Winali 34 - Wunta Mempori

Mateano i Musa

¹ Ka i'amba i Musa mewuatako inso i lembono Moabi, motilaloi wawono torukuno Nebo, a punsuno Pisiga, anu i asambalino Yeriko. Ka i'amba Ondae i Ue mopokitaakono luwuno wita atuu; wita Gileadi hawe i kota Dani,

² luwuno Napatali, wita Eparai, ka Manase, luwuno wita Yehuda hawe i tahi i somooano oleo,

³ wita Nege, ka Lembono Yarade, lembono Yeriko, kota keu kuruma atuu, hawe i Soare.

⁴ Mepau Iramo i Ue ndi onae, ”Onaemo andio wita anu Kudandiakono sumpa ndi Burahima, ndi Saki, ka ndi Yako, kanandio: ’A inulemiumo Aku weengakono wita atuu.’ Kupo'ineeko kumitaakono matamu, sine nahi komesakiako raane.”

⁵ Ka i'amba i Musa tetenaa-Do i Ue atuu mate I ra'ai, i wita Moabi, menunu saru pau-Do i Ue.

⁶ Dokaburuo i aasa lembono i wita Moabi tepo'aro saru Beti-Peori, ka nahina mia anu tumo'orio kaburuno hawe a oleo andio.

⁷ Tinuwuno i Musa asa etu rua pulu nta'u tempono kai mate. Matano napi morawu ka roso napi tetadi.

⁸ To Isaraeli mensabangio i Musa i lembono Moabi i larono tolu pulu oleo. Ka i'amba tampulaomo oleo ponsabangia ka masusaakono i Musa.

⁹ Ndiomo i Yosua anano i Nuni bukeako penaa ponto'ori, hangano i Musa umari numaao kaeno i wawono. To Isaraeli mperorongeakono ka meweweuo kana peparenta-Do i Ue ndi Musa.

¹⁰ Nami hina mbo'u nabi anu mentade i olodo to Isarali kana i Musa anu tino'ori-Do i Ue tepopo'aro rupa;

¹¹ i larono luwuno petondoni ka anu kinohali-haliako, anu wineweuno a parenta-Do i Ue i wita Masiri ndi Pirao, luwuno pegawaino, ka luwuno witano

¹² luwuakoano mbo'u peleluno i Musa bukeako pabawa, ka wineweuno anu mongkokongiri i arodo luwuno to Isaraeli.