Winali 8 - Wunta Mempori

Rumambeo moiko-Do Ue Ala

¹ ”Luwuno parenta anu kupohaweakomiu a oleo andio, asalakono impetenunu meweweuo, kai mentuwu ka ntetiangi hadio ka impewinso saru mpetorokio wita anu dinandi-Do i Ue saru sumpa ndi ondae uempu'umiu.

² Impewowoloo koa luwuno pelempaa anu tinondamiu a mpo'ehe-Do i Ue, Ue Alamiu i pada one i larono pato pulu nta'u andio. Tinoo-Do weweukomiu mpe'urumako ka umara-arahako komiu ka Doto'orio hapa anu kongko i laro aroamiu, ba mpe'ini komiu koa a parenta-Do ke naahi.

³ Gagi Doweweu komiu mpe'urumako, mo'inee komiu memokoninggo ka Dopakaa komiu mana anu nahi imento'orio ka anu nahi domento'orio mbo'u uempu'umiu, Ira weweu komiu kai mento'orio, nine mia mentuwu komba butu inso a roti, sine mia mentuwu inso a luwuno anu pinau-Do i Ue.

⁴ Sangkamiu nahi gagi mosa'o a ngkoroimiu ka karumiu nahi gagi kamba i larono pato pulu nta'u andio.

⁵ Gagi asalakono kai mento'orio, nine Ondae i Ue, Ue Alamiu paguru komiu kana asa mia mompaguru anano.

⁶ Onaemo pu'uno, asalakono impe'ini a parenta-Do i Ue, Ue Alamiu, saru mentuwu montonda sala anu tiniso-Do ka saru doitoako Ira.

⁷ Hangano Dowawa komiu i Ue, Ue Alamiu mpewinso a wita anu moiko, aasa wita saru korono, mata uwoi ka rano, anu meluarako inso a luwuno lembono ka luwuno torukuno;

⁸ aasa wita saru gandu ka jelaino, saru keu anggoro, keu ara ka keu delima; aasa wita saru keu saitu ka siu hoanino;

⁹ aasa wita komiu mpokaa roti anu siimo impo'uri, isua nahi komiu memakuraako maupo hapa. Aasa wita anu watuno me'ihiako labu ka inso a ntorukunono komiu mpongkeke mala.

¹⁰ Ka komiu mpongkaa ka komiu memowohi, gagi komiu me'unde-unde Ira i Ue, Ue Alamiu, hangano wita anu Doweeakomiu atuu moiko.

Parenta kasi Dokinolupe i Ue

¹¹ Impope'inandaimo, si mengkolupe Ira i Ue, Ue Alamiu, saru nahi mpe'ini a parenta ka atora ka pompakosi-Do, anu kupohaweakomiu a oleo andio;

¹² ka tewala umari komiumo mpongkaa ka mowohi, impowangu raha anu moiko ka impo'iangario,

¹³ ka tewala sapimiu ka asa bawaa bembe bimbamiu tetiangi hadio ka wulaa saru salakamiu tetiangi hadio, ka luwuno anu hina ndi omiu tetiangi hadio,

¹⁴ si mpopelangka-langkai, ranta ka imengkolupe Ira i Ue, Ue Alamiu, anu wawa komiu mpeluarako inso i wita Masiri, inso a raha pompe'ataa,

¹⁵ ka anu wawa komiu lumaloo pada one anu malua ka mongkokongiri atuu, saru hadio ule anu lambaha saru kasi-kasi molea ka witano anu londa, nahina uwoino. Ondae anu weweuakomiu uwoi kai peluarako inso a ntorukuno watu anu motea,

¹⁶ ka anu i pada one moweeakomiu mpongkaa mana, anu nahi domento'orio uempu'umiu, ka Doweweu komiu mpe'urumako ka Do'arahako komiu, poko'ariano butu Ira moweweu moiko ndi omiu.

¹⁷ Onaemo si mpotae i laro aroamiu: Pabawaku ka rosono kaeku anu weweu aku humaweo pompolia andio.

¹⁸ Sine asalakono impewowolo Ira i Ue, Ue Alamiu, hangano Ondaemo anu moweeakomiu roso kai mpohawe pompolia, anu tinoo-Do mokorosoo pedandia anu pinau-Do saru sumpa ndi ondae uempu'umiu, kana kanandio-andio.

¹⁹ Sine tewala imengkolupe Ira ntu'u i Ue, Ue Alamiu, ka mpotonda anu pinesombai susua, mpesomba ndi onae ka mpenggolontu mpelangkaio, kupopoto'oriakomiu oleo andio, nine omiu manasa memate.

²⁰ Kana luwuno tongku anu pinepate-Do i Ue i aromiu, omiu mbo'u komiu memate, hangano nahi mebehe merongeo pau-Do i Ue, Ue Alamiu.”