Winali 4 - Wunta Mempori

Patudu ka dompekariao songka-Do Ue Ala

¹ ”Kanandio-andio, hei to Isaraeli, imerongeomo pompakosi ka atora anu kupaguruakomiu kai wineweu, kai mentuwu ka kai mpewinso saru mpetorokio wita anu Doweeakomiu i Ue, Ue Alado uempu'umiu.

² Si mentiangio hapa anu kuparentaa komiu ka si mengkurangio, tendeano impe'inimo a luwuno parenta-Do i Ue, Ue Alamiu, anu kupohaweakomiu.

³ Ukitaakonomo matamu hapa anu wineweu-Do i Ue a Baala-Peori. Hangano, luwuno mia anu tumondao Baala-Peori umariomo Doropu ira i Ue, Ue Alamiu inso i tonga-tongamiu,

⁴ sekono omiu anu mpe'ini ndi Ondae i Ue, Ue Alamiu da mentuwu a oleo andio.

⁵ Impewowoloomo, kupaguruakomiumo pompakosi ka atora, kana anu Doparentaakune i Ue, Ue Alaku, kai meweweuo kanandio i wita, anu komiu mpewinsokio kai mpetorokio.

⁶ Impetenunumo meweweuo atuu, hangano onaemo atuu anu ta gagi ponto'orimiu ka mpopewowolo a pongkitado luwuno tongku. Tewala rumongeo luwuno pompakosi andio ira mpotae, ”Lano tongku anu langkai andio, ondaemo bawaa anu mponto'orimiu ka mpopewowolo”

⁷ Hangano, tongku langkai isuake anu hinao ue alano anu kanandio umpeda ndi onae kana Ondae i Ue, Ue Alato, sompo tempo tompebooli ndi Ondae?

⁸ Tongku langkai isuake anu hinao pompakosi ka atora moleo kanandio kana luwuno songka andio, anu kupohaweakomiu oleo andio?

⁹ Sine impetangkoromo ka impompe'inandai mpiha, kasi mengkolupeo luwuakoano anu kinitano matamiu atuu, ka kasi tetadi luwuno atuu inso a mpinewowolomiu asa ntinuwumiu. Pauako iramo luwuno atuu a anamiu ka ana uemiu.

¹⁰ Oleo atuu mpentade komiu i aro-Do i Ue, Ue Alamiu i Torukuno Hore, ka Ondae i Ue mepau ndi ongkue, ”Tena iramo tongku atuu mpepumpu ndi Ongkue. Aku moporongeako ira luwuno pau-Ku, ranta ka domedoito ndi Ongkue asa ntinuwudo i wawontolino ka paguruako ira anado kanandio.”

¹¹ Omiu mbo'u mperangkuhako ka mpentade a mpu'uno torukuno atuu, kontongaano torukuno atuu melanga hawe a mpuheno langi a laro wongi mpusu, seru, ka wongi-wongiano.

¹² Ka Do'amba i Ue mepau ndi ongkue inso a ntonga-tongano api. Suara anu mepau imerongeo, sine nahina rupa anu kinitamiu; butu hinao suara.

¹³ Dopauakomiu pedandia anu Doparentaa komiu kai wineweu, kana Songka Hopulu, ka Doburio a orua watu buriano songka.

¹⁴ I tempo atuu Doparenta aku i Ue ka kupaguruakomiu pompakosi ka atora, kai meweweuo i wita ba isua imelako kai mpetorokio.

¹⁵ Nahi mpokita hapamokoa i oleo Dopepau i Ue ndi omiu i Torukuno Hore inso a ntonga-tongano api. Onaemo pu'uno, imedagaio ntu'u koroimiu,

¹⁶ kasi mpogau mokoburu saru mpoweweu tinaha anu kana lahumoa hapamo koa: ke merupa tama ke beine;

¹⁷ tadeno kana kondehora anu i tolino ke manu-manu mepani anu menee i laro meene.

¹⁸ Tadeno kana kondehora anu melele i wawontolino ke bou anu mo'ia a laro uwoi i totono tolino.

¹⁹ Tewala mengkitako mbo'u i langi, kumitao mata'oleo, wula ka anano wula, luwuno sorodadu i langi, si ntepopandei kai mpenggolontu mpelangkaio ka impesomba a luwuno atuu. Tendeano Ondae i Ue, Ue Alamiu meweengakono luwuno tongku i wawontolino gagi tiado.

²⁰ Sine, Do'ala komiumo i Ue ka imewinawa mpeluarako inso i wita Masiri, inso a awu pompokolonoa labu, kai megagi bawaa-Do, kana anu gagi kanandio-andio.

²¹ Ka Do'amba i Ue gagi tekuda ndi ongkue hangano omiu ka mesumpa nine nahi aku sumakio Koro Yarade ka nahi aku mewinso a wita anu moiko anu Doweeakomiu i Ue, Ue Alamiu, gagi pusakamiu.

²² Mentee, aku mate i wita andio ka nahi aku sumakio Koro Yarade, sine komiu mensakio ka mpetorokio wita anu moiko atuu.

²³ Impope'inandaimo, kasi mengkolupeo pedandia-Do iUe, Ue Alamiu anu wineweu-Do saru omiu, ka impoweweu tinaha kana hapamo koa anu inonto-Do i Ue, Ue Alamiu.

²⁴ Hangano, Ondae i Ue, Ue Alamiu, onaemo api anu mompokomo'ai, Ondae Ue Ala anu monsiri.

²⁵ Tewala mpe'ana ue komiu ka gagi mota'u i wita atuu, ka impogau mokoburu mpoweweu tinaha kana hapamo koa ka mpoweweu hapa anu mosa'o a pongkita-Do i Ue, Ue Alamiu, komiu mokontekuda Ira.

²⁶ Onaemo aku moboio langi ka tolino gagi sakosii ndi omiu a oleo andio nine manasaomo komiu ronga memoliu inso a wita anu ta pinentoroki miu umari mensakio Koro Yarade. Nahi ta tehine imentuwu i ra'ai, sine manasaomo komiu meropu.

²⁷ Ondae i Ue Ira tumia-tia komiu i olodo luwuno tongku, ka butu tedei komiu impo'ia i olodo luwuno tongku, ba isua Doliahako komiu i Ue.

²⁸ I ra'ai komiu mpesomba a luwuno ue ala wineweuno kaeno mia, inso a ngkeu ka watu, anu nahi pokompongkita ke moronge, nahi pokompongkaa ke mowoo.

²⁹ Sine maupo i ra'ai komiu umungke Ira i Ue, Ue Alamiu ka komiu humawe Ira, polo ka ime'ungke Ira tompaano aroamiu ka tompaano sumangamiu.

³⁰ Tewala lembuino omiu a laro masukaraa ka luwuno anu andio umalu komiu, onae kai mpepokule ndi Ondae i Ue, Ue Alamiu, ka mperorongeakono suara-Do.

³¹ Hangano Ondae i Ue, Ue Alamiu, Ondaemo Ue Ala puu Pompehohawa. Nahi Ira binta komiuke rumopu komiu; Nahi Ira kumolupeo pedandia anu pinau-Do saru sumpa ndi ondae uempu'umiu.

³² Kanandio-andio impo'arahakomo mpesikeno mongkona tuwua nse'elu, anu hina se'eluno omiu, mompu'u Dopokogagio Ue Ala mia i wawontolino. Pesikenoakono inso i tompano langi ka hawe i tompano langi: Nde horio gagike mongkona anu langkai kanandio, horio terongeke aasa kanatuu?

³³ Horiokoake aasa tongku moronge suarano ue ala anu mepau inso a ntonga-tongano api, kana anu rinongemiu ka kongko tuwu?

³⁴ Horiokoake aasa ue ala mo'arahako aiwa ta mo'ala tiano aasa tongku inso i tonga-tongano tongku anu susua a mperupa-rupa po'arahako, petondoni, wineweu kinohali-haliako, ka peteaa, ka kae anu moroso ka tokia tetande, saru luwuno mongkokongiria langkai, kana anu wineweu-Do i Ue, Ue Alamiu ndi omiu i wita Masiri, i arono matamiu?

³⁵ Luwuno atuu pinopokita ndi omiu kai mento'orio nine Ondaemo i Ue, Ue Ala, nahina anu susua sangkadio Ondae.

³⁶ Inso i langi Dopoporongeo pau-Do ndi omiu anu paguru komiu; i tolino Dopopokitao ndi omiu api-Do anu langkai, ka pinau-Do imerongeo inso a ntonga-tongano api.

³⁷ Hangano Dopehohawa ira uempu'umiu ka Dobinikio inuledo, saru roso-Do anu langkai Ondae-Do wawa komiu mpeluarako inso i wita Masiri.

³⁸ Ira sumaario inso i aromiu luwuno tongku anu lalu langkai ka moroso sekono omiu ka Dowawa komiu mpewinso a witado ka meweengakono ndi omiu gagi pusakamiu, kana anu gagi kanandio-andio.

³⁹ Onaemo pu'uno imento'oriomo a oleo andio ka impekokoongakono, nine Ondaemo i Ue, Ue Ala anu i langi i wawono ka i tolino i totono, nahina anu susua.

⁴⁰ Impe'inimo a pompakosi ka parenta-Do anu kupohaweakomiu a oleo andio, kai moiko tumuwumiu ka inulemiu lembuino, ka kai melai tinuwumiu i wita anu Doweeakomiu iUe, Ue Alamiu ranta nahina tampulaano.”

Luwuno kota pekaduduia i asatowano Yarade

⁴¹ Ka i'amba i Musa mesusuao otolu kota i asatowano Koro Yarade, i sabaano oleo,

⁴² kai mia anu mompepate pe'asa miano nahi pe'inungakono ka nahi o'aliaakono se'eluno, mokompolai i ra'ai. Tewala onae molai i asa kota atuu, ta kongko tuwu.

⁴³ Luwuno kota atuu, onaemo: Beseri i pada one, i wita mantandeano, tiado to Rube; Ramoti i Gileadi tiado to Gadi. Ka Golani i Basani tiado to Manase.

Pompohawea songka Taura

⁴⁴ Ndiomo songka Taura anu pinohaweno i Musa a nto Isaraeli.

⁴⁵ Ndiomo pepopoto'ori, pompakosi, ka atora anu pinohaweno i Musa a nto Isaraeli, a laro pelempaado mpeluarako inso i wita Masiri,

⁴⁶ i asatowano Koro Yarade, i lembono tepo'aro saru Beti-Peori, i witano i Sihoni, mokoledo to Amori anu mo'ia i Hesiboni. Onae inangio i Musa ka to Isaraeli a laro pelempaado mpeluarako inso i wita Masiri.

⁴⁷ Dompetorokio witano ka witano i Ogo, mokole i wita Basani. Orua ira mokoledo to Amori i asatowano Koro Yarade, i sabaano oleo.

⁴⁸ Wita pinebawai atuu mompu'u inso i Aro'eri, i wiwi Ngkoro Mo'are Aranoni, hawe a Ntorukuno Sirioni, onaemo atuu Torukuno Heremoni,

⁴⁹ saru luwuno lembono i asatowano Koro Yarade, i sabaano oleo, hawe i Tahi Araba, a mpuu Torukuno Pisiga.