Winali 6 - Wunta Mempori

Parenta anu laluaopo

¹ Ndiomo parenta, onaemo pompakosi ka atora, anu aku paguruakomiu a parenta-Do i Ue, Ue Alamiu, kai wineweu i wita, ba isua imelako komiu mpetorokio.

² Gagi kanandio, asa ntinuwumiu, omiu ka inulemiu imedoitoako Ira i Ue, Ue Alamiu, saru mpe'ini a luwuno pompakosi ka parenta-Do anu kupohaweakomiu, ka ta melai tinuwumiu.

³ Onae kai merongeomo, hei to Isaraeli! Impetenunumo meweweuo atuu, kai moiko tumuwumiu, ka kai megagi hadio ntu'u, kana anu Dodandiakomiu i Ue, Ue Alado uempu'umiu, i asa wita anu hadio ntu'u susu ka siu hoanino.

⁴ Imerongeomo, hei to Isaraeli: Ondaemo i Ue, Ue Alato, Ondae i Ue atuu aasa!

⁵ Pehohawa Iramo i Ue, Ue Alamu, saru tompaano aroamu ka saru tompaano sumangamu ka saru tompaano rosomu.

⁶ Hapa anu kuparentaa komiu a oleo andio, asalakono impekokoongakono.

⁷ Asalakono temararu imempaguruako ira anamiu ka impopauo tempono impentoro i rahamiu ke kontongaano a laro pelempaa, tempono impepombole ke mpewangu.

⁸ Asalakono impetanggoakono gagi petondoni a ngkaemiu ka mempokogagio petondoni i ra'imiu.

⁹ Asalakono imeburio a ngkaruno pewowa rahamiu ka a mpewowa langkai kotamiu.

Moiko-Do i Ue ka parenta mpetenunu

¹⁰ Ondae i Ue, Ue Alamiu, Ira wawa komiu mpewinso a wita anu dinandi-Do saru sumpa ndi Burahima, ndi Saki ka ndi Yako, uempu'umiu, ta pineweengako ndi omiu: wita saru luwuno kotano anu langkai ka moiko, anu nahi mewanguo.

¹¹ Luwuno raha bukeako luwuno sangka anu moiko anu komba omiu me'ihiio; luwuno sumuru anu komba omiu mengkekeo; luwuno mbo'u lere anggoro ka lere saitu anu komba omiu mempahoo. Tewala atuu gagi, ka impongkaa saru gagi mowohi,

¹² onaemo ka impope'inandaimo kasi mengkolupe Ira i Ue, anu wawa komiu mpeluarako inso i wita Masiri, inso a ntepe'ataa.

¹³ Asalakono imedoitoako Ira i Ue, Ue Alamiu. Asalakono ndi Ondaemo impesomba ka asalakono impesumpa a nee-Do.

¹⁴ Si mpotonda anu pinesombai susua, inso i olono anu pinesombaido luwuno tongku petengi-tengimiu,

¹⁵ hangano Ondae i Ue, Ue Alamiu, Ondaemo Ue Ala anu mosiri i tonga-tongamiu. Kasi mansa tekuda-Do i Ue, Ue Alamiu haweako ndi omiu, ranta ka Doropu komiu inso i wawontolino.

¹⁶ Si me'ara-arahako Ira i Ue, Ue Alamiu, kana ime'ara-arahako Ira i Masa.

¹⁷ Asalakono tementee ntu'u impe'ini a parenta-Do i Ue, Ue Alamiu, a mpepopoto'ori ka pompakosi anu Doparentaa komiu.

¹⁸ Asalakono imeweweuo hapa anu mentee ka moiko a pongkita-Do i Ue, kai moiko tumuwumiu ka impewinsokio saru mpetorokio wita anu moiko, anu dinandi-Do i Ue saru sumpa ndi ondae uempu'umiu,

¹⁹ saru sumaari ira luwuno iwalimiu inso i aromiu, kana anu pinau-Do i Ue.

²⁰ Tewala lembuino anamiu mpesikeno ndi omiu, ”Hapa pengkonaano pepopoto'ori, pompakosi, ka atora anu Doparentaa komiu i Ue, Ue Alato?”

²¹ Asalakono imesangki ira anamiu atuu, ”Ontae i ndi'ipua atano i Pirao i wita Masiri, sine saru kae-Do anu moroso, Ondae i Ue wawa kita mpeluarako inso i wita Masiri.

²² Ondae i Ue moweweu luwuno petondoni ka anu mengkinohali-haliako, anu langkai ka sumolangi ira to Masiri, i Pirao ka luwuno ihino rahano, tomengkitaakono matato.

²³ Sine, Dowawa kita mpeluarako inso i ra'ai, ka Dowawa kita mpewinso Ira weeakita wita anu Dodandiomo saru sumpa ndi ondae uempu'uto.

²⁴ Ondae i Ue parenta kita ka tomeweweuo luwuno pompakosi atuu ka doitoako Ira i Ue, Ue Alato, ka imoiko mpiha tumuwuto ka Dopo'inee kita tuwu, kana oleo andio.

²⁵ Kita megagi mentee, tewala mpetenunu kita meweweuo luwuno parenta atuu i aro-Do i Ue, Ue Alato, kana anu Doparentaa kita.”