YAKOBU 3 - Wunta Mempori

Hala hangano elo 3:1-12

¹ Pepaekompoku luwu-luwu, si tehadio mia i olomiu ineheno gagi guru; hangano tomento'orio, nine gagi guru kita mebinitara montonda ponsa'u anu lalu mobea.

² Hangano luwuto mensala hadio rupa; ba isema nahina salano a mpepauno, onaemo mia soompo ntu'u, anu mokompeteao koa mbo'u asa ngkoroino.

³ Tompokonao sama a ngangano ngara, onaemo ka itondao po'eheto, hangano mesala kanandio ka tompokopabawaio mbo'u asa ngkoroino.

⁴ Ka kitaomo luwuno kapala, maupo tedoa langkai ka ileluo angi mokora, sine ipokowolilio koa ulino anu kodei ntu'u montonda po'eheno anu umuli.

⁵ Kanandio koa mbo'u elo, maupo aasa parewano koroi anu kodei, sine mokompehamba-mabaako mongkona luwuno anu langkai. Kitao, maupo kana'umpe kodeino api, ipokosongkoo tobu langkai.

⁶ Elo mbo'u onemo api; onae kana aasa wawontolino mosa'oa ka mo'ala po'ianga i olodo parewa ngkoroito kana aasa anu mokonsosa'aio asa ngkoroi ka molangao pelempano tumuwuto, sekono onae ipolangao api naraka.

⁷ Luwuno rupano kondehora mo'ila, manu-manu, saru luwuno kondehora melele ka luwuno kondehora a ntahi mempinokomonea koa ka dompokomonea iramo mia,

⁸ sine nahina maupo te'asa mia anu pabawa mokomoneao elo; onae aasa anu lambaha, anu nahi pinokompabawai, ka buke rasu anu mompepate.

⁹ Saru elo tome'unde-unde Ira i Ue, Amato; ka saru elo tomentotonaao mia anu pinokogagi montonda rupa-Do Ue Ala,

¹⁰ inso a nganga anu aasa meluarako ronso ka totonaa. Mongkona andio, pepaekompoku luwu-luwu, nahi moiko igagi kanandio.

¹¹ Hinaoke anu moluarako uwoi motewe ka uwoi mopa'i inso a mata uwoi anu aasa?

¹² Pepaekompoku luwu-luwu, hinaoke keu ara mokompewuaako wua saitu ka hinaoke keu anggoro mokompewuaako wua ara? Kanandio koa mbo'u mata uwoi mopa'i nahi pokompoluarako uwoi motewe.

Ponto'ori mentee anu inso i wawono 3:13-18

¹³ Isema i olomiu anu pande mosongka ka molino pinewowolono? Moikoomo ipokomengkaao wineweuno a gau ntumuwu anu moiko hangano ponto'ori mentee anu hiina inso a mpe'urumako.

¹⁴ Tewala mponaa-naa komiu aroa kohili ka me'o'aluakono koroimiu liomiu, si pompelangla-langkai ka si mpegaupi umewaio menteea!

¹⁵ Atuu komba ponto'ori mentee anu inso iwawono, sine inso i wawontolino, inso a mpo'eheno aroano mia, inso a onitu nsa'o.

¹⁶ Hangano ba isua hinao kohili ka me'o'aluakono koroino onaeno i tu'ai hinao marisua ka mperupa-rupa wineweu mosa'o.

¹⁷ Sine ponto'ori mentee anu inso i wawono onaemo amba-ambano molino, ka i'amba mompokosintuwu, molusa-lusa ipepau, umehe metonda, buke pe'aroa ka luwuno anu moiko, nahi po'ala-alaako ka nahi po'onde-onde.

¹⁸ Ka wua anu inso a menteea rinawo a sintuwu tiado mia anu mpompokosintuwu.