Yehesikieli 20 - Wunta Mempori

Pompehohawa ka pohuku-Do Ue Ala a laro ntutuluno Isaraeli 20:1-44

¹ A nta'u ko'opitu, wula ko'olima, tanggala hopulu wula atuu, mehawe iramo ba'opia mia memota'udo to Isaraeli ira mpo'ema pontiso inso ndi Ondae i Ue. Ondae mpentoro i aroku.

² Ka i'amba haweomo pau-Do i Ue ndi ongkue,

³ ”Hei anano mia, pepaumo a luwuno mia memota'udo to Isaraeli ka potaeako iramo: Kanandiomo pau-Do Ue Ala: Nde komiu me'aiwa mpo'ema pontisoke inso ndi Ongkue? A nee-Do i Ue anu tuwu, nahi Kubehe komiu mpo'ema pontiso inso ndi Ongkue, kanandiomo pau-Do Ue Ala.

⁴ Behekoke bitara ira, hei anano mia, behekoke bitara ira? Pauako iramo luwuno wineweudo uempu'udo anu mokoburu.

⁵ Pauakonomo: Kanandiomo pau-Do Ue Ala: A oleo Kubinikio Isaraeli, mesumpa Aku a inuleno sukuno i Yako ka mepopokita ndi ondae i wita Masiri; mesumpa Aku ndi ondae: Ongkuemo Ue Alamiu!

⁶ A oleo atuu Ongkue mesumpa ndi ondae Aku wawa ira inso i wita Masiri lumako i wita anu Kubinikiako ira, wita anu hadio ntu'u susu ka siu hoanino, wita anu tekosi i olono luwuno wita.

⁷ Ongkue mepau ndi ondae: Po'ineeomo sompo mia ka itadi ira pinesombaino anu mokoburu, ba isua ite'aro matano ka koroimu sii kokoburutiakono luwuno lahumoado to Masiri; Ongkuemo Ue, Ue Alamiu.

⁸ Sine, ondae me'ewa ndi Ongkue ka nahi dobehe meronge Aku. Sompo mia nahi tadi ira pinesombaino anu mokoburu, ba isua ite'aro matano, ka nahi binta ira lahumoado to Masiri. Ka Kupontoo umuwuo tekuda-Ku ndi ondae, motiio tekuda-Ku ndi onae i tonga-tongano wita Masiri.

⁹ Kuweweuo a nee-Ku, ka si kinokoburuti nee i arodo luwuno tongku, ba isua domekongko. I arodo luwuno tongku atuu Ongkue mepopokita ndi ondae saru wawa ira mpeluarako inso i wita Masiri.

¹⁰ Ongkue wawa ira mpeluarako inso i wita Masiri ka tumaate ira melako i pada one.

¹¹ Kuweeako ira luwuno pompakosi-Ku ka pauako ira luwuno atora-Ku, hangano mia anu weweuo, ta tuwu.

¹² Luwuno oleo Saba-Ku Kuweeako ira mbo'u ka igagi petondoni olono Ongkue ka ondae, ka domento'orio nine Ongkuemo Ue, anu mokomempori ira.

¹³ Sine, suku Isaraeli me'ewa ndi Ongkue i pada one. Nahi domentuwu montonda luwuno pompakosi-Ku ka nahi domentarimao luwuno atora-Ku, kahinaano mia anu weweuo ta tuwu. Ondae mbo'u tedoa mengkokoburutio luwuno oleo Saba-Ku. Ka Kupontoo umuwuo tekuda-Ku ndi ondae i pada one ka mepate ira.

¹⁴ Kuweweuo hangano nee-Ku, ka si kinokoburuti nee-Ku i arodo luwuno tongku, anu mengkitao Kuwawa ira mpeluarako.

¹⁵ Ongkue mbo'u mesumpa ndi ondae i pada one, nine nahi Aku wawa ira mpewinso i wita anu Kuweeako iramo, anu hadio ntu'u susu ka siu hoanino, wita anu tekosi i olono luwuno wita.

¹⁶ Hangano, nahi domentarimao luwuno atora-Ku ka nahi domentuwu montonda luwuno pompakosi-Ku saru mengkokoburutio luwuno oleo Saba-Ku; mentee ntu'u aroado metondao luwuno lahumoado.

¹⁷ Sine, Kupehohawa ira kumita ira, onaemo ka nahi Kupepate ira ka nahi Kupingko ira i pada one.

¹⁸ Kupepauako ira anado i pada one: Siimo imentuwu montonda luwuno pompakosido amamiu, siimo impe'ini a luwuno atorado, ka koroimiu siimo imengkokoburutiakono luwuno lahumoado.

¹⁹ Ongkuemo Ue, Ue Alamiu. Imentuwumo montonda luwuno pompakosi-Ku saru impe'inimo a luwuno atora-Ku ka imeweweuomo atuu.

²⁰ Pokomemporiomo luwuno oleo Saba-Ku, onaemo atuu gagi petondoni olono Ongkue ka omiu, ka domento'orio mia nine Ongkuemo Ue, Ue Alamiu.

²¹ Sine luwuno anado me'ewa ndi Ongkue, nahi domentuwu montonda luwuno pompakosi-Ku, ka nahi dompe'ini a luwuno atora-Ku ka domeweweuo, kahinaano mia anu weweuo ta tuwu. Ondae mbo'u mengkokoburutio luwuno oleo Saba-Ku. Ka Kupontoo umuwuo tekuda-Ku ndi ondae, motiio tekuda-Ku ndi onae i pada one.

²² Sine, Kuwali mokuleo kae-Ku ka moweweu a nee-Ku, ka si kinokoburuti nee-Ku i arodo luwuno tongku anu mengkitao Kuwawa ira mpeluarako.

²³ Ka Ku'amba mesumpa mbo'u ndi ondae i pada one Aku sumiarawo ira i olodo luwuno tongku ka sumiarawo ira a luwuno wita.

²⁴ Hangano, nahi domeweweuo luwuno atora-Ku, nahi domentarimao luwuno pompakosi-Ku, ka mengkokoburutio luwuno oleo Saba-Ku saru matado te'aro a lahumoano luwuno amado.

²⁵ Ongkue mbo'u moweeako ira luwuno pompakosi anu nahi moiko ka luwuno atora anu weweu ira nahi dompokomentuwu.

²⁶ Kupo'inee ira memokoburuako luwuno lahumoado, tempono sompo anu pine'anaako amba-ambano inso a mpe'anakaa pinesombaako gagi pesomba, Kuweweu ira tekonto, ka domento'orio nine Ongkuemo Ue.

²⁷ Onaemo pu'uno, pepaumo a nsuku Isaraeli, hei anano mia, ka potaemo ndi ondae: Kanandiomo pau-Do Ue Ala: A laro mongkona andio mbo'u uempu'umiu mpepaukia-Kune saru nahi dompetenunu ndi Ongkue.

²⁸ Umarino Kuwawa ira i wita anu Kudandiakono sumpa Aku weeako ira, tendeano ondae mpengkita a sompo pongku anu mantande ka sompo keu anu marombo, ka i'amba pinesombaako luwuno pesombado i ra'ai ka mpompowee pesomba anu mompokotesingka tekuda-Ku. I ra'ai ondae mpohaweo mbo'u luwuno pesomba anu mana mo'ahi ka mpesombaakono luwuno pesomba tinawado a mpo'ianga atuu.

²⁹ Ka Ku'amba mepau ndi ondae: Po'ianga mantande hapake anu aiwaamiu atuu? Hawe oleo andio neeno pinau Po'ianga Mantande.

³⁰ Onaemo pu'uno, potaemo a nsuku Isaraeli: Kanandiomo pau-Do Ue Ala: Nde imengkokoburutio mbo'uke koroimiu a laro nsala tumuwudo uempu'umiu ka mponsosabo saru mentondao luwuno pinesombai susua anu mokoburu?

³¹ Imewawao luwuno pesombamiu onaemo anamiu anu impesombaakono gagi pesomba a laro api, koroimiu imengkokoburutiakono luwuno lahumoamiu hawe oleo andio. Ka i'amba nde da Aku beheke impo'ema pontiso ndi Ongkue, hei suku Isaraeli? A nee-Ku anu tuwu, kanandiomo pau-Do Ue Ala, nahi Kubehe mbo'u impo'emai Aku pontiso.

³² Nahi ta gagi hapa anu melurako i laro aroamiu, hapa anu pinaumiu, ’Inehemami kana luwuno tongku susua, kana luwuno suku i luwuno wita ka kimpesomba a ngkeu ka a watu.’

³³ A nee-Ku anu tuwu, kanandiomo pau-Do Ue Ala, Aku parentaakomiu kae anu moroso, tokia anu tetande, ka tekuda anu te'uwu.

³⁴ Aku wawa komiu mpeluarako inso i tongano luwuno tongku ka pumpuakomiu kae anu moroso, tokia anu tetande, ka tekuda anu te'uwu, inso i luwuno wita isua itesiarawo.

³⁵ Aku wawa komiu a mpada onedo luwuno tongku ka i ra'ai Aku mekara-kara saru omiu tepo'aro rupa.

³⁶ Kana Kupekara-karaako ira uempu'umiu i pada one i wita Masiri, kanatuumo Aku mekara-karaakomiu, kanandiomo pau-Do Ue Ala.

³⁷ Aku mo'inee komiu ntelalo i totono tuko ka winso komiu a laro wutuno pedandia.

³⁸ Aku monsiao inso ndi omiu luwuno mia anu umewa ka mpebungkui Aku. Aku wawa ira mpeluarako inso i wita andio, po'iangado gagi mia hawe, sine nahi ira mpewinso i wita Isaraeli. Ka komiu mento'orio nine Ongkuemo Ue.

³⁹ Hei omiu, suku Isaraeli, kanandiomo pau-Do Ue Ala, po'ineeomo singge mia lumako mesomba a luwuno lahumoano. Sine lembuino komiu meronge Aku ka nee-Ku anu mempori nahi kinokoburutiako mbo'u luwuno pesomba ka lahumoamiu.

⁴⁰ Hangano, a wawo ntorukuno-Ku anu mempori, a wawo ntorukuno Isaraeli anu ondau, kanandiomo pau-Do Ue Ala, i ra'ai, i wita atuu, luwuno suku Isaraeli luwuno ira mpesomba ndi Ongkue. I ra'ai Aku memoiko komiu ka i ra'ai Aku tumuntuo inso ndi omiu luwuno pesomba pinesusua luwuno pesomba kaanga anu tebiniki, saru luwuno anu pinokomemporimiu.

⁴¹ Kana pesomba anu mo'ahi woono Aku memoiko komiu i tempono Kuluarako komiu inso i tongano luwuno tongku ka pumpu komiu inso i luwuno wita, isua itesiarawo. Aku mopokitao mempori-Ku i olomiu i arodo luwuno tongku.

⁴² Komiu mento'orio nine Ongkuemo Ue, i tempono Kuwawa komiu mpewinso i wita Isaraeli, i wita anu Kudandiakono sumpa Aku weeako ira uempu'umiu.

⁴³ I ra'ai komiu merambeo luwuno pelelu ka wineweumiu anu kumokoburutio koroimiu. Komiu memokokowuere mengkitao koroimiu hangano luwuno wineweumiu anu mosa'o.

⁴⁴ Komiu mento'orio nine Ongkuemo Ue, tempono Ongkue, a nee-Ku, nahi Kuweweu komiu menunu saru pelelumiu anu nahi moiko ka wineweumiu anu mosa'o. Hei suku Isaraeli, kanandiomo pau-Do Ue Ala.”

Api inso i wita selata 20:45-49

⁴⁵ Ka i'amba haweomo pau-Do i Ue ndi ongkue,

⁴⁶ ”Hei anano mia, po'aroomo rupamu i selata ka pohaweomo pekuahako i wita selata, ka pauomo anu ta gagi a ntobu i wita selata.

⁴⁷ Pauakonomo tobu i wita selata: Rongeomo pau-Do i Ue. Kanandiomo pau-Do Ue Ala: Kitao, Aku molangao api i laromu anu ta kumaano luwu keu anu kongko ndi omue, moiko anu molowulu maupo anu moleu mokari. Apino anu kolanga-langa nahi ta mate ka luwuno rupa inso i selata hawe i utara ta tetunuako mokulano.

⁴⁸ Sompo mia ta kumitao nine Ongkuemo, Ue anu molangao; api atuu nahi ta mate.”

⁴⁹ Ka ku'amba motae, ”Oo, Ue Ala, dompotae mongkona ongkue: Kombake onae butu pau ira pau pasinggiri?”