Winali 33 - Wunta Mempori

Poronsono i Musa a luwuno suku Isaraeli

¹ Ndiomo ronso anu iweeako ira i Musa, tetenaa-Do Ue Ala atuu, a nto Isaraeli se'eluno imate.

² Ipotae, ”Ondae i Ue aiwa inso i Sinai ka mesabaako ndi ondae i Seiri, Mewanta inso a torukuno Parani. Aiwa Ira meronga saru bawaa mempori mapasowu-sowu hadiono; i koana-Do tengkita ndi ondae api anu melanga.

³ Mentee ntu'u Dopehohawa ira bawaa-Do, luwuno mia-Do anu mempori, a laro ngkae-Do i Ue. A ngkaru-Miumo dompentoro, morako aasa inso a mpau-Miu.

⁴ I Musa mohaweo songka Taura ndi ontae, aasa tiado bawaano i Yako.

⁵ Ondae i Ue gagi mokoledo to Yesuruni, tempono luwuno petewawado tongku mpepumpu, luwuno suku i Isaraeli mperonga-ronga.

⁶ Po'ineeomo i Rube tuwu kasi mate, sine porokono miano tedei.”

⁷ Ndiomo anu pinauno mongkona i Yehuda, ”Irongeomo, oo Ue, peboolino i Yehuda ka wawaomo a tongkuno. Ikaduduiakonomo kae-Miu ka gagi pontulungi umewaio iwalino.”

⁸ Mongkona i Lewi, ipotae, ”Po'ineeomo Tumimi ka Urimi-Miu gagi tiano mia pinehohawa-Miu, anu umariomo I'arahakono i Masa. Omiu teposangki saru onae umpeda mata uwoi Meriba.

⁹ Onae anu motae mongkona ama ka ineno, ’Nahi kuperio ira.’ Onae anu nahi behe tumo'ori ira pepaekompono ka nahi perio ira anano. Sine to Lewi mpekariao pau-Miu ka mpe'ini a mpedandia-Miu.

¹⁰ Dopaguruako ira atora-Miu ndi Yako, songka-Miu a nto Isaraeli; mponaa ira pesomba anu mana mo'ahii aro-Miu ka pesomba anu tinunu luwu i wawono meda pontunua pesomba ndi Omiu.

¹¹ Ironsoomo, oo Ue, rosono ka Ipekonaomo inanggano. Ipuroakonomo lompeno mia anu umewaio ka anu umo'aliaakono, ranta nahi dompoko mpentade.”

¹² Mongkona i Benami, ipotae, ”Pinehohawa-Do i Ue mo'ia rodo umpeda ndi Ondae! Ondae i Ue kumaduduio sompo tempo ka mo'ia a luwuno pongku witano.”

¹³ Mongkona i Yusupu ipotae, ”Po'ineeomo witano Doronsoakono i Ue uwoi tontoru anu lalu moiko inso i langi, ka tahi malua anu mo'ia i totono;

¹⁴ saru hasili anu lalu moiko inso a mata oleo, ka pinopaho anu lalu moiko inso a wula;

¹⁵ saru anu ko'aasa inso a luwuno torukuno nse'elu, anu moiko ntu'u inso a luwuno pongku wita anu nahi bali,

¹⁶ ka anu lalu moiko inso i tolino saru ihino; saru mpo'ehe-Do i Ue anu kongko a laro rui. Po'ineeomo luwuno atuu metii a wawo uluno i Yusupu, a ntoro uluno mia bininiki i olono pepaekompono.

¹⁷ Marambano kana ana sapi amba-ambano, ka tanduno kana tandu onua. Onae ta tumanduo luwuno tongku, asa wawontolino, inso i tompano hawe i tompano. Kanatuumo pulunsowuno to Eparai, ka sowuno to Manase.”

¹⁸ Mongkona to Sebulo, ipotae, ”Mawongkomo, hei Sebulo, a pelempaamu, ka omue mbo'u, hei Isakari, a nkemamu.

¹⁹ Luwuno tongku ira mempinoboi a ntorukuno; i ra'aimo dompopesombaako pesomba anu mentee. Ondae ira mpo'oso hadio ntu'u ihino tahi ka arataa anu tetano a laro one.”

²⁰ Mongkona i Gadi, ipotae, ”Unde-unde Iramo anu mokomaluao witano i Gadi. Kana singa mo'ia ka momperangkami tokia, maupo banga ulu.

²¹ Ibinikio anu ko'aasa, hangano i ra'aimo ininaa tiano tadulako, i ra'aimo dome'aiwa luwuno petewawa tongku. Iweweuo anu pinementee-Do i Ue saru pohuku-Do meronga to Isaraeli.”

²² Mongkona i Dani, ipotae, ”I Dani onaemo anano singa anu melonso meluarako inso i Basani.”

²³ Mongkona i Napatali, ipotae, ”I Napatali mowohiako po'ehe-Do ka bukeako poronso-Do i Ue; pe'ueomo rano ka wita i selata.”

²⁴ Mongkona i Asieri, ipotae, ”Rinonsoomo i Asieri i olodo luwuno ana ntama; po'ineeomo dome'ineheakono pepaekompono, ka i'emoo karuno a lana.

²⁵ Po'ineeomo inso a labu ka mala lansono tondono, rosomu asa ntinuwumu.

²⁶ Nahina kana Ondae Ue Ala, hei Yesuruni. Ondae mepole ilangi gagi pontulungimu ka luwuno seru a laro maramba-Do.

²⁷ Ondae Ue Ala anu nahi bali onaemo puu pongkaduduimu; i totomu hinao tokia anu nahina tampulaano. Dosaario iwali inso i aromu ka mepau, ’Ropuomo.’

²⁸ I Isaraeli mo'ia rodo a mata uwoino i Yako nahi umonsoio i asa wita anu hinao gandu ka anggoro; maupo langino mompo'iti tontoru.

²⁹ Manangaikomo, hei Isaraeli! Isemake anu mengkena saru omue, aasa tongku anu kinadudui-Do i Ue, kanta pontulungi ka ponai ponangimu? Iwalimu ira mpetuundu mpesile'i ndi omiu, ka omue kolumolandao pongku witado.”