Winali 9 - Wunta Mempori

Pepoto'oriako kasi pompelangka-langkai

¹ Imerongeomo, hei to Isaraeli! Oleo andio Kosumakio Koro Yarade, komiu mpewinso saru mpetorokio witado luwuno tongku anu lalu langkai ka lalu moroso sekono omiu, saru luwuno kota langkai anu bente pekorahakoano hawe i langi.

² Aasa tongku anu langkai ka ondau miano, to Enaki anu imento'orio ka anu mongkona ondae imerongeo dompotae mia, ”Isemake anu mokopolio umaropi ira to Enaki?”

³ Onae kai mento'orio koa a oleo andio, nine Ondae i Ue, Ue Alamiu, Ondaemo anu melempa i aromiu kana api anu mompokomo'ai. Ondae rumopu ira ka Ondae anu mokompetuundu ira i aromiu. Kanatuumo komiu ronga sumaari ira ka mepate ira, kana anu dinandi-Do i Ue ndi omiu.

⁴ Si mpotae i laro aroamiu, tewala Dosaari iramo i Ue, Ue Alamiu inso i aromiu: Hangano menteekumo ka Dowawa aku i Ue mewinso mentorokio wita andio. Kahinaano hangano koa mosa'o gaudo tongku atuudo ka Dosaari ira i Ue inso i aromiu.

⁵ Komba hangano menteemiu ke moleono aroamiu impentorokio witado. Sine hangano koa mosa'ono gaudo tongku atuu ka Dosaari ira i Ue, Ue Alamiu inso i aromiu, ka Do'ihiio i Ue dandi-Do anu pinau-Do saru sumpa ndi ondae i Burahima, i Saki ka i Yako, uempu'umiu.

⁶ Gagi imento'oriomo, nine komba hangano menteemiu Ondae i Ue, Ue Alamiu weeakomiu wita anu moiko atuu kai mpetorokio. Menteeano omiu tongku anu me'ulu watu!

Pe'ewaa i torukuno Hore

⁷ Impewowoloo koa, si mengkolupeo, nine impokotesingkaomo tekuda-Do i Ue, Ue Alamiu i pada one. Mompu'u impeluarako inso i wita Masiri ranta kai mehawe i ndi'ai, ime'ewai Ira i Ue.

⁸ I Hore ipokotesingkaomo tekuda-Do i Ue, tendeano tekuda Ira ntu'u i Ue ndi omiu, ranta Iramo rumopu komiu.

⁹ Mansaku morake i torukuno aku tumarimao watu poburia songka, watu pedandia anu wineweu-Do i Ue saru omiu, ka mo'ia aku pato pulu oleo ka pato pulu wongi tehineno i torukuno atuu. Nahi kupongkaa roti ka nahi kupo'inu uwoi.

¹⁰ Dowee aku i Ue orua watu, anu binuriako toniso-Do Ue Ala, me'ihiako luwuno pau anu pinau-Do i Ue ndi omiu i torukuno atuu inso i tonga-tongano api, a oleo tempono impepumpu.

¹¹ Laloomo pato pulu oleo ka pato pulu wongi, onae ka Dowee aku i Ue orua watu, watu buriano pedandia atuu.

¹² Ka Do'amba mepau i Ue ndi ongkue, ”Rongamo petii inso i ndi'ai, hangano tongkumu anu winawamu mpeluarako inso i wita Masiri, mosa'oomo gaudo. Ronga iramo ntu'u mepansia inso a nsala anu Kuparentaako ira. Mpoweweu iramo tinaha tinawa.”

¹³ Mepau Ira mbo'u i Ue ndi ongkue, ”Kukita iramo tongku andio ka menteeano ondaemo tongku mpe'ulu watu.

¹⁴ Po'ineemo Aku rumopu ira ka pahihio needo inso i wawontolino. Sine, omue Aku mokogagio aasa tongku anu lalu pabawa ka lalu hadio sekonopo ondae.”

¹⁵ Umarino atuu mewolili akumo, ka ku'amba metii inso i torukuno anu kontongaano melanga atuu saru orua watu buriano pedandia i orua kaeku.

¹⁶ Kukitao nine mentee ntu'u mpoweweu komiumo hala ndi Ondae i Ue, Ue Alamiu: mpoweweu komiumo asa ana nsapi tinawa. Ronga komiu mepansia inso a nsala anu Doparentaa komiu i Ue.

¹⁷ Onaemo ka ku'inio moroso ntu'u orua watu atuu, kupetadiakono inso a orua kaeku; kupehao i aromiu.

¹⁸ Umarino atuu menggolontu aku i aro-Do i Ue pato pulu oleo ka pato pulu wongi tehineno, kana anu amba-ambano; nahi kupongkaa roti ka nahi kupo'inu uwoi. Nde, tedoa komiu ntehala, mpoweweu anu mosa'o a pongkita-Do i Ue, ranta mokotesingkao tekuda-Do.

¹⁹ Hangano kudoitoakono tekuda ka mokulano tekuda-Do i Ue ndi omiu, ranta Ira mingki rumopu komiu. Sine pohona mbo'u andio Doperorongeakune i Ue.

²⁰ Ndi Haruni mbo'u tekuda Ira ntu'u i Ue, ranta Ira mingki rumopuo. Onaemo i tempo mbo'u atuu kupekakaiakono i Haruni.

²¹ Sine ana nsapi, anu mokontehala komiu, ku'alao ka kutunuo ia api, ka ku'amba rumawo-rawoo ka kugilio momoiko ranta kai motutu gagi awu. Awuno atuu kupetadiakono a ngkorono anu waa metii inso a ntorukuno.

²² I Tabera, i Masa ka i Kiberoti-Taawa, wela komiu mokontekuda Ira i Ue.

²³ Ka tempono Dotena komiu i Ue melako inso i Kadesi-Baranea ka Dopepau, ”Imelakomo ka impetorokiomo wita anu Kuweeakomiu atuu,” sine ime'ewaio pau-Do i Ue, Ue Alamiu. Nahi mpe'ala-ala Ira ka nahi mperorongeakono pau-Do.

²⁴ Tendeano ime'ewai Ira i Ue, mompu'u kuto'ori komiu.

²⁵ Onaemo ka kupenggolontu i aro-Do i Ue pato pulu oleo ka pato pulu wongi tehine, hangano mepau Iramo i Ue Ira rumopu komiu.

²⁶ Mekakai aku ndi Ondae i Ue, kupotae, ”Oo Ue Ala, siimo Iropu ira bawaa-Miu, anu Itolosiako ira langkaino pabawa-Miu ka Iwawaako ira kae-Miu anu moroso mpeluarako inso i wita Masiri.

²⁷ Ipewowolo iramo, i Burahima, i Saki ka i Yako tetenaa-Miu. Siimo Ipewowoloo moteano aroado tongku andio, gaudo anu mosa'o ka halado.

²⁸ Kasi dompotae mia inso a wita Iwawa kami mpeluarako, ’Hangano nahi Dopokowawa ira i Ue mpewinso i wita anu Dodandiako ira, ka hangano Do'o'aliaako ira, onaemo ka Dowawa ira mpeluarako ta mepate ira i pada one.’

²⁹ Kombake ondae atuu lano bawaa-Miu, anu mpelurako Iwawaako ira roso-Miu anu langkai ka saru tokia-Miu anu tetande?”