Winali 32 - Wunta Mempori

Penanino i Musa

¹ ”Ta'oomo birimu, hei langi, aku mepau, rongeomo, hei tolino, pinauku.

² Po'ineeomo pompaguruku te'iti kana usa, pinauku i'iti kana tonturu, kana usa ntiri-ntiri a wawo ntumba mongura ka kana usa sumiwuio luwuno pinopaho.

³ Hangano nee-Do i Ue aku meboolio; paleleomo langkai-Do Ue Alato!

⁴ Ondaemo Torukuno Watu, sompo ntu'u inanggano kae-Do, moleo ntu'u luwuno sala-Do, Ondae Ue Ala anu metenunu, nahina makura-Do, moleo ka mentee Ira.

⁵ Mpoweweu ira mokoburu ndi Ondae, komba ana-Do mbo'u hango hinao tataado, asa ntuwua anu molengku ka mpelelengkupi.

⁶ Kanatuumoke imensuloo ndi Ondae i Ue, hei tongku anu nahi pomperorongeako, ka nahi pande mompewowolo? Komba Ondaeke Amamiu anu weweukomiu, anu mokogagi ka mokomoleo komiu?

⁷ Impewowoloomo tempo se'eluno, impekokoongakono luwuno ta'u asa ntuwua anu laloomo. Pesikenomo ndi amamu, onae ta pauo, a luwuno mia memota'umiu, ondae anu mempatotoo.

⁸ Tempono Ondae anu Tedoa Mantande, montia pusaka a luwuno tongku, tempono Doponsiao luwuno mia, Dopakosio witado luwuno tongku montonda doano luwuno anano i Isaraeli.

⁹ Sine tia-Do i Ue onaemo bawaa-Do, i Yako onaemo tia-Do pusaka anu pinakosi-Do.

¹⁰ Onae Dohaweo i pada one, i tonga-tongano wita londa ka muuno pada malua. Dolimbuo ka Dopensiroio, Dodagaio kana ihi mata-Do.

¹¹ Kana rajawali lumeluo senono, meluma-lumaa i wawono anano, wileo panino, i naao asa anano ka ibabao i wawo bungkuno,

¹² kanandiomo Ondae i Ue tumaateo bawaa-Do, ka nahina pinesombai susua merongaako ira.

¹³ Doweweuo i Ue hinao pe'ulaano lumaloo luwuno pongku, ka mongkaa hasili inso a lere. Ondae i Ue weweuo irasaio siu hoani inso a pongku watu, ka lana inso a ntorukuno watu anu motea,

¹⁴ susu sapi anu pinokobaku, ka susu inso a asa bawaa bembe bimba, saru tabano luwuno ana bimba; bimba lakino inso i Basani, ka bembe lakino, saru tonggi gandu anu moiko ntu'u; ka reano wua anggoro anu mewure kai me'inuo.

¹⁵ Ka i'amba i Yesuruni gagi mewalo ka ipetundo i bungkuno, ta mewalo, langkai kompo, ka me'ihi. Ibinta Ira Ue Ala anu mokogagio, ipe'uru-uruo Torukuno Watu tekaduduiano.

¹⁶ Dopokomosiriako Ira pinesombai susua, saru pinesombai anu mokoburu, dompokotesingkao tekuda-Do.

¹⁷ Ondae mpopesombaako pesomba a penaa mosa'o anu komba Ue Ala, a pinesombai anu nahi domento'orio, pinesombai wo'ohu anu napi tehine ipe'umbaako, anu nahi domedoitoakono uempu'umiu.

¹⁸ Torukuno Watu anu gagi amamiu nahi mperioo, ka Ondae Ue Ala anu me'anaakomu, imengkolupeo.

¹⁹ Mansa-Do kumitao, nahi Dotarima ira i Ue, tekuda hangano anano tama ka beine.

²⁰ Mepau Ira: Aku wunio rupa-Ku inso ndi ondae, ka kumitao kana'umpe pokotompaado, hangano ondae asa ntuwua anu molengku, luwuno ana anu nahi petenunu.

²¹ Dompokomosiria-Kune anu komba Ue Ala, mokontesilaa-Kune aroa-Ku hangano lahumoado. Onaemo pu'uno Aku mokomosiriako ira saru anu komba bawaa, mokontesilaako ira tekudado saru tongku anu motea aroa.

²² Hangano tekuda-Ku pinolangaomo api ka melanga hawe a mpo'iangado mia mate. Api atuu tumunuo tolino ka hasilino, mokomo'aio pu'uno luwuno torukuno.

²³ Aku humowuiako ira masolaa, mepanaakono luwuno ana mpana-Ku ndi ondae.

²⁴ Telusa ira hangano mokoninggo, memarasaiako biibi ka haki mesaki; Aku mompotola tinduno kondehora ndi ondae, ka ipono ule anu melele a pampawu.

²⁵ Ponai i bungkuno raha ka mongkokongiria a laro bolongko ta mokotampulao mangalitau maupo ana beine, nana'ote mo'uo ka mia me'uwa.

²⁶ Bakanaano Aku mepau, ’Aku mokotampula ira, siimo dompinewowolo mbo'u inso i olodo mia.’

²⁷ ”Sine, Kusala laroakono pompopodeu-deudo iwali, kasi mansa iwalido sala mpewowoloo, ka dompotae, ’Kae mami anu moroso, komba Ondae i Ue anu weweuo luwuno andio.’ ”

²⁸ Hangano ondae atuu asa tongku nahina pontimbanga; nahina ponto'orido.

²⁹ Tewala mempande ira pompewowolo, manasa ira mento'orio anu kanandio, ka mperioo tampulaado.

³⁰ Kana'umpe ntu'u asa mia molulu asa nsowu mia, ka orua mia mokompolaio hopulu nsowu mia, sangkadio Torukuno Watudo umasa ira, Ondae i Ue meweengako ira!

³¹ Hangano torukuno watudo mia atuu komba Torukuno Watuto; iwalito moiko gagi puu mpobitara!

³² Menteeano, keu anggorodo inso a ngkeu anggoro i Sodomo, ka inso a luwuno lere i Gumora. Wua anggorodo merasu, mopa'i tonggi-tonggino.

³³ Uwoi anggorodo onaemo ipono ule, ka ipono ule mo'ito anu tedoa mongkokongiri.

³⁴ ”Kombake anu andio ninaa ndi Ongkue, tetondoni a laro ponaapa arataa-Ku?

³⁵ Pontooa ka pombaloa onaemo tia-Ku, i tempono karudo namimoroso, hangano oleo masolaado rangkuomo, hapa anu domempinatindaako tamo ronga hawe.”

³⁶ Mentee ntu'u Ondae i Ue mompowee moleoa a bawaa-Do, ka mehohawa ira luwuno tetenaa-Do, tewala dokitao rosodo nami hina, ka tetenaa-Do saru mia maradeka nami hina.

³⁷ Mepau Ira i Ue, ’Isuaomoke pinesombaido atuu torukuno watu pepekaduduiado

³⁸ anu mongkaa tabano pesomba sinumbeledo, uminuo anggoro mpesomba tinawado? Po'ineeomo ka dompetade tumulungi komiu, ranta kai pohawe tekaduduia!’

³⁹ Imengkitaomo kanandio-andio, nine Ongkue, Ongkuemo Ue. Nahina Ue Ala sangkadio Ongkue. Ongkuemo anu mompepate ka mompotuwu, Ongkuemo anu mobelai ka Ongkuemo anu mokotompa, nahina anu mokompotolao inso a ngkae-Ku.

⁴⁰ Menteeno Aku tumandeo kae-Ku I langi, ka Kupepau, ”Ongkuemo anu tuwu nahina tampulaano,

⁴¹ tewala Ku'ahao ponai-Ku anu tesosangkilo, ka kae-Ku mo'ini pohukua, Aku koa mombalo tinoo a iwali-Ku ka humuku ira anu umo'aliaa-Kune.

⁴² Aku mokomolanguakono rea ana mpana-Ku ka ponai-Ku ta mongkaa bau: reado mia anu tinobo ka anu tinawa, luwuno petewawado iwali anu mpewuu ondau.”

⁴³ Impo'unde-undemo luwuno tongku hangano Dopombaloakono reado luwuno tetenaa-Do, Ondae mombalo tinoo a iwali-Do, ka moweweu pesintuwua tia wita ka bawaa-Do.”

Patuduno i Musa anu pokotompa

⁴⁴ Ka i'amba i Musa aiwa meronga saru i Yosua anano i Nuni, ka mohaweo luwuno pauno penani hieno a birido tongku atuu

⁴⁵ Mansano umari i Musa pauno atuu a luwudo to Isaraeli,

⁴⁶ ipotaeako ira, ”Impekokoongakonomo luwuno pau anu kupopoto'oriakomiu a oleo andio, kai parenta ira luwuno anamiu ka dompetenunu meweweuo luwuno pauno songka Taura andio.

⁴⁷ Hangano pau andio komba pau mooa ndi omiu, sine onaemo tumuwumiu. Mongkona pau andio komiu tuwu melai i wita anu komiu mpentorokio, umari mensakio koro Yarade.”

Umpedaomo mateano i Musa

⁴⁸ I oleo koa mbo'u atuu mepau Ira i Ue ndi Musa,

⁴⁹ ”Pewuatakomo i wawono mentorukuano Abarimi, i wawo ntorukuno Nebo, anu i wita Moabi, I asambalino kota Yeriko, ka pensiroiomo wita Kana'a anu Kuweeako ira to Isaraeli gagi tiado.

⁵⁰ Ka u'amba mate i wawo ntorukuno anu pinewuatakoimu atuu kau pinumpu saru uempu'umu, mengkena saru i Haruni, akamu mate i torukuno Hore ka pinumpu a uempu'uno.

⁵¹ Hangano orua komiu moweweu komiumo nahi petenunu ndi Ongkue i tonga-tongado to Isaraeli, umpeda mata uwoi i Meribaka i Kadesi i pada one Sini, ka nahi pelangkaio mempori-Ku i tonga-tongado to Isaraeli.

⁵² Omue moiko ukitao wita atuu tepadindi i aromu, sine nahi moiko upewinso i ra'ai, i wita anu Kuweeako ira to Isaraeli.”