Yehesikieli 12 - Wunta Mempori

I Yehesikieli pinokogagi tondonino tadiado to Isaraeli 12:1-28

¹ Ka i'amba haweomo pau-Do i Ue ndi ongkue,

² ”Hei anano mia, omue mo'ia i tonga-tongado suku mpe'ewa, anu hinao mata pongkita sine nahi pongkita ka hinao biri poronge sine nahi poronge, hangano ondae atuu suku mpe'ewa.

³ Onaemo pu'uno, omue, anano mia, patindaomo tiamu luwuno parewano asa mia tinadi ka pelempamo kana asa mia tinadi tempono meene i arono matado. Lakomo inso a mpo'iangamu kanandio-andio a mpo'ianga anu susua kana asa mia tinadi i arono matado. Bara'ura ira mpokonto'orio nine ondae atuu suku mpe'ewa.

⁴ Wawaomo luwuno parewamu atuu meluarako kana luwuno parewano asa mia tinadi tempono meene i arono matado. Omue isa'a asalakono meluarako tempono wongi i arono matado kana asa mia anu lumako a pontadia.

⁵ I arono matado weweuomo asa bolo a rere watu ka peluarakomo inso i tu'ai.

⁶ I arono matado naaomo luwuno parewamu a wawo oweamu, ka wawaomo atuu meluarako a laro wongi-wongi. Omue asalakono tumutuwio rupamu, ranta nahi upongkita wita. Hangano, Ongkue weweuko gagi tondonido suku Isaraeli.”

⁷ Ka ku'amba weweuo kana anu kupinarentaako. Kuwawao meluarako luwuno parewa tempono meene kana luwuno parewano mia tinadi ka tempono ngkiniwia kuweweuakono kaeku asa bolo a rere watu. A laro wongi-wongi ongkue meluarako ka i arono matado kunaao luwuno parewaku a wawo owea.

⁸ Tisomono haweomo pau-Do i Ue ndi ongkue,

⁹ ”Hei anano mia, kombake suku Isaraeli, suku mpe'ewa atuu, mpesikeno ndi omue: Hapake wineweumu andio?

¹⁰ Pauako iramo: Kanandiomo pau-Do Ue Ala: Pau-Do Anu Pabawa andio mongkona petewawa i Yerusale ka luwuno suku Isaraeli anu mpo'ia i ra'ai.

¹¹ Pauomo: Ongkue gagi tondonimiu. Kana anu wineweuku andio kanatuumo ta wineweu ndi ondae: gagi mia tinadi ira melako a pontadia.

¹² Petewawa anu i tonga-tongado ta numaa ira parewano a wawo oweano a laro wongi-wongi ka i'amba meluarako. Mia ta moweweu asa bolo a rere watu pesalaano ka ipokompeluarako. Onae ta tumutuwio rupano ka si pongkita wita.

¹³ Aku tuma'oo buani-Ku gagi rakoano ka i larono dampa-Ku onae ta te'uko. Aku wawao i Babeli, witado to Kasidimi, sine wita atuu nahi ta kumitao. I ra'aimo onae ta mate.

¹⁴ Luwuno anu pehori-horino, luwuno anu pompokowali ka sorodaduno, Aku sumiarawoo a luwuno mata angi ka Aku butao ponai i bungkudo.

¹⁵ Ira mento'orio nine Ongkuemo Ue, tempono Kusiarawo ira i olodo luwuno tongku ka sumiarawo ira a luwuno wita atuu.

¹⁶ Sine, asa ntia inso ndi ondae Aku motola ira inso a mponai, mokoninggoa, ka haki lele ka domentutuluo luwuno wineweudo anu mokoburu i olodo luwuno tongku, ba isua domelako. Ka ira mento'orio nine Ongkuemo Ue.”

¹⁷ Ka i'amba haweomo pau-Do i Ue ndi ongkue,

¹⁸ ”Hei anano mia, kaanomo kaangamu saru pondindi-ndidi ka inuomo uwoi saru biibi ka aroa danggara.

¹⁹ Pauomo a mpalilino wita andio: Kanandiomo pau-Do Ue Ala mongkona palilino Yerusale, i wita Isaraeli: Ira mengkaano kaangado saru aroa danggara ka me'inuo uwoi saru aroa moliro, ranta witado gagi boni-boni hangano ihino tampulaako pobobarasaia anu wineweudo luwuno anu mpo'ia i ra'ai.

²⁰ Luwuno kota anu da dompo'iangario mia ta gagi tekale-kale ka wita atuu ta gagi boni-boni; Ka ira mento'orio nine Ongkuemo Ue.”

²¹ Ka i'amba haweomo pau-Do i Ue ndi ongkue,

²² ”Hei anano mia, pasinggiri hapake atuu anu hina i olomiu i wita Isaraeli, anu unino: Kanandiomo tehineno, sine maupo te'asa pongkita nahina anu gagi?

²³ Onaemo pu'uno pauako ira: Kanandiomo pau-Do Ue Ala: Aku mokompenaa-naao pasinggiri andio ka mia nahi ta pauo mbo'u i Isaraeli. Sine, pauako iramo: Tempono umpedaomo ka sompo pongkita ta gagi.

²⁴ Hangano, nahi ta hina mbo'u pongkita anu mompopo'oo ke maupo anu mompau nahi manasa ta gagi anu mompokotesaa i tonga-tongano suku Isaraeli,

²⁵ hangano Ongkue, Ue, Aku mepau ka hapa anu pinau-Ku ta gagi, ka pau atuu nahi ta pinotulu mbo'u. Hangano, i tempono imentuwu, hei suku mpe'ewa, Aku pauo pau ka umihiio, kanandiomo pau-Do Ue Ala.”

²⁶ Ka i'amba haweomo pau-Do i Ue ndi ongkue,

²⁷ ”Hei anano mia, kitaomo, suku Isaraeli mpotae: Pongkita anu kinitano atuu, oleono da olai, pinau anu ta pinauno, tempono da tehine.

²⁸ Onaemo pu'uno, pauako iramo: Kanandiomo pau-Do Ue Ala: Nahina maupo te'asa pau-Ku ta pinotulu mbo'u. Hapa anu pinau-Ku ta gagi, kanandiomo pau-Do Ue Ala.”