YAKOBU 2 - Wunta Mempori

Si pompesusua mia 2:1-13

¹ Luwuno pepaekompoku, kana mia anu mompe'ala-ala ndi Ondae i Yesu Kerisituu, Ueto anu maramba, pompe'ala-ala atuu si mpoweweuako anu moiko pompesusua mia.

² Hangano, tewala hinao asa mia mewinso a tepumpuamiu mesinsi wulaa ka mesangka tekosi ka ihawe mbo'u asa mia mongkokolaro i tu'ai metahu sangka,

³ ka impelangkaio mia anu mesangka tekosi atuu ka impotaeakono, ”Tabea miu ipentoro a mpo'ianga anu moiko andio!” Sine a mia anu mongkokolaro atuu impotae, ”Pentade i ra'ai!” ke, ”Pentoro a horo andio umpeda pelandaano karuku!”,

⁴ kombake mpompesusua komiumo i laro aroamiu ka mpoweweu kana puu mpobitara me'empehiako pinewowolo anu mosa'o?

⁵ Imerongeomo, hei pepaekompo luwu-luwu anu pinehohawaku! Kombake Ondae Ue Ala biniki ira mia anu pinemongkokolarono wawontolino andio ka domegagi kaea a pompe'ala-ala ka dompe'umbuo Poparentaa anu Dodandiako iramo ba isema anu mehohawa Ira?

⁶ Sine imempokongkodei iramo mia memongkokolaro. Kombake tendeano mia mengkaea anu mempokonsii komiu ka anu rumende komiu a mpebitaraa?

⁷ Komba ondaeke anu mpepaukiakono nee anu maramba, anu hangano Ondae ka imegagi mia-Do Ue Ala?

⁸ Sine, tewala impeleluakono songka anu lalu i wawono anu teburi a Wunta Mempori, ”Pehohawaomo pe'asa miamu kana koroimu,” moiko wineweumiu.

⁹ Sine, tewala pompesusua komiu mia, mpoweweu komiu hala, ka hangano songka atuu gagi mengkaa, nine mpolimpai komiu songka.

¹⁰ Hangano ba isema tumondao luwuno songka atuu, sine nahi perioo asa ntia inso ndi onae, salaomo a luwuno.

¹¹ Hangano Ondae anu pauo, ”Si ponsosabo,” Dopauo mbo'u, ”Si pompepate,” Gaagi tewala komba ponsosabo komiu sine pompepate, ka megagi komiu mbo'u anu polimpai songka.

¹² Impepaumo ka mpelelu kana mia anu ta binitara ira songka anu mompokomaradeka mia.

¹³ Hangano pebitaraa anu nahina pompehohawa ta gagi a mia anu nahi pompehohawa. Sine ta monangi pompehohawa a mpebitaraa.

Pompe'ala-ala nahina wineweu menteeano mate 2:14-26

¹⁴ Hapake tuduno, luwuno pepaekompoku, tewala asa mia motae, nine onae hinao pompe'ala-alano, kahinaano nahina wineweuno? Polioke pompe'ala-ala atuu kumaduduio?

¹⁵ Tewala aasa pepaekompo tama ke pepaekompo beine nahina sangkano ka nahi sompo kaangano sompo oleo,

¹⁶ ka asa mia inso i olomiu motae, ”Ilakomo temoiko, pokonaomo hawu mokula ka ipongkaamo ranta mowohi!”, sine nahi poweeakono hapa anu kinereno koroino, hapake tuduno atuu?

¹⁷ Kanandio koa mbo'u teweweuno pompe'ala-ala: Tewala pompe'ala-ala atuu nahi tinondaako wineweu, ka pompe'ala-ala atuu menteeano mate.

¹⁸ Sine bara'ura hinao mia motae, ”Ndi omue hinao pompe'ala-ala ka ndi ongkue hinao wineweu,” aku sumangkio, ”Popokitaakune pompe'ala-alamu atuu nahi tinondaako wineweu, ka aku mopokitaakomu pompe'ala-alaku inso a luwuno wineweuku.”

¹⁹ Upe'ala-alao, nine butu koa asa-asa-Do Ue Ala? Moiko atuu! Sine maupo onitu dompe'ala-alao koa mbo'u mongkona atuu ka mpondidi-ndidi ira.

²⁰ Hei mia anu monge-monge, behekoke mangakuakono kanandio-andio, nine pompe'ala-ala nahina wineweu onaemo pompe'ala-ala anu mooa?

²¹ Kombake i Burahima, amato, pinokomentee hangano luwuno wineweuno, tempono ipesombaakono i Saki, anano, a wawo meda pontunua pesomba?

²² Imengkitao, nine pompe'ala-ala mo'angga meronga saru luwuno wineweu ka hangano luwuno wineweu atuu pompe'ala-ala gagi soompo ntu'u.

²³ Hangano mesala kanandio inihiiomo pauno Wunta Mempori anu motae, ”Ka i'amba mompe'ala-alaomo i Burahima ndi Ondae Ue Ala, ka Ondae Ue Ala mototoiakono mongkona atuu gagi menteea.” Onaemo pu'uno i Burahima ka inineeako, ”Sambe'e-Do Ue Ala.”

²⁴ Gaagi imengkitao, nine mia pinokomentee hangano luwuno wineweuno ka komba butu hangano pompe'ala-ala.

²⁵ Ka kombake kanandio koa mbo'u i Rahabu, mia belesu atuu, pinokomentee hangano luwuno wineweuno, tempono iwuni ira mia anu tinena atuu i laro rahano, ka i'amba tumulungi ira metolahako telalo a nsala susua?

²⁶ Hangano kana koroi nahina penaano, maate, kanandio koa mbo'u pompe'ala-ala nahina wineweu, maate.