YAKOBU 1 - Wunta Mempori

Tabea 1:1

¹ Tabea inso ndi Yakobu, tetenaa-Do Ue Ala ka Ondae i Yesu Kerisituu, hawe a hopulu ka orua suku a mpelakopia.

Pompe'ala-ala ka ponto'ori anu mentee 1:2-8

² Luwuno pepaekompoku, tuduomo kana aasa me'uraa, tewala ntedonta komiu a laro mperupa-rupa po'ara-arahako,

³ hangano imento'orio, nine arahakono pompe'ala-alamiu atuu mompokohina modato aroa.

⁴ Ka po'ineeomo modato aroa atuu ka ipohawe wua anu motaha, ka imegagi soompo ka moondo ka nahina makura maupo te'asa hapamo koa.

⁵ Sine tewala i olomiu hinao anu makura ponto'ori mentee, ka ipo'ema ndi Ondae Ue Ala, – anu moweeako ira mpena luwuno mia ka nahi popowali-walio –, ka mongkona atuu Ira moweeakono.

⁶ Ka i'emao a pompe'ala-ala, ka si ntu'u inanta-nanta, hangano mia anu nanta-nanta mengkena saru bombano tahi, anu kolonto-lonto ngkoraane-ngkoramai hangano angi.

⁷ Mia anu kanandio si kolaro-laro, nine onae ta montarima hapa inso ndi Ondae i Ue.

⁸ Hangano mia anu orua laro nahi rodo a laro ntumuwuno.

Tuwu mongkokolaro ka kaea 1:9-11

⁹ Moikoomo pepaekompo anu mekongko a ntuwu mongkokolaro ka ipo'unde hangano pentoroano anu mantande,

¹⁰ ka mia kaea hangano pentoroano anu tetotoako nde onae ta moliu kana sisino ewo.

¹¹ Hangano mata oleo saba saru mokulano anu mangkara ka mokomoleuo ewo atuu, onaemo ka ironta sisino ka tetadiomo tekosino. Kanandio koa mbo'u teweweuno mia kaea; i tonga-tongano luwuno inungkeno onae ta moliu.

Po'arahakoa ka po'ara-arahako 1:12-18

¹² Me'uraomo mia anu mompetea a laro po'ara-arahako, hangano tewala ipokolaloomo po'arahako, ta tumarimao ramba-ramba ulu tuwua anu dinandi-Do Ue Ala ndi ba isema anu mehohawa Ira.

¹³ Tewala asa mia inara-arahako, si komba ipotae, ”Po'ara-arahako andio hawe inso ndi Ondae Ue Ala!” Hangano Ondae Ue Ala nahi poko'ara-arahako ira anu mosa'o, ka Ondae-Do nahi Dopo'ara-arahako maupo isema.

¹⁴ Sine sompo-sompo mia i'ara-arahakono mosisirino onaeno, hangano ipadiio ka ipaanio.

¹⁵ Ka tewala mosisiri atuu mentiaomo, onae me'anaako hala; ka te wala hala atuu langkaiomo, onae me'anaako matea.

¹⁶ Luwuno pepaekompo anu pinehohawaku, si ntepopo'oo!

¹⁷ Sompo pompowee anu moiko ka sompo pe'aroa anu soompo, inso i wawono, pinotii inso ndi Ondae Amano luwuno mewine; ndi Ondae nahina anu bali ke eo-eo hangano petobosia.

¹⁸ A mpo'ehe-Do Ondae-Do Dopokogagi kitamo a mpau menteea, ka tomegagi ana aka i olodo luwuno pinokogagi-Do a ntudano tetantui.

Anu moronge ke anu meleluakono pau-Do i Ue 1:19-27

¹⁹ Hei luwuno pepaekompo anu pinehohawaku, impewowoloomo mongkona andio: sompo mia ka imagasi koa moronge, sine ka si ronga mepau, ka si ronga mbo'u tekuda;

²⁰ hangano tekudano mia nahi po'angga menteea i aro-Do Ue Ala.

²¹ Onaemo pu'uno imentadiomo luwuakoano anu mokoburu ka anu mosa'o anu hadio ntu'u atuu ka imentarimaomo te molusa-lusa pau anu tepaho i laro aroamiu, anu pabawa kumaduduio sumangamiu.

²² Sine ka imegagimo anu meleluakono pau ka komba butu anu mporonge mpena; hangano tewala komba kanandio imempopo'oo omiu-miu koroimiu.

²³ Hangano tewala asa mia butu rumongeo mpena pau ka nahi peleluakono, onae kana asa mia anu kontongaano mepenteeo rupano anu menteeano a ntami.

²⁴ Da iaopo ikitao koroino, lumakoomo ke ronga ikolupeo ba kana'umpe rupano.

²⁵ Sine ba isema menootio songka anu soompo ntu'u, onaemo songka anu mompokomaradeka mia, ka onae mompedato i larono, gaagi komba butu rumongeo ka ikolupeo, sine mentee ntu'u ipeleluakono, onae ta me'uraako wineweuno.

²⁶ Tewala hinao te'asa mia tumuduo koroino mesomba, sine nahi pokompeteao elono, ipopo'oo koroino onaeno, ka pesombano nahina tuduno.

²⁷ Pesomba anu mempori ka anu nahina tataano i aro-Do Ue Ala, Amato, onaemo lumako te pohaweako ira elu-elu ka tuwu beine a laro masusado, ka dumagaio koroino ka si kokoburutio wawontolino.