Yehesikieli 14 - Wunta Mempori

Pohuku tiano anu mesomba a lahumoa 14:1-11

¹ Umarino atuu mehawe iramo ndi ongkue ba'opia mia inso a mia memota'udo to Isaraeli ka mpentoro i aroku.

² Haweomo pau-Do i Ue ndi ongkue,

³ ”Hei anano mia, mia andiodo mponsu'u lahumoado i laro aroado ka menaao i arodo watu tetidua, pepu'uano salado. Nde ira mpo'ema pontisoke ndi Ongkue?

⁴ Onaemo pu'uno, pepaumo ndi ondae ka potae: Kanandiomo pau-Do Ue Ala: Sompo mia inso a nsuku Isaraeli anu monsu'u lahumoa i laro aroano ka monaa i arono watu tetidua, pepu'uano salado, ka i'amba aiwa tepohaweakono nabi, ka Ongkue, Ue, anu sumangkio hangano lahumoano anu hadio,

⁵ ka Kupopandeio aroado suku Isaraeli, anu luwudo mentonda ira lahumoado onaemo ka domepansia inso ndi Ongkue.

⁶ Onaemo pu'uno, pauako iramo suku Isaraeli: Kanandiomo pau-Do Ue Ala: Intepidimo, impepokulemo inso a lahumoamiu ka woliliomo rupamiu inso a luwuno wineweu anu mokoburu.

⁷ Hangano sompo mia, moiko inso a nsuku Isaraeli maupo puu mpebalu-balu anu mo'ia i tonga-tongado to Isaraeli, anu pansia inso ndi Ongkue ka sumu'u ira lahumoano i laro aroano ka monaa i arono watu tetidu, pepu'uano salado, ka i'amba aiwa tepohaweakono nabi ta mo'emaakono pontiso ndi Ongkue, ka Ongkue isa'a, Ue, Aku sumangkio.

⁸ Aku umewaio mia atuu ka weweuo gagi petondoni ka pasinggiri, saru mokotampulao inso i tonga-tongado bawaa-Ku. Komiu mento'orio nine Ongkuemo Ue.

⁹ Tewala nabi atuu mo'ineeo koroino tepopandei saru mompau te'asa rupa, ka Ongkue, Ue anu popandeio nabi atuu, Aku tumandeo kae-Ku umewaio ka mokotampulao inso i tonga-tongado bawaa-Ku Isaraeli.

¹⁰ Ira mentembio salado ondaedo, moiko mia anu mo'ema pontiso maupo nabi atuu,

¹¹ ka si domepansia mbo'u suku Isaraeli inso ndi Ongkue ka nahi ka koroido nahi domengkokoburutiakono mbo'u luwuno polimpaido. Ba kanandio ira megagi bawaa-Ku ka Ongkue gagi Ue Alado; kanandiomo pau-Do Ue Ala.”

Pohuku nahi pinokompesiliako mbo'u 14:12-23

¹² Ka i'amba haweomo pau-Do i Ue ndi ongkue,

¹³ ”Hei anano mia, tewala asa wita tehalaako melelu nahi petenunu ndi Ongkue ka Ku'amba tumandeo kae-Ku umewaio saru rumopuo pepatinda kaangano ka mompotii mokoninggoa ndi onae saru mokotampulao inso i wita atuu mia ka kondehora,

¹⁴ ka maupo i tonga-tongano kongko i Noho, i Danieli, ka i Ayubi, otolu mia andio, ira mengkaduduio butu penaado ondaedo hangano menteedo, kanandiomo pau-Do Ue Ala.

¹⁵ Ke tewala Kuweweuo kondehora lambaha mpelakopi i wita atuu, anu rumopuo palilino, ranta wita atuu gagi boni-boni, ka nahina maupo te'asa mia mosia telaloio hangano kondehora lambaha atuu,

¹⁶ ka maupo i tonga-tongano kongko mia otolu hieno, a nee-Ku anu tuwu, kanandiomo pau-Do Ue Ala, nahi ira mpokadudui moiko nana'ote tama maupo nana'ote beine; butu ondae ira mengkinadudui, sine wita andio ta gagi boni-boni.

¹⁷ Ke tewala Kuwawao ponai umewaio wita atuu ka Kupepau: Hei ponai, pelakopimo a wita atuu, ka Kupokotampulao mia ka kondehora i ra'ai,

¹⁸ ka maupo i tonga-tongano kongko otolu mia hieno, a nee-Ku anu tuwu, kanandiomo pau-Do Ue Ala, nahi ira mpokadudui moiko nana'ote tama maupo nana'ote beine, sine butu ondae ira mengkinadudui.

¹⁹ Ke tewala Kupotiio haki lele i wita atuu ka umuwuo tekuda-Ku ndi onae ranta ka iwaa rea mokotampulao mia ka kondehora inso i wita atuu,

²⁰ ka maupo i Noho, i Danieli, ka i Ayubi kongko i tonga-tongano, a nee-Ku anu tuwu, kanandiomo pau-Do Ue Ala, nahi ira mpokadudui moiko nana'ote tama maupo nana'ote beine; Ira mengkaduduio butu penaado ondaedo hangano menteedo.

²¹ Menteeano, kanandiomo pau-Do Ue Ala: Laluaopo mongkokongiri mbo'u, tewala Kupotiio ponai, mokoninggoa, kondehora lambaha, ka haki lele, opaa pohuku-Ku anu mobea, i Yerusale mokotampulao mia ka kondehora i ra'ai!

²² Sine mentee ntu'u, ta tepo'ia i ra'ai mia anu tola, nana'ote tama ka beine anu winawa meluarako. Kitao, ira me'aiwa ndi omue! Komiu mengkitao peleludo ka tetarero mongkona masolaa anu Kupotiiakono Yerusale, mongkona luwuakoano anu Kupotiio ndi onae.

²³ Ira meweweu komiu ntetarero, tewala imengkitao peleludo. Komiu mento'orio nine komba hina pepu'uano Kuweweuo luwuno anu Kuweweuomo a ngkota atuu, kanandiomo pau-Do Ue Ala.”