Yehesikieli 2 - Wunta Mempori

Ondae i Ue moboio ka tumenao i Yehesikieli 2:1–3:15

¹ Ondae i Ue mepau ndi ongkue, ”Hei anano mia, pentademo. Aku mepau saru omue.”

² Kontongaa-Do mepauakune, Penaa-Do i Ue lumimbu aku ka montade aku. Ka ku'amba rumonge Ira anu mepauakune.

³ Pau-Do ndi ongkue, ”Hei anano mia, Kutenako a nto Isaraeli, a tongku mpe'ewa anu me'ewa iramo ndi Ongkue. Ondae ka uempu'udo mpe'ewa iramo ndi Ongkue, hawe mbo'u oleo andio.

⁴ A inule anu me'ulu watu ka moteaomo aroa andio Kutenako. Omue asalakono pauo ndi ondae: Kanandiomo pau-Do Ue Ala.

⁵ Moiko domperorongeakono ke naahi, hangano ondae atuu suku anu mpe'ewa, ira mento'orio nine asa nabi kongko i tonga-tongado.

⁶ Sine omue, anano mia, siimo doitoako ira ke maupo luwuno paudo, maupo omue saru ewo rui ka omue mo'ia umpeda kasi-kasi molea. Siimo doito rumongeo luwuno paudo ka siimo lingkauakono rupado, hangano ondae atuu suku anu mpe'ewa.

⁷ Pohaweomo pau-Ku ndi ondae, moiko domperorongeakono ke naahi, hangano ondae atuu mpe'ewa.

⁸ Sine omue, anano mia, rongeomo hapa anu pinau-Ku ndi omue; siimo pe'ewa kana suku anu mpe'ewa andio. Pengangamo ka kaanomo hapa anu Kuweeakomu.”

⁹ Kukitao, menteeano hinao kae anu tetasiako ndi ongkue, ka i larono hinao paluluno wunta.

¹⁰ Ka do'amba wireio i aroku. Paluluno atuu binuri patimbali ka i ra'ai teburi penani ponsabangi, pompemasusa ka pompe'anaiki.