YAKOBU 5 - Wunta Mempori

Pompopoto'ori a mia kaea 5:1-6

¹ Gaagi kanandio-andio hei omiu mia mengkaea, impengesemo ka mensabangiomo marasaia anu ta umalukomiu!

² Kaeamiu mobooomo ka sangkamiu ikaanomo ule-ule!

³ Wulaa ka salakamiu menta'ilasiomo, ka ta'ilasino ta gagi sakosii ndiomiu ka ta kumaano ihimiu kana api. Mpopumpu komiumo arataa a mpokotompaano tempo.

⁴ Menteeano terongeomo pebooli meroku, hangano nahi ime'owahio tambodo mia anu mensowio hasilino leremiu, ka haweomo a biri-Do Ueno luwuakoano pompemasusado anu mponsewo hasilino leremiu.

⁵ Mentuwu komiumo a laro mare'ea ka mpompemana-manangai i tolino, impotendeomo aroamiu mengkena kana a oleo ponsumbelea.

⁶ Mpohuku komiumo, tendeano mpompepate komiumo mia anu mentee ka nahi poko'ewai komiu.

Sabara a laro marasaia 5:7-11

⁷ Onaemo pu'uno, pepaekompo luwu-luwu, imensabaramo ranta a hawea-Do i Ue! Menteeano mia melere monsikori hasili anu masuli olino inso a witano ka isabara hawe ka ipetiimo usa tempo amba-ambano ka pokotompaano.

⁸ Omiu asalakono mensabara mokorosoo aroamiu hangano hawe-Do i Ue umpedaomo!

⁹ Pepaekompo luwu-luwu, si mpewuruki ka mambepokonsala, ka si mehinuku. Menteeano Puu Mpobitara mentade Iramo a mpuu pewowa.

¹⁰ Pepaekompo luwu-luwu, imentondaomo pandiri tebobarasaia ka sabarado luwuno nabi anu mpepau iramo a nee-Do i Ue.

¹¹ Menteeano kimempau ira meme'ura, onaemo andio anu mpompedato iramo; imerongeomo mongkona pompedatono i Ayubi ka imento'oriomo hapa anu poko'ariano Dopatiandaakono i Ue, hangano Ondae i Ue tedoa mompehahowa ka buke pe'aroa.

Mongkona sumpa, ka pekakai tiado mia mahaki 5:12-20

¹² Sine anu lalua, pepaekompo luwu-luwu, si mpesumpa mesakosiiako suruga maupo mesakosiiako tolino ke mesakosiiako hapamo koa anu susua. Tewala humbee, impotaemo humbee, tewala naahi impotae naahi, ka si kona komiu pohuku.

¹³ Tewala hinao asa mia i olomiu anu mompemarasai, moikoomo i pekakai! Tewala hinao asa mia anu mo'unde moikoomo i penani!

¹⁴ Tewala hiao asa mia i olomiu anu mahaki, moiko impoboi ira penatua bawaa, ka dompekakaiakono saru mehahiakono lana a nee-Do i Ue.

¹⁵ Ka pekakai anu meluarako inso a pompe'ala-ala ta kumaduduio mia mahaki atuu ka Ondae i Ue Ira wanguo; ka tewala moweweu hala, ka hala atuu ta inampuni.

¹⁶ Onaemo pu'uno ka imemambe mangakuakono halamiu ka memambe pekakaiako, ka imetompa. Pekakaino mia mentee, tewala ipe'ala-alao ntu'u ipinekakaiako, langkai ntu'u pabawano.

¹⁷ I Elia onaemo mia kana ontae, ka inso ntu'u i aroano i pekakai, ka si petii usa, ka nahi petii mbo'u usa i tolino i larono otolu nta'u ka onoo wula.

¹⁸ Ka i'amba mekakai mbo'u ka langi mompotii usa ka tolino mbo'u moluarako wuano.

¹⁹ Luwuno pepaekompo, tewala hinao i olomiu anu pansia inso a menteea ka hinao asa mia anu weweuo ka ipepokule,

²⁰ to'oriomo, nine ba isema weweuo mia tehala ka ipepokule inso a salano anu tesaa, onae ta kumaduduio sumangano mia atuu inso a matea ka hadio hala tinutuwino.