Yehesikieli 19 - Wunta Mempori

Ponsabangi mongkona mokoledo to Isaraeli 19:1-14

¹ Ka omue, penaniakonomo ponsabangi mongkona luwuno petewawado to Isaraeli.

² Potaemo kanandio, ”Inemu gagiomo ntu'u singa waino i olodo luwuno singa! Onae mepombole i olodo singa mongura, ka mo'uo ira anano.

³ Onae mokolangkaio asa inso a luwuno anano, gagi singa mongura; singa mongura mepaguru momperangkami, maupo mia iteleo.

⁴ Luwuno tongku merongeo mongkona onae, onae tekadu a laro aa kinekedo; ka rinendeako kai winawa i wita Masiri.

⁵ Tempono ipokonto'orio nahi gagi usahano ka pomperorohiano tampulaomo, i'alao anano anu susua ka ipokolangkaio gagi singa mongura.

⁶ Anano andio melempa-lempa i olodo bawaano singa, onae gagi singa mongura, onae mepaguru momperangkami, maupo mia iteleo.

⁷ Onae sumolangi ira bentedo ka kumale-kaleo luwuno kotado. Tolino saru luwuno ihino mpo'ia medoito rumongeo unino pengaolino.

⁸ Luwuno tongku mpentade me'ewaio inso a luwuno wita anu lumimbuo, ondae menta'oo buani ira merakoo ka mengkaduo a laro aa kineke.

⁹ Onae wininsoako kai a laro mpo'ukoa, winawa i arono mokole i Babeli ka wininso a laro torungku, ka si teronge mbo'u pengaolino a wawo luwuno torukuno Isaraeli.

¹⁰ Inemu anu me'asa rea saru omue kana keu anggoro, anu tepaho umpeda uwoi, mewua ka mesampa hangano uwoi anu hadio ntu'u.

¹¹ Ndi onae hinao sampa anu moroso anu gagi tuko poparentaa. Onae ondau ntu'u i olodo sampano anu poore, ka gagi tengkita hangano mantandeno ka hangano sampa motutuno anu hadio.

¹² Sine, a laro ntekuda onae tebuta ka pinetadiako i tolino; angi sabaano oleo mokomoleuo mokari, wuano sinintaki sampano anu moroso gagi moleu mokari ka ikaano api.

¹³ Kanandio-andio onae tepaho i pada one, a wita anu motu'i ka mokorangaako uwoi.

¹⁴ Ka i'amba meluarakoomo api inso a sampano anu kumaano sampa motutuno ka wuano, ranta nahina mbo'u ndi onae sampa anu moroso ka nahina tuko poparentaa.” Ndiomo ponsabangi ka ta pinake gagi ponsabangi.