Yehesikieli 22 - Wunta Mempori

Luwuno halano Yerusale 22:1-31

¹ Haweomo pau-Do i Ue ndi ongkue,

² ”Hei omue, anano mia, behekoke dumontaio, humbee, dumontaio pohuku a ngkota anu buke pasua rea? Pauakonomo luwuno wineweuno anu mokoburu.

³ Pauomo: Kanandiomo pau-Do Ue Ala: Hei kota, anu mo'uwu rea i tonga-tongano ranta hawe tempo pohukuano, ka anu weweu ira lahumoano onaemo kumokoburutio koroino.

⁴ Saru rea anu inuwumu omue saala ka saru luwuno lahumoa anu wineweumu omue gagi mokoburu. Omue weweuo luwuno oleomu ko'umpe-umpedano ka tampulaano luwuno ta'umu hawe. Onaemo pu'uno, Aku mokogagiko pepaukiakoado luwuno tongku ka popodeu-deuado luwuno wita.

⁵ Moiko anu umpeda ndi omue maupo anu olai inso ndi omue ta mopodeu-deuko, anu teto'ori mokoburuno ka buke marisua.

⁶ Kitao, singge mia petewawado to Isaraeli merorohio rosono i tonga-tongamu ka ipo'uwu rea.

⁷ Luwuno ama ka ine i olomu pinokongkodei, ka i tonga-tongamu mia mpo'ala komba tiado a mia mehawe; nana'ote mbo'u anu nahina amano ka tuwu beine i olomu pinokonsii.

⁸ Uperuanahi ira mongkona anu mempori-Ku ka luwuno oleo Saba-Ku ukokoburutio.

⁹ I olomu mehinawe anu pompau pegaupi anu tinoodo mpo'uwu rea ka mia anu mpongkaa pesomba a wawo luwuno pongku pesombaa. Luwuno mbo'u mia anu mpoweweu mokoburu kongko i tonga-tongamiu.

¹⁰ I olomu hinawe mia anu mosungke pinekaria winunino kombiano amano ka dumadaio beine anu tekonai mokoburu hangano ihaweo wulano.

¹¹ Anu asa mia moweweu mokoburu saru kombiano pe'asa miano ka anu susua kumokoburutio ana mponino beine saru wineweu mokoburu, anu asa mia mbo'u dumadaio pepaekompono beine, ana ngkoroino amano.

¹² I olomu hinawe mia anu montarima pompowee anu nahi pototono ka ipo'uwu rea. Omue mo'ala tiangino ke bungano doi ka mokorugio pe'asa miamu mo'ala anu komba tiamu. Mentee ntu'u, ukolupe Akumo, kanandiomo pau-Do Ue Ala.

¹³ Mentee ntu'u, Kupetopaakono kae-Ku mongkona untu anu upali hinawemu ka mongkona rea anu inuwu i tonga-tongamiu.

¹⁴ Polioke aroamu ka kaemu moroso mpiha i tempono Kupoweweu ndi omue? Ongkue, Ue, anu pauo ka Aku weweuo.

¹⁵ Aku sumiarawoko i olodo luwuno tongku ka sumiarawoko a mperupa-rupa wita ka Aku umoninio mokoburuno koroimu.

¹⁶ Omue kokinokoburuti i arodo luwuno tongku hangano salamu omuemu. Ka kotumo'orio nine Ongkuemo Ue.”

¹⁷ Ka i'amba haweomo pau-Do i Ue ndi ongkue,

¹⁸ ”Hei anano mia, ndi Ongkue suku Isaraeli kanaomo tadia; luwudo kana mala, tima mopute, labu, ka tima mo'ito a laro pompokolonoa; ondae kana pontadia salaka.

¹⁹ Onaemo pu'uno, kanandiomo pau-Do Ue Ala: hangano luwumiu kana tadia, ka menteeano, Aku pumpu komiu i tonga-tongano Yerusale.

²⁰ Kana mia mopumpu salaka, mala, labu, tima mo'ito, ka tima mopute a laro pompokolonoa ka mompuuriakono api i totono ka ipokolonoo, kanatuumo Aku pumpu komiu a laro ntekuda-Ku ka mukulano tekuda-Ku saru numaa komiu i larono, umarino atuu mokolono komiu.

²¹ Aku pumpu komiu ka wurosiakomiu api tekuda-Ku, ranta ka imempinokolono i larono.

²² Kana salaka pinokolono a laro pompokolonoa, kanatuumo omiu pinokolono i larono. Komiu mento'orio nine Ongkue, Ue, anu umuwuo tekuda-Ku ndi omiu.”

²³ Ka i'amba haweomo pau-Do i Ue ndi ongkue,

²⁴ ”Hei anano mia, pauakonomo: Omue onaemo wita anu nahi pokomorinao uwoi, nahi siwuio usa i tempono bamburua.

²⁵ Luwuno petewawa i tonga-tongano kana singa anu mengaoli, anu momperangkami kaangano. Mia iteleo, arataa ka luwuno parewa anu masuli olino irontuo, tuwu beine iwineweuo tetiangi hadio i tonga-tongano.

²⁶ Luwuno sando mpesomba mpolimpai songka Tora-Ku ka mengkokoburuti ira mongkona anu mempori ndi Ongkue. Nahi domponsisinggeo olono anu mempori saru anu nahi mempori, nahi dompopaguruako teposisinggeno olono anu mokoburu saru anu morina. Ondae mpepusu a luwuno oleo Saba-Ku. Kanatuumo Kukinokoburuti i tonga-tongado.

²⁷ Luwuno mia pinemota'u i tonga-tongano kana serigala anu momperangkami kaangano ka ipo'uwu rea ka mompepate mia hangano ime'uraakono koroino onaeno.

²⁸ Luwuno nabino mengkapuruakono pongkita anu mompopo'oo ka tino'ori pegaupido luwuno wineweudo atuu. Luwuno nabi atuu mpotae: Kanandiomo pau-Do Ue Ala!, kahinaano Ondae i Ue nahi Dopepau.

²⁹ Palili i wita atuu mpo'ala anu komba tiado ka mporontu, mpompokonsii mia anu marasai ka mongkokolaro, saru songka nahi domperioo mpo'ala anu komba tiado a mia mehawe.

³⁰ Ongkue mo'ungke i tonga-tongado asa mia anu mompontade rere watu ka mekorahako a bolono hangano wita atuu i aro-Ku ka si ropu. Sine nahi Kupohawe.

³¹ Onaemo ka Ku'uwuo bamburu-Ku ndi ondae ka mepateako ira api tekuda-Ku. Peleludo Ku'aluako ira a uludo. Kanandiomo pau-Do Ue Ala.”