Winali 5 - Wunta Mempori

Songka Hopulu

¹ I Musa moboi ira luwu to Isaraeli mpepumpu ka ipotaeako ira, ”Imerongeomo, hei to Isaraeli, pompakosi ka atora anu kupohaweakomiu a oleo andio, kai mpepaguruakono ka mpetenunu meweweuo.

² Ondae i Ue, Ue Alato Dowutuomo pedandia saru ontae i Torukuno Hore.

³ Komba saru ondae uempu'uto Dowutuo i Ue pedandia atuu, sine saru ontae, ontae anu mekongko i ndi'ai a oleo andio, ontae luwuto anu da mentuwu.

⁴ Ondae i Ue mepau saru omiu tepo'aro rupa i torukuno inso a ntonga-tongano api.

⁵ Kanandiomo i tempo atuu mentade aku i olono Ondae i Ue ka omiu ka mompauakomiu pau-Do i Ue, hangano imedoitoakono api ka omiu nahi mpewuatako a ntorukuno. Mepau Ira:

⁶ ’Ongkuemo Ue, Ue Alamiu anu wawa komiu mpeluarako inso i wita Masiri, inso a mpo'ianga tepe'ataa.

⁷ Si hina ndi omiu ue ala susua i aro-Ku.

⁸ Si mpoweweu tinaha tiamiu maupo kana hapa anu kongko i langi i wawono, ke anu kongko i tolino i totono, ke anu kongko a laro uwoi i totono tolino.

⁹ Si mpenggolontu mpelangkaio ke mpesomba ndi onae, hangano Ongkue Ue, Ue Alamiu, onaemo Ue Ala anu monsiri, anu mombalo salano ama a luwuno anano hawe a inuleno ko'otolu ka ko'opaa inso a luwuno mia anu umo'aliaaKune.

¹⁰ Sine, Aku mopokitao pompehohawa pokongkomi a sowu-sowuno mia, ndi ondae anu mehohawa Aku ka me'ini a luwuno parenta-Ku.

¹¹ Si pauo nee-Do i Ue, Ue Alamiu, nahi pototono, hangano Ondae i Ue Ira mokonsalao mia anu nahi pototono pauo nee-Do.

¹² Pekakaakono ka pokomemporio oleo Saba, kana anu Doparentaa komiu i Ue, Ue Alamiu.

¹³ Onoo oleo tehineno komiu mpo'angga ka meweweuo luwuno anggaamiu.

¹⁴ Sine oleo ko'opitu, onaemo oleo Saba-Do i Ue, Ue Alamiu. Si mpoweweu anggaa hapamo koa, omiu, anamiu tama ke beine, atamiu tama ke beine, sapimiu ke kalidemiu, luwuno pinotuwumiu, ke maupo mia hawe i laro kotamiu, ka dompenaa-naa atamiu tama ka beine kana omiu mbo'u.

¹⁵ Asalakono impewowoloo nine omiu i ndi'ipua ata koa mbo'u i wita Masiri ka Dowawa komiu i Ue, Ue Alamiu mpeluarako inso i ra'ai saru kae moroso ka tokia tetande. Onaemo pu'uno, Ondae iUe, Ue Alamiu parenta komiu mpelangkaio oleo Saba.

¹⁶ Pelangkai ira amamu ka inemu, kana anu Doparentaa komiu i Ue, Ue Alamiu, ka imelai tinuwumiu ka moiko tumuwumiu i wita anu Doweeakomiu i Ue, Ue Alamiu.

¹⁷ Si pompepate.

¹⁸ Si ponsosabo.

¹⁹ Si ponako.

²⁰ Si pesakosii a mpe'asa miamu gagi sakosii megaupi.

²¹ Si monsisiriakono kombiano pe'asa miamu. Si monsisiriakono rahano ke lereno, atano tama ke beine, sapino ke kalideno, ke maupo hapa anuno pe'asa miamu.’

²² Pau atuumo anu pinau-Do i Ue saru pau meroku i torukuno a luwuno bawaamiu, inso a ntonga-tongano api, seru ka wongi-wongia. Nahi Dotiangiakono maupo hapa mbo'u. Ka Do'amba burio a orua watu buriano songka ka Dopeweengakono ndi ongkue.”

Ondae i Ue mepau molalo i Musa

²³ Tempono imerongeo pau atuu inso i tonga-tongano wongi mpusu, kontongaano torukuno atuu melanga, omiu ka luwuno petewawa sukumiu ka mia memota'umiu me'umpedaakune.

²⁴ Mpotae komiu, ”Menteeano Ondae i Ue, Ue Alato, Dopopokitaaomo ndi ontae maramba ka langkaino pabawa-Do, ka suara-Do tomerongeomo inso i tonga-tongano api. A oleo andio kimengkitaomo, nine Ondae Ue Ala mepau saru mia ka mia atuu kongko tuwu.

²⁵ Ka i'amba kanandio-andio, tembio ka kami memate? Hangano api anu langkai andio ta mokomo'ai kami. Tewala kimerongeo tehine mbo'u suara-Do i Ue, Ue Alato, kami memate.

²⁶ Hangano anu hinao penaano isuake anu rumongeomo suara-Do Ue Ala anu tuwu, anu mepau inso i tonga-tongano api, kana omami andio ka kongko tuwu?

²⁷ Kanandio omue, perangkuhimo ka rongeomo luwuno anu pinau-Do i Ue, Ue Alato. Omuemo koa anu mohaweo ndi omami luwuno anu pinau-Do i Ue, Ue Alato ndi omue, manasa kami merongeo ka meweweuo.”

²⁸ Mansa-Do rumongeo i Ue pinaumiu atuu, kontongaamiu mempauo ndi ongkue, mepau Iramo i Ue ndi ongkue, ”Kurongeomo paudo tongku andio anu pinaudo ndi omue. Luwuno anu pinaudo atuu moiko.

²⁹ Po'ineeomo aroado kai kanandio mpiha: doito ndi Ongkue ka mpe'ini a luwuno parenta-Ku, ka imoiko tuwudo ka inuledo anu nahina tampulaano!

³⁰ Lakomo, pauako iramo, ’Impekulemo a ngkemamiu.’

³¹ Sine omue, pentademo i ndi'ai saru Ongkue. Aku pauakomu luwuno parenta, onaemo pompakosi ka atora anu asalakono kau paguruako ira, ka domeweweuo i wita anu Kuweeako ira ka dompe'ueo.”

³² Gagi, Impetenunumo meweweuo luwuno atuu, kana anu Doparentaa komiu i Ue, Ue Alamiu. Si mepansia i koana ke i manggali.

³³ Luwuno sala anu Doparentaa komiu i Ue, Ue Alamiu, asalakono imentondao, ka imentuwu ka moiko tumuwumiu saru melai tinuwumiu i wita anu komiu mpetorokio.