Yehesikieli 16 - Wunta Mempori

YERUSALE ANU NAHI PETENUNU 16:1-63 Ondae Ue Ala binio Yerusale gagi beine-Do

¹ Ka i'amba haweomo pau-Do i Ue ndi ongkue,

² ”Hei anano mia, pauakonomo Yerusale luwuno wineweuno anu mokoburu.

³ Potaemo: Kanandiomo pau-Do Ue Ala ndi Yerusale: Insoamu ka hinaamu i wita Kana'a. Amamu to Amori ka inemu to Heti.

⁴ Hinaamu kanandio: Tempono upine'anaako, penggoeno puhemu nahi inotuhi ka omue nahi dinoloako uwoi ka imorina koa. Omue mbo'u nahi lineloiako ohia ke maupo tinongoako tahuberi.

⁵ Nahina maupo te'asa mia mehohawako ranta luwuno atuu wineweu ndi omue hangano mokoko'undu. Omue tendeano tinadi a lere hangano dompe'uru-uruko mia a oleo hinaamu.

⁶ Ongkue telalo umpeda ndi omue ka kumitako mesumpe-sumpe meranoako rea. Ongkue mepau ndi omue anu kongko meranoako rea atuu: Omue asalakono tuwu!

⁷ Kuweweuko langkai kana pinopaho a lere. Omue tuwu ka gagi langkai, tendeano hawe gagi sompo tinuwu. Wua radamu hinaomo tadeno ka wuumu tuwuomo, sine omue kolambe-lambe.

⁸ Ongkue telalo umpeda ndi omue ka kumitako; mentee ntu'u, omue haweomo a tempono umingki mewowali. Kuwileo hawu-Ku i wawomu ka tumutuwio pinekaria winunimu. Saru mesumpa Ongkue moweweu pedandia saru omue, kanandiomo pau-Do Ue Ala, ka saru atuu omue gagi mia-Ku.

⁹ Kudoloakomu uwoi mokomorinao koroimu inso a rea ka Ku'urapiakomu lana.

¹⁰ Kupokonao sangka mesora-sora ndi omue ka moweeakomu sandala inso a ngkuli alusu ka tutuwi ulu inso a lena alusu saru salenda inso a nsabe.

¹¹ Kuramba-rambaakomu peramba-ramba ka mokonao mala-mala a ngkaemu ka enu-enu a we'umu.

¹² Kupokonao tole-tole a engemu ka a birimu saru ramba-ramba ulu marambaa a wawo ulumu.

¹³ Kanatuumo omue rumamba-rambaakono koroimu wulaa ka salaka. Sangkamu lena alusu, sabe, ka sawu mesora-sora. Kaangamu inso a ntarigu moiko ntu'u, siu hoani, ka lana. Omue gagi tedoa tekosi ranta tekona gagi mokole beine.

¹⁴ Neemu telele i olodo luwuno tongku hangano tekosimu, hangano sompo ntu'u tekosimu marambaako peramba-ramba-Ku anu Kuweeakomu, kanandiomo pau-Do Ue Ala.”

Pebelesuno Yerusale ka hukuno 16:15-52

¹⁵ ”Sine omue merorohio tekosimu ka telelemu ka upebelesu. Omue moweeo ntu'u pebelesumu a sompo mia anu telalo.

¹⁶ Omue umala ira sangkamu poweweu luwuno po'ianga pompelangkaia anu mesora-sora ka u'amba mebelesu i tu'ai. Mongkona kanatuu napi hori gagi ka nahi ta gagi mbo'u.

¹⁷ Omue umala ira mbo'u peramba-rambamu anu wineweu inso a wulaa ka salaka anu Kuweeakomu, ka u'amba weweu ira tinaha tama ka upebelesu saru ondae.

¹⁸ Omue umalao sangkamu anu mesora-sora tumutuwiako ira ka mesombaakono ndi ondae lana ka dupa-Ku.

¹⁹ Kaanga mbo'u anu kuweeakomu onaemo tarigu moiko ntu'u, lana, ka siu hoani, anu Kuweeakomu gagi kaangamu, upesombaakonomo ndi ondae gagi pesomba anu mo'ahi woono. Kanatuumo anu gagi, pau-Do Ue Ala.

²⁰ Tendeano omue umala ira anamu tama ka beine anu upe'anaako ira tia-Ku ka mesombaakono ndi ondae gagi kaangado. Nde napi sompo mbo'uke pebelesumu andio?

²¹ Nine omue sumumbele ira ana-Ku ka meweengakono ndi ondae saru mesombaakono gagi pesomba a laro api.

²² A laro luwuno wineweumu anu mokoburu ka pebelesumu atuu nahi upewowoloo mbo'u i tempono umongura, tempono ukolambe-lambe saru mesumpe-sumpe a laro meranoako reamu.

²³ Umarino luwuno wineweumu anu mosa'o atuu – ’Masola, masolakomo!’ kanandiomo pau-Do Ue Ala –

²⁴ omue mowangu po'ianga anu mantande ka moweweu pesombaa a sompo-sompo tanalapa.

²⁵ A sompo pesampaano sala omue mowangu po'ianga pesombaa ka weweuo tekosimu gagi mokoburu saru sumengao orua pa'amu a sompo mia anu telalo, onaemo ka itetia-tiangi pebelesumu.

²⁶ Omue mebelesuako to Masiri, pehori rahamu, anu langkai anuno atuu, onaemo ka iteti-tetiangi pebelesumu, ka mokotesingkao tekuda-Ku.

²⁷ Kitao, Ku'ewaikomo ka kupokurao tiamu saru meweengakomu a mpo'ehedo mia anu umo'aliaakomu, luwuno beine to Pelisiti anu mokoko'iido kumitao pelelumu anu mokoburu atuu.

²⁸ Omue mebelesuako mbo'u to Asuri hangano napi upesompoo. Omue mebelesu saru ondae, sine naapo koa mbo'u upesompoo.

²⁹ Omue mokohadioo pebelesumu saru Kasidimi, wita pebalu-balua, sine maupo saru atuu napi upesompoo.

³⁰ Langkai ntu'u po'eheno koroimu atuu, kanandiomo pau-Do Ue Ala, omue anu weweuo luwuno andio, poweweuno asa beine belesu tinutundali.

³¹ Tempono uwanguo po'iangamu anu mantande a sompo pesampaano sala ka moweweu po'ianga pesombaamu a sompo tanalapa, omue komba kana pebelesudo anu mehano hangano omue nahi behe montarima tambo pebelesu.

³² Hei beineno anu monsosabo, anu mongkopui mia susua euno tamano!

³³ Mia mpoweeako ira tambo a luwuno beine belesu, sine omue posuleno. Omue moweeako ira pompowee gagi pompopandei a luwuno anu kumekewoiko ka moweeako ira pompowee nahi pototono ka inso a mpehori-horimu me'aiwa ndi omue ka impebelesu.

³⁴ A laro mpebelesumu omue posuleno inso a luwuno beine susua. Komba mia anu me'ungkeko ira mpebelesu, sine omue koa anu mompowee tambo pebelesua, sine omue nahi pinowee hapa-hapa; omue posuleno.

³⁵ Onaemo pu'uno, hei beine belesu, rongeomo pau-Do i Ue!

³⁶ Kanandiomo pau-Do Ue Ala: Hangano omue moweeo ntu'u mokoburumu ka sumungkeo pinekaria winunimu a laro mpebelesumu saru mia anu kumekewoiko ka luwuno lahumoamu anu mokoburu ka hangano reado anamu anu pinesombaakomu ndi ondae,

³⁷ mentee ntu'u, onaemo pu'uno Aku pumpu ira luwu pinehohawamu, ondae anu mempopandeio aroamu, moiko anu kinekewoimu maupo anu ino'aliaakomu. Aku pumpu ira inso a mpehori-horimu ka dome'ewaiko ka mesungkeo pinekaria winunimu i arodo, ranta ka domengkitao luwu kolambe-lambemu.

³⁸ Aku humukuko kana mia bitara ira beine anu mponsosabo ka anu mpo'uwu rea; Aku motiio tekuda ka mosiri-Ku ndi omue.

³⁹ Aku meweengakomu a ngkaedo ka ira mengkale-kaleo po'iangamu anu mantande ka mensolangio po'ianga pesombaamu. Ira melohulambeko, merontu ira peramba-rambamu ka mpo'ineeko kolambe-lambe.

⁴⁰ Ira mpontena asa bawaano mia umewaiko, anu ira mewunoakomu watu ka me'impahiakomu ponaido.

⁴¹ Ira mesongkoo luwuno rahamu ka medontaiakomu pohuku i arono hadio beine. Kanandiomo Kuweweuko menaa-naa mebelesu ka tambo mebelesu nahi komompowee mbo'u.

⁴² Kanatuumo Kupotiio tekuda-Ku ndi omue, onaemo ka itemonto mosiri-Ku ndi omue; ka Ku'amba momperodo ka nahi Kutekuda mbo'u.

⁴³ Hangano nahi upewowoloo mbo'u tempono umongura, sine saru luwuno andio weweu Aku tedoa tekuda, mentee ntu'u, Aku mopotembiakomu mbo'u pelelumu a ulumu, kanandiomo pau-Do Ue Ala. Kombake omue weweuo mbo'u mokoburua andio susua mbo'u inso a horino luwuno wineweumu anu mokoburu?

⁴⁴ Kitao, sompo puu mpowadi ta pauo pasinggiri andio mongkona omue: Kana ine, kanatuumo ana!

⁴⁵ Omue andio anano inemu, anu mokoburuno kumitao tamano ka luwuno ana ntamano, ka omue andio uaido akamu beine, anu mokoburudo mpongkita tamado ka luwuno ana ntamado. Inemu to Heti ka amamu to Amori.

⁴⁶ Akamu anu lalu te'aka onaemo Samaria, anu mo'ia saru luwuno anano beine te'alaako i utaramu, ka akamu anu lalu mongura onaemo Sodomo, anu mo'ia saru luwuno anano beine te'alaako i selatamu.

⁴⁷ Kombake omue tuwu montonda peleludo ka weweuo luwuno wineweudo anu mokoburu, tendeano nahi ta tehine mbo'u omue moweweu laluaopo mosa'o sekono ondae a laro luwuno ntumuwumu.

⁴⁸ A nee-Ku anu tuwu, kanandiomo pau-Do Ue Ala, menteeano Sodomo, akamu anu lalu mongura saru luwuno anano beine nahi dompoweweu kana hapa anu wineweumu saru luwuno anamu beine.

⁴⁹ Kitao, ndiomo salano Sodomo, akamu anu lalu mongura atuu: pompelangka-langkai, kaanga anu hadio ntu'u, ka sanaano tumuwu kongko ndi onae ka luwuno anano beine, sine onae nahi pontulungi mia marasai ka mongkokolaro.

⁵⁰ Ondae gagi mpompelangka-langkai ka mpoweweu mokoburu i aro-Ku onaemo ka Kutadi ira umarino Kukitao atuu.

⁵¹ Samaria nahi poweweu maupo entongano inso a luwuno halamu, tendeano omue moweweu hadioopo mokoburua sekono ondae orua ira, ranta saru luwuno mokoburua anu wineweumu, omue weweu ira akamu beine tengkita mentee.

⁵² Tembiomo mokoko'iimu, hei omue, anu moweweuako ira hukudo akamu beine monongkoopo. Saru luwuno halamu anu mokoburuopo sekono halado, ondae mentee irapo sekono omue. Po'ineeomo omue mokoko'ii, ka tembiomo mokoko'iimu, hangano omue weweu ira akamu beine tengkita mentee.”

Ondae Ue Ala mokorosoo pedandia-Do

⁵³ ”Sine, Aku momuleo teweweudo, moiko teweweuno Sodomo saru luwuno anano beine maupo teweweuno Samaria saru luwuno anano beine. Aku momuleo teweweumu i tonga-tongado,

⁵⁴ ka utembio mokoko'iimu ka mokoko'ii a luwuno wineweumu, ranta ka uweweu ira ntetarero.

⁵⁵ Ka luwuno akamu, Sodomo saru luwuno anano beine pinomule a nteweweudo amba-ambano; Samaria mbo'u saru luwuno anano beine ira mempinomule a nteweweudo amba-ambano. Omue mbo'u saru luwuno anamu beine komiu mempinomule a nteweweumiu amba-ambano.

⁵⁶ Komba Sodomoke, akamu anu lalu mongura, gagi wua wiwimu i tempono pompelangka-langkaimu,

⁵⁷ se'eluno napi teto'ori poweweumu anu mosa'o? Kombake i tempo andio dompokongkodeiko nana'ote beine to Edomi ka luwuno mia a mpehori-horino, saru mbo'u nana'ote beine to Pelisiti anu mentetewehiko inso a mpehori-horimu?

⁵⁸ Mokoburumu ka luwuno wineweumu anu mokoburu asalakono omue tumembio, kanandiomo pau-Do i Ue.

⁵⁹ Hangano, kanandiomo pau-Do Ue Ala: Aku weweuo ndi omue kana anu wineweumu mongkona pomperuanahi sumpa saru mehapuakono pedandia.

⁶⁰ Sine, Aku rumambeo pedandia-Ku saru omue i tempono umongura ka Aku mokorosoakomu pedandia anu nahina tampulaano.

⁶¹ Umarino atuu korumambeo pelelumu ka mokoko'ii i tempono Ku'ala ira akamu, anu lalu te'aka ka lalu mongura ka Ku'amba meweengako ira ndi omue gagi luwuno anamu, sine komba me'empehiako pedandia saru omue.

⁶² Aku mokorosoo pedandia-Ku saru omue. Ka omue kotumo'orio nine Ongkuemo Ue.

⁶³ Ka kanandio omue korumambeo anu i ndi'ipua ka mokoko'ii ranta ngangamu tekomu ntu'u hangano halamu, tempono kupoweweuakomu pesintuwua hangano luwuno wineweumu, kanandiomo pau-Do Ue Ala.”