Yehesikieli 13 - Wunta Mempori

Pohuku a luwuno nabi anu nahi mentee 13:1-16

¹ Ka i'amba haweomo pau-Do i Ue ndi ongkue,

² ”Hei anano mia, pompaumo anu ta gagi umewai ira nabido to Isaraeli, pompaumo anu ta gagi ka potaeako iramo anu pompau anu ta gagi po'eheno aroado: Rongeomo pau-Do i Ue!

³ Kanandiomo pau-Do Ue Ala: Memasola iramo nabi memonge-monge anu tumondao po'ehedo ondaedo ka nahi kitao asa pongkita.

⁴ Kana dahu mo'ila i tonga-tongano tekale-kalea, kanatuumo luwuno nabimiu' hei Isaraeli!

⁵ Omiu nahi mpewuatako a luwuno bolono rere watumiu ka nahi pompotade rere watu lumimbuo rahado to Isaraeli, ka dompokompekorahako a laro mpeteaa a oleo-Do i Ue.

⁶ Pongkitado mompopo'oo ka pompaudo anu nahi manasa ta gagi pegaupi; dompotae, ’Kanandiomo pau-Do i Ue,’ kahinaano nahi Dotena ira i Ue, ka ondae mensikorio pau atuu Do'ihiio.

⁷ Komba pongkita pompopo'ooke anu kinitamiu ka pinau anu nahi manasa ta gagi anu pinaumiu, tempono impotae, ’Kanandiomo pau-Do i Ue,’ kahinaano nahi Kupepau?

⁸ Onaemo pu'uno, kanandiomo pau-Do Ue Ala, hangano omiu mpohaweo luwuno pau pegaupi ka mpokita mongkona anu nahi mentee, ka Aku gagi ewaimiu, kanandiomo pau-Do Ue Ala.

⁹ Aku tumandeo kae-Ku umewai ira nabi anu mpongkita mongkona anu mompopo'oo ka pau ira anu ta gagi nahi mentee. Ondae nahi moiko dompewinso a laro tepumpuado bawaa-Ku ka nahi ta teburi a laro buriado suku Isaraeli, ka nahi ira mpewinso mbo'u i wita Isaraeli. Ka komiu mento'orio nine Ongkuemo Ue Ala.

¹⁰ Hangano, oo, hangano dompokontesaa ira bawaa-Ku saru mpotae, ’Rodoa!’ kahinaano nahina ntu'u rodoa; ondae atuu pompontade rere watu ka kitao, domengkapuruo,

¹¹ sine pauako iramo anu pongkapuru rere watu atuu: Usa marombo ta metii, watu seru baku ta tedonta, ka angi mokora ta mepuuri!

¹² Tewala tehoaomo rere watu atuu, nde nahi ira mpotaeke mia ndi omue: Isuaomoke kapuru anu imehahiakono atuu?

¹³ Onaemo pu'uno, kanandiomo pau-Do Ue Ala: A laro tekudano aroa-Ku Aku weweuo angi mokora mepuuri, a laro ntekuda-Ku usa marombo ta metii, ka a laro tekudano aroa-Ku watu seru baku anu mompepate ta tedonta.

¹⁴ Aku humoao rere watu anu kinapurumiu atuu ka mobangkuo a wita, ranta tengkita pondasino. Rere watuno kota atuu ta tehoa ka komiu memate i larono. Ka komiu mento'orio nine Ongkuemo Ue.

¹⁵ Kanatuumo Aku motiio tekuda-Ku a rere watu atuu ka ndi ondae anu mengkapuruo. Aku mepau ndi omue: Pokotampulaomo rere watuno ka pokotampula iramo mia anu mengkapuruo.

¹⁶ Ondae atuu nabido to Isaraeli pompau anu ta gagi mongkona Yerusale ka mengkitaako ira pongkita mongkona rodoa, kahinaano nahina rodoa, kanandiomo pau-Do Ue Ala.”

Pohuku a luwuno nabi beine anu nahi mentee 13:17-23

¹⁷ ”Omue anano mia, popokitaomo rupamu a beinedo tongkumu anu mpopau ta gagi po'eheno aroado. Pompaumo anu ta gagi umewai ira.

¹⁸ Pauo: Kanandiomo pau-Do Ue Ala: Masolaomo anu metanggoako ira koloro tinangki a luwuno pemala-malaa ka mompokona soumbu a uluno luwuno mia, mota'u ke mongura, po'ohono sumangano mia. Nde komiu mpo'oho sumangano mia anu tewinso bawaa-Ku ka mo'inee ira mia susua mentuwu tiano kineremiu?

¹⁹ Omiu melimpaio mempori-Ku i tonga-tongado bawaa-Ku butu hangano ba'opia raku jelai ba'opia mpole roti, saru mpepate ira mia anu nahi tekona mate, ka mo'inee ira mentuwu mia anu nahi tekona tuwu, a laro mongkona impegaupi a bawaa-Ku anu tetinda moronge pegaupi.

²⁰ Onaemo pu'uno, kanandiomo pau-Do Ue Ala: Aku umewai ira koloro tinangkimiu, anu pinakemiu mpo'oho sumangano mia. Aku berio inso a ngkaemiu ka motola ira mia anu me'inohomiu kana mompotola manu-manu.

²¹ Aku berio soumbumiu ka Aku motola ira bawaa-Ku inso a ngkaemiu ka ondae nahi ira megagi mbo'u kaangado a ngkaemiu. Ka komiu mento'orio nine Ongkuemo Ue.

²² Hangano omiu mpokomolemaakono pegaupi aroano mia mentee, sekono Ongkue nahi Kupokomasusao aroano, ka tendeano ipokomoteao aroano mia mosa'o gauno, onaemo ka nahi tepidi inso a mpeleluno anu mosa'o gauno atuu, ka impo'ineeo ka ituwu,

²³ onaemo pu'uno omiu nahi mengkita ira mbo'u kara-kara anu mompopo'oo ka mempau ira anu ta gagi pegaupi; Aku motola ira bawaa-Ku inso a ngkaemiu. Ka komiu mento'orio nine Ongkuemo Ue.”