YAKOBU 4 - Wunta Mempori

Po'eheno aroa ka mesambe'eako wawontolino 4:1-10

¹ Inso isuake ka ihina teposisalaa ka pengengea i olomiu? Kombake ka ihina inso a mpo'eheno aroamiu anu mambe'ewa a laro ngkoroimiu?

² Hinao minosisiriakomiu, sine nahi imehaweo, ka i'amba mpompepate; mengkohili komiu, sine nahi mehaweo tinoomiu, ka i'amba mpengenge ka mpeluluku. Nahina hapa-hapa hinawemiu, hangano nahi impekakai.

³ Ke mpekakai komiu koa, sine nahi mpontarima hapa-hapa, hangano sala impekakai, nde anu inemamiu atuu komiu mepingkoo mpotendeo po'eheno aroamiu.

⁴ Hei omiu, mia anu nahi mpetenunu! Nahi imento'orioke, nine pesambe'ea saru wawontolino onaemo pe'iwalia saru Ondae Ue Ala? Gaagi ba isema mingki gagi sambe'eno wawontolino andio, ipokogagio koroino iwali-Do Ue Ala.

⁵ Simengko'aro-aroa, nine Wunta Mempori nahina pu'uno motae, ”Penaa anu ninaa-Do Ue Ala i laroto, Do'ineheakono mosiri!”

⁶ Sine pe'aroa, anu Doweeakita, langkaiopo sekono atuu. Onaemo pu'uno ka Dopepau, ”Ondae Ue Ala umewai ira mia anu mpompelangka-langkai, sine mehohawa ira mia anu mpe'urumako.”

⁷ Onaemo pu'uno impetuundumo ndi Ondae Ue Ala, ka ime'ewaiomo i Mosa'o, ka onae ta molai inso ndi omiu!

⁸ Ime'umpedamo ndi Ondae Ue Ala, ka Ira umpeda ndi omiu. Impokomorinaomo kaemiu, hei omiu mia ntehala! Ka impokomemporiomo aroamiu, hei omiu anu melaro orua!

⁹ Impe'o'oleakonomo urasa'omiu, mpompemasusa ka imposabangimo; pengingisimiu ime'euakonomo ponsabangi ka po'undemiu ime'euakono pompemasusa.

¹⁰ Impe'urumakomo i aro-Do i Ue, ka Ira mokomantande komiu.

Si pomposebe mia 4:11-12

¹¹ Pepaekompoku luwu-luwu, si memambeposebe! Ba isema momposebe pepaekompono ke mokonsalao, itatao songka mokonsalao; ka tewala upokonsalao songka, omue komba anu montonda songka, sine puu mpobitarano.

¹² Butu hiao aasa Anu moweweu songka ka Puu Mpobitara, onaemo Ondae anu pabawa mongkadudui ka mompepate. Sine isemake omue, ranta ka ubitarao pe'asa miamu?

Si kolupe Ira i Ue a laro posongkaa 4:13-17

¹³ Gaagi kanandio andio, hei omiu anu mpotae, ”Oleo andio ke tisomo kami mpelungka melako i kota anu, ka i ra'ai kami mpo'ia asa nta'u ka mpebalu-balu saru mpohawe ura,”

¹⁴ sine nahi imento'orio hapa anu ta gagi tisomo. Hapake pengkonaano tuwumiu? Tuwumiu atuu mengkena kana laho anu sarai koa itengkita ka i'amba moliu.

¹⁵ Menteeano omiu asalakono mpotae, ”Tewala po'ehe-Do i Ue, kami mentuwu ka meweweuo andio ka atuu.”

¹⁶ Sine kanandio-andio mpehamba-hamba komiu a laro pompelangka-langkaimiu, ka luwuno pehamba-hamba anu kanandio saala.

¹⁷ Gaagi tewala asa mia ito'orio ba kana'umpe asalakono ipoweweu moiko, sine nahi weweuo, onae tehala.