Yehesikieli 21 - Wunta Mempori

Ponai-Do i Ue umewaio Yerusale 21:1-27

¹ Haweomo pau-Do i Ue ndi ongkue,

² ”Hei anano mia, po'aroomo rupamu i Yerusale ka pohaweomo pekuahako a mpo'ianga memporino ka pauomo anu ta gagi umewaio wita Isaraeli.

³ Pauakonomo wita Isaraeli: Kanandiomo pau-Do i Ue: Kitao, Aku gagi ewaimu. Aku butao ponaiKu inso a tampino ka mokotampulao inso i tonga-tongamu mia mentee ka mia mosa'o gauno.

⁴ Onaemo pu'uno Aku mokotampulao inso i tonga-tongamu mia mentee ka mia mosa'o gauno, ka ponai-Ku ta tebuta inso a tampino te'aro a luwuno mia inso i selata hawe i utara.

⁵ Luwuno mia ira mento'orio nine Ongkue, Ue, butao ponai-Ku inso a tampino; ponai atuu nahi ta mekule mbo'u.

⁶ Omue, anano mia, peraalikimo! Peraalikimo i arodo kana asa mia anu wuku ntongano tepudu ka kongko a laro tedoa marasaia.

⁷ Tewala ondae mpesikeno ndi omue: Tembio ka uperaaliki? Sangkimo: Hangano asa lele! Tewala lele atuu tepaleleomo, sompo aroa ta gagi motewe ka luwuno kae telupe, luwuno roso tetadi ka luwuno mia pasi'eme doito. Mentee ntu'u, mongkona atuu manasa hawe ka gagi! Kanandiomo pau-Do Ue Ala.”

⁸ Ka i'amba haweomo pau-Do i Ue ndi ongkue,

⁹ ”Hei anano mia, pauomo anu ta gagi ka potae: Kanandiomo pau-Do i Ue: Ponai! Ponai! Anu inahaomo ka pinulohi!

¹⁰ Inaha ka ipo'uwu rea ka pinulohi ka imangkilo kana berese. Nde kita mpo'undeke? — Tukono anaku tumetewehio luwuno rupano keu. —

¹¹ Ponai atuu wineeako ka ipinulohi, ka ikinungku. Ponai atuu inaha ka pinulohi, ka iwineeako a ngkaeno puu pompepate.

¹² Peboolimo ka ponsabangimo, hei anano mia! Hangano ponai atuu ta gagi umewaio bawaa-Ku, ta gagi ewaino luwuno petewawa Isaraeli. Ondae pineweengako a mponai, kanatuu koa mbo'u bawaa-Ku. Onaemo pu'uno, topaomo tongamu gagi petondoni po'inombo.

¹³ Hangano po'ara-arahako hawe ka nahina maupo te'asa anu mokompeteahako, kanandiomo pau-Do Ue Ala.

¹⁴ Omue anano mia, pauomo anu ta gagi ka topaomo kaemu. Po'ineeomo ponai atuu gagi meluka mpendua, meluka pentolu. Onaemo atuu ponai pompepate, ponai ta pompepate anu tedoa hadio, anu lumimbu ira.

¹⁵ Hangano kanandio aroado masusa ka anu tebangku koteti-tetiangino a sompo pewowa langkaido. Ongkue meparenta po'uwua rea saru ponai atuu. Adoo, ponai atuu wineweu mangkilo kana berese ka ipinulohi ka ipo'uwu rea.

¹⁶ Impahio anu i koana ka i manggali, ba isuamo koa matamu ipengkita.

¹⁷ Ongkue mbo'u montopa kae ka tekuda-Ku gagi wali temonto. Ongkue, Ue, anu pauo.”

¹⁸ Ka i'amba haweomo pau-Do i Ue ndi ongkue,

¹⁹ ”Hei omue anano mia, gambaraomo orua sala anu ta telaloano ponaino mokole i Babeli; oruano mompu'u i asa wita. Weweuomo dopi pontiso sala a pompu'uano sala anu te'aro a ngkota.

²⁰ Gambaraomo inso a nsala isua ponai atuu aiwa umewaio Raba, ineno kotado inuleno i Amoni ka umewaio Yehuda, anu benteno kongko i Yerusale.

²¹ Hangano mokole i Babeli mentade a sampangano sala atuu, a pompu'uano orua sala atuu ta moweweu anu nahi manasa. Iseduo anano mpana, mo'ema pontiso inso a ntinaha pelahumoaa, ka iparesao ateno kondehora.

²² A ngkae koanano tedonta ana mpana anu nahi manasa mongkona Yerusale: ka ipoporongeo suarano mia anu mompepate ka mebooliako pohio peteaa, ka ipinotuda luwuno parewa porumpa pewowa langkai ka mohowu wita gagi rere watu pongkadua ka mowangu bente pongkadua.

²³ Pinau anu nahi manasa atuu nahi mentee a pongkitado palilino Yerusale anu mpesumpa iramo mpetenunu ndi onae; sine ipewowoloo salado, onaemo ka domerinako.

²⁴ Onaemo pu'uno, kanandiomo pau-Do Ue Ala: Hangano omiu meweweuo salamiu atuu rinambe hangano teto'orino polimpai songka, ranta tengkitaomo luwuno halamiu a laro luwuno wineweumiu; hangano walikomiu nterorambe, komiu merinakoako pobobarasaia.

²⁵ Hei omue, petewawado to Isaraeli, mia mosa'o gauno anu mebungkui Aku, anu tempono haweomo pohukua pokotompa.

²⁶ Kanandiomo pau-Do Ue Ala: Lohuomo peboo ulumu ka oniniomo ramba-ramba ulumu! Luwuakoano nahi ta mengkena kanandio-andio. Anu tetotoako asalakono tinande, anu mantande asalakono tinotoako.

²⁷ Rawono, rawono, rawono Aku mokogagio! Ndio mbo'u nahi ta kongko mpiha ranta ka ihawe anu me'ueo, ka Aku meweengakono ndi onae.”

Ponai-Do i Ue umewaio inuleno i Amoni

²⁸ ”Omue anano mia, pauomo anu ta gagi ka potae: Kanandiomo pau-Do Ue Ala mongkona inuleno i Amoni ka pepaukido; potaemo: Ponai, ponai binutaomo ka ipo'uwu rea, pinulohi ka iporopu, ka mangkilo kana berese.

²⁹ Maupo hinao luwuno pongkita anu nahi upementeeo ka luwuno tino'ori anu nahi upe'ala-alao, ponai atuu ta ninaa a we'udo mia mosa'o gaudo anu mpebungkui Ira i Ue, anu tempono haweomo tiano pohukua pokotompa.

³⁰ Pokuleomo ponai atuu a tampino! A mpo'ianga upinokogagi, i wita insoamu, Aku humukuko.

³¹ Aku umuwuo bamburu-Ku ndi omue ka wurosio api tekuda-Ku ndi omue, umarino atuu meweengakomu a ngkaedo mia monge-monge anu tepaguru mporopu.

³² Omue ta gagi kaangano api, reamu ta te'uwu i tonga-tongano wita atuu, ka omue nahi korinambe mbo'u, hangano Ongkue, Ue, anu pauo.”