Yehesikieli 11 - Wunta Mempori

Luwuno petewawa Isaraeli hinuku 11:1-13

¹ Ka i'amba Penaa-Do i Ue tumande aku ka wawa aku a mpewowa langkai i sabaano oleo Raha-Do i Ue, pewowa anu me'aro i sabaano oleo. Kitao, a mpewowa langkai atuu hinao rua pulu ka olima mia ka i olodo kukitao i Ya'asana anano i Asuri ka i Pelatia anano i Benaia, luwuno petewawa tongku.

² Pau-Do ndi ongkue, ”Hei anano mia, ondaemo andio mia anu mpontoo mosa'oa ka mporawo patudu mosa'o i kota andio,

³ anu mpotae: Kombake napi tempono tompowangu raha? Kota andio kuro ka ontae bauno.

⁴ Onaemo pu'uno pompaumo anu ta gagi ndi ondae, pompaumo anu ta gagi, hei anano mia!”

⁵ Penaa-Do i Ue pabawai aku ka Ondae i Ue mepau ndi ongkue, ”Pauomo, kanandiomo pau-Do i Ue: Omiu mpotae kanatuu, hei suku Isaraeli, ka Kuto'orio hapa anu meluarako i laro aroamiu.

⁶ Omiu pompepate kohadi-hadiono mia i kota andio ka luwuno sala bukeako wata ngkoroido.

⁷ Onaemo pu'uno, kanandiomo pau-Do Ue Ala: Luwuno mia anu pinepatemiu i kota andio, ondaemo bauno ka kota andio kurono, sine omiu Aku rumende komiu mpeluarako inso i kota andio.

⁸ Omiu medoito a mponai, sine Aku mompotii ponai ndi omiu, kanandiomo pau-Do Ue Ala.

⁹ Aku rumende komiu mpeluarako inso i kota andio ka meweengakomiu a ngkaedo mia hawe ka modontai pohuku ndi omiu.

¹⁰ Komiu ntebangkuako ponai ka iwita Isaraeli Aku humuku komiu. Ka komiu mento'orio nine Ongkuemo Ue.

¹¹ Kota andio nahi ta gagi kuromiu ke maupo omiu gagi bau i larono. A mpetidaano Isaraeli Aku humuku komiu.

¹² Komiu mento'orio nine Ongkuemo Ue. Hangano, omiu nahi mentuwu montonda luwuno pompakosi-Ku ka atora-Ku nahi meweweuo, tendeano omue weweuo luwuno atorado tongku pehori-horimiu.”

¹³ Kontongaaku mompau anu ta gagi, i Pelatia anano i Benaia mate. Ka ku'amba menggolontu mesomba ka mebooli meroku, kupotae, ”Oo, Ue Ala, nde Komiu pingko irake to Isaraeli anu da tebinta?”

Dandi mongkona pokowo'ohuno Isaraeli 11:14-25

¹⁴ Ka i'amba haweomo pau-Do i Ue ndi ongkue,

¹⁵ ”Hei anano mia, palilino Yerusale mpepau mongkona luwuno pepaekompomiu, oo luwuno pepaekompomiu, pe'etumiu ka luwuno suku Isaraeli, luwuno, ’Ondae ntedonta iramo inso ndi Ondae i Ue; ndi omamimo wita andio wineeako gagi tiamami.’

¹⁶ Onaemo pu'uno pauomo: Kanandiomo pau-Do Ue Ala: Maupo Kutadi ira olai i olodo luwuno tongku ka sumiarawo ira a luwuno wita atuu, Ongkue gagi po'ianga mempori anu kodei pengkonaano ndi ondae a luwuno wita ba isua domelako,

¹⁷ onaemo pu'uno pauomo: Kanandiomo pau-Do Ue Ala: Aku pumpu komiu inso a luwuno tongku ka Aku pumpu komiu inso a luwuno wita isua itesiarawo ka Aku weeakomiu wita Isaraeli.

¹⁸ Umarido mehawe i ra'ai, ira mpoko'olaio luwuno lahumoano ka luwuno wineweu anu mokoburu inso i wita atuu.

¹⁹ Aku moweeako ira aroa anu susua ka numaao penaa anu wo'ohu i laro aroado. Aku tumadio inso a ngkoroido aroa anu motea ka moweeako ira aroa anu metenunu.

²⁰ Kanandio ondae ira mentuwu montonda luwuno pompakosi-Ku ka mpe'ini a luwuno atora-Ku saru meweweuo. Ka ondae ira megagi bawaa-Ku ka Ongkue gagi Ue Alado.

²¹ Sine mongkona ondae, anu aroado metako a luwuno lahumoa ka luwuno wineweudo anu mokoburu, Aku dumunsiako ira peleludo a uludo, kanandiomo pau-Do Ue Ala.”

²² Luwuno kerubi atuu mentandeo panido, ka luwuno bolano melelu meronga ondae, kontongaano maramba-Do Ue Alado to Isaraeli kongko i wawodo.

²³ Ka i'amba maramba-Do Ue Ala mewuatako inso i tonga-tongano kota ka menaa-naa a wawo ntorukuno i sabaano oleo kota.

²⁴ Penaa-Do i Ue atuu tumande aku ka wawa aku mekule, a laro pongkita inso a Mpenaa-Do Ue Ala, i wita Kasidimi a luwuno mia mentinadi. Ka i'amba pongkita anu kinitaku atuu moliu inso ndi ongkue.

²⁵ Ongkue mbo'u mohaweo a luwuno mia mentinadi atuu luwuakoano anu pinopokita-Do i Ue ndi ongkue.