Yehesikieli 10 - Wunta Mempori

Maramba-Do i Ue bintao Raha Mempori

¹ Ka ku'amba kumitao, mentee ntu'u, i wawono longkuno langi anu kongko a wawo ulu, luwuno kerubi, i wawono luwuno atuu, tengkita aasa anu kana tadeno kadera poparentaa, tengkita kana paramata lasuaradi.

² Ondae mepau a mia anu mesangka lena atuu, ”Pewinsomo i totono kerubi i olono bolano ka pekungkuno kaemu buketiakono waro api inso i tonga-tongano kerubi atuu, ka i'amba rawoomo a wawo ngkota atuu.” Ondae mbo'u mewinso i arono mataku.

³ Kerubi atuudo mentade te'alaako i selatano Raha Mempori tempono mia atuu mewinsokio, ka kintala i larono bukeako seru.

⁴ Ka i'amba maramba-Do i Ue mewuatako inso i wawono kerubi te'aro i wawono montoweano pewowa Raha Mempori. Raha Mempori andio ibuketio seru atuu ka kintalano bukeako pansarino maramba-Do i Ue.

⁵ Unino panino kerubi atuu teronge hawe a kintala i bungkuno kana suara-Do Ue Ala Anu Tedoa Pabawa tempono Dopepau.

⁶ Ondae mompowee parenta a mia anu mesangka lena atuu, ”Alaomo api inso i tonga-tongano bolano, inso i tonga-tongano kerubi atuu!” Mia atuu lumakoomo mentade i horino asa inso a bolado atuu.

⁷ Ka i'amba asa kerubi atuu tumasiakono kaeno inso i tonga-tongado kerubi a api anu kongko i tonga-tongado. I'alao tedei ka numaao a laro ngkaeno mia anu mesangka lena. Mia andio tumarimao ka ilako.

⁸ A ngkerubi atuudo tengkita aasa anu kana tadeno kaeno mia i totono panido.

⁹ Kukitao, mentee ntu'u, i horido kerubi atuu hinao opaa bolano, aasa bolano i horino singge kerubi, ka bola andio tengkita kana tesangkilono paramata pirusu.

¹⁰ Opaano tengkita mpe'asa rupa, opaano mengkena, kana bola i tonga-tongano bola.

¹¹ Tewala melempa, mokompelempa ira te'aro a opaa nsala ka nahi dompewolili. Hangano, po'ianga te'aroano anu i arono, i tu'aimo pelempaano anu susuano; tempono melempa nahi dompewolili.

¹² Asa ngkoroi, bungku, kae, ka panido, saru bola bukeako mata limbu-limbu, kanatuu koa mbo'u bolado anu opaa.

¹³ Kurongeo bolano pinau ”lompiu”.

¹⁴ Singge kerubi hinao opaa rupano: rupa anu amba-ambano onaemo rupano kerubi, anu ko'orua rupano mia, anu ko'otolu rupano singa ka anu ko'opaa rupano rajawali.

¹⁵ Kerubi atuudo mewuatako i wawono. Onaemo atuu anu tuwu i ndi'ipua kukita ira i wiwi Ngkoro Kebari.

¹⁶ Tewala kerubi atuudo mpelempa, bola mbo'u atuu melempa i horido; tewala kerubi atuudo mentandeo panido ira mpenee inso a wita, bola atuu nahi pelelu inso i horido.

¹⁷ Tewala kerubi atuudo mpenaa-naa, luwuno bola mbo'u atuu menaa-naa; tewala kerubi atuudo mpewuatako i wawono, luwuno bola atuu meronga-ronga mewuatako saru ondae. Hangano, penaano anu tuwu atuudo kongko i larono luwuno bola atuu.

¹⁸ Ka i'amba maramba-Do i Ue lumako inso a montoweano pewowa Raha Mempori ka menaa-naa i wawodo kerubi.

¹⁹ Kerubi atuudo mentandeo panido, ka tempono domelako, kukita ira mpewuatako inso a wita ka luwuno bola atuu merongaako ira. Ka do'amba mpenaa-naa umpeda pewowa langkaino raha-Do i Ue anu i sabaano oleo, ka maramba-Do Ue Alado to Isaraeli kongko i wawodo.

²⁰ Onaemo atuu anu tuwu anu i ndi'ipua kukita ira i toto-Do Ue Alado to Isaraeli i wiwi Ngkoro Kebari. Kupokonto'oriomo nine ondae kerubi.

²¹ Singge hinao opaa rupano ka opaa panino. I totono panido hinao anu kana tadeno kaeno mia.

²² Rupado kana tadeno rupa anu kinitaku a wiwi Ngkoro Kebari. Singge melempa moleo lumako i arono.