, ondae me'aiwa a oleo atuu a mpo'ianga mempori-Ku ka melimpaio memporino. Mentee ntu'u, onaemo andio anu wineweudo a laro raha-Ku.

⁴⁰ Tamoako mbo'u ondae mpo'ema ka dome'aiwa mia inso a mpo'ianga anu olai saru mpontena mia melako a mia atuudo, ka mentee ntu'u, mia mbo'u atuudo me'aiwa. Hangano ondae ka upedolo, pokontekosio giremu ka koroimu ramba-rambaakono peramba-ramba.

⁴¹ Omue pentoro a mpoturia anu tekosi ka i arono tetinda meda. A wawo meda atuu naao dupa-Ku ka lana-Ku.

⁴² Ka i'amba terongeomo suara maroano mia anu mpesana-sanaa, ka i olodo mia hadio atuu tewinso anu wela memolangu anu mentinena inso i pada one. Ondae mpemala-mala a ngkaedo ka ramba-ramba ulu marambaa a uludo.

⁴³ Ongkue mepau: Nde da moweweu pebelesuake bunga anu moleu andio? Mia mebelesu saru onae, humbee, saru onae.

⁴⁴ Ondae me'aiwa ndi onae kana mia aiwa a beine belesu. Kanatuumo dome'aiwa ndi Ohola ka ndi Oholiba, beine mokoburu atuu.

⁴⁵ Sine mia mentee ta bitara ira kana mia bitara ira beine anu mponsosabo ka anu mpo'uwu rea. Hangano ondae beine monsosabo ka kaedo meranoako rea.”

⁴⁶ Hangano kanandiomo pau-Do Ue Ala, ”Po'ineeomo ipentade asa tepumpuano mia umewai ira ka po'ineeomo domempineweengako a mongkokongiria ka pomurua.

⁴⁷ Tepumpuno mia andio ta wuno ira, umimpahiako ira ponai, mepate ira ana ntama ka anado beine saru sumongkoo luwu rahado ka ipingko.

⁴⁸ Aku mokompenaa-naao mokoburua i wita atuu ka luwuno beine ira mpekokoongakono pepopoto'ori atuu ka nahi ira mpoweweu mokoburua mbo'u kana anu wineweumiu.

⁴⁹ Mia ta mombaloakono mokoburumiu ndi omiu ka omiu asalakono tumembio luwuno halamiu hangano omiu mesombai ira lahumoa. Ka komiu tumo'orio nine Ongkuemo Ue Ala.”