Winali 7 - Wunta Mempori

Bawaa-Do i Ue ka palili i wita Kana'a

¹ Ondae i Ue, Ue Alamiu, Ira wawa komiu a wita, ba isua impewinso kai mpetorokio, ka Ira sumaario inso i aromiu hadio tongku: to Heti, to Girigasi, to Amori, to Kana'a, to Peresi, to Hewi, ka to Yebusi, opitu tongku anu lalu hadio ka moroso irapo sekono omiu.

² Tempono Ondae i Ue, Ue Alamiu, meweengako ira ndi omiu, ranta kai menangi ira, onaemo asalakono imeropu ira luwu. Si poweweu pedandia saru ondae ke mehohawa ira.

³ Sii mbo'u impekombia saru ondae: anamiu beine siimo iweeako ira ana ntamado, ke ana beinedo si me'alaako ira ana ntamamiu.

⁴ Hangano, ira meweweuo anamiu tama pansia inso ndi Ongkue, ranta ka dompesomba a anu pinesombaido susua. Ka i'amba tekuda-Do i Ue ta hawe ndi omiu ka Ira ronga rumopu komiu.

⁵ Sine kanandiomo asalakono imeweweuo ndi ondae: luwuno pontunuado pesomba impobangkuo, luwuno tugu lahumoado imerawoo, luwuno karuno lahumoado imekansa-kansao, ka luwuno tinaha pesombaado imentunuo kai pingko.

⁶ Hangano omiumo bawaa-Do i Ue, Ue Alamiu anu mempori. Omiumo anu bininiki-Do i Ue, Ue Alamiu inso a luwuno tongku i wawontolino kai megagi bawaa pinehoha-Do.

⁷ Komba hangano doamiu lalu hadio inso a tongku isuamo koa, aroa-Do i Ue tepadii ndi omiu ka dobiniki komiu. Kombake omiu andio anu lalu kodei inso a luwuno tongku?

⁸ Sine hangano Dopehohawa komiu i Ue ka Do'inio sumpa anu Dopauomo ndi ondae uempu'umiu, Dowawa komiumo i Ue mpeluarako saru kae-Do anu moroso ka tumolosi komiu inso a mpo'ianga tepe'ataa, inso a ngkaeno i Pirao, mokole i wita Masiri.

⁹ Onaemo pu'uno asalakono kai mento'orio, nine Ondae i Ue, Ue Alamiu, Ondaemo Ue Ala, Ue Ala anu metenunu, anu me'ini a mpedandia ka pompehohawa a mia anu mehohawa Ira ka uminio parenta-Do, hawe asa nsowu inule.

¹⁰ Sine a mia anu umo'aliaako Ira, Ondae mombaloako pompepate ndi ondae. Nahi Doponaa-naa ka Doweweuo pombaloa a mia anu umo'aliaako Ira.

¹¹ Gagi, asalakono impe'ini a parenta, onaemo pompakosi ka atora anu kupohaweakomiu a oleo andio kai wineweu.

Dandi poronso

¹² Tewala imerongeo luwuno atora atuu, impe'ini ndi onae, ka imeweweuo, gagi ndi omiu, Ondae i Ue, Ue Alamiu, Ira me'ini a mpedandia ka pompehohawa anu pinau-Do saru sumpa ndi ondae uempu'umiu.

¹³ Ira mehohawa komiu, rumonso komiu, ka mokohadio komiu. Ira rumonsoo inulemiu ka hasilino witamiu, gandu ka anggoro saru lanamiu, ana nsapimiu, ka asa bawaa ana bembe bimbamiu, i wita anu dinandi-Do saru sumpa ndi ondae uempu'umiu Ira weeakomiu.

¹⁴ Komiu merinonso lalua sekono luwuno tongku: nahi ta hina tama ke beine anu biita i olomiu, ke i olono pinotuwumiu.

¹⁵ Ondae i Ue Ira moko'olaio luwuno haki inso ndi omiu. Nahina maupo te'asa haki lele anu tino'orimiu i wita Masiri atuu ta pinotii ndi omiu, sine Ira motiio a mia anu umo'aliaako Ira.

¹⁶ Asalakono imeropu ira luwuno tongku anu Doweeakomiu i Ue, Ue Alamiu. Si mpehohawa ira, kasi mpesomba a anu pinesombaido, hangano anu kanatuu ta gagi ohomiu.

¹⁷ Bara'ura komiu mpotae i laro aroamiu, ”Luwuno tongku andio hadio irapo sekono ongkue, kana'umpe aku mokosaari ira?”

¹⁸ Sine si medoitoako ira. Impewowoloo koa mpiha hapa anu wineweu-Do i Ue, Ue Alamiu ndi Pirao ka luwuno wita Masiri.

¹⁹ Imengkitaakonomo matamiu luwuno po'ara-arahako langkai, luwuno petondoni ka anu mengkinohali-haliako, kae anu moroso ka tokia tetande anu pinake-Do i Ue, Ue Alamiu, wawa komiu mpeluarako. Kanatuumo mbo'u Ira weweuo i Ue, Ue Alamiu a luwuno tongku anu dinoitoakomiu.

²⁰ Ondae mbo'u i Ue, Ue Alamiu Ira mompotola hoani lambaha sumapoi ira, ranta ka ipingko mate luwuno mia anu da tebinta anu mpewuni inso i aromiu.

²¹ Siimo udoitoako ira, nde Ondae i Ue, Ue Alamu, kongko itonga-tonga miu, Ue Ala anu langkai ka mongkokongiri.

²² Ondae i Ue, Ue Alamiu, anu sumaari ira luwuno tongku andio ntededei inso i aromiu. Nahi komiu me'ineheako ronga mepate ira, kasi gagi hadiopo kondehora mo'ila sekono omiu.

²³ Kanatuumo Dopeweengako ira i Ue, Ue Alamiu ndi omiu ka Dopokomarisu ira, ranta ka domeropu.

²⁴ Luwuno mokoledo ira mempineweengako a ngkaemiu ka needo komiu mempahihio inso i wawontolino. Nahi ta hina anu polio mekorahako umaropi komiu, ranta ka imeropu ira.

²⁵ Luwuno tinaha anu pinesombaido asalakono imentunuo luwu. Si monsisiriakono salaka ke wulaa anu hina ndi ondae ka si me'alao tiano koroimiu, kasi mente'ohoako onae, hangano mongkona atuu onaemo mokoburu-Do i Ue, Ue Alamiu.

²⁶ Osi'i mbo'u impowawa te'aasa anu mokoburu mewinso a laro rahamiu, ranta omiu mbo'u rinopu kanatuu. Asalakono mentee ntu'u ime'o'aliaakono ka mokoburuakono mongkona atuu, hangano luwuno atuu pinesusua ta pinokotampula.