Winali 31 - Wunta Mempori

Pokotompaano tinuwuno i Musa Winali 31–34 I Yosua umeuo i Musa

¹ Ka i'amba i Musa, lumako ka mohaweo luwuno pau andio a luwuno to Isaraeli.

² Ipotae ndi ondae, ”Kanandio-andio tinuwuku asa etu ka rua pulu nta'u ka nami kupokompetewawa mbo'u. Mepau Iramo mbo'u i Ue ndi ongkue, ’Koro Yarade andio nahi kosumakio.’

³ Ondae i Ue, Ue Alamu, Ira sumaki i aromu, ka rumopuo luwuno tongku atuu inso i aromu ranta kai mpokompe'ueo witado. Kanatuumo i Yosua onae ta sumaki i aromu, kana anu pinau-Do i Ue.

⁴ Ondae i Ue Ira weweuo ndi ondae kana anu wineweu-Do ndi Sihoni ka i Ogo, luwuno mokoledo to Amori, anu umariomo Doropuo atuu, ka a witado.

⁵ Ondae i Ue Ira meweengako ira ndi omiu ka omiu asalakono weweuo ndi ondae mongkona ntu'u kanaparenta anu kupohaweakomu.

⁶ Pokorosoo ka perodoo aroamu, si doito, kasi mondende ndi ondae, hangano Ondae i Ue, Ue Alamu anu melempa kumongkomi komiu. Nahi Ira mo'inee komiu ka nahi Ira binta komiu.”

⁷ Ka i'amba i Musa moboio i Yosua ka ipepauakono i arodo luwuno to Isaraeli, ”Pokorosoo ka perodoo aroamu, hangano omue komewinso meronga saru tongku andio a wita anu dinandi-Do i Ue saru sumpa ndi uempu'udo ka pineweengako ndi ondae. Omue anu ta wawa ira ranta ka dompe'ueo.

⁸ Hangano Ondae i Ue anu melempa i aromu ka Ira kumongkomiko. Nahi Ira mo'ineeko ka nahi Ira bintako. Siimo doito ka siimo salalaro.”

Pobasaa songka Taura sompo opitu nta'u

⁹ Ka i'amba i Musa burio songka Taura atuu, ka meweengakono a luwuno sando mpesomba inuleno i Lewi, anu mentandeo burua pedandia-Do i Ue, ka a luwuno mia memota'u Isaraeli.

¹⁰ I Musa parenta ira kanandio, ”A pokotampulaano ta'u ko'opitu, ia tempo anu pinakosi i larono ta'u po'oninia pasua i oleo langkai Laika Lewe Nkeu,

¹¹ tempono luwuno to Isaraeli me'aiwa mpesomba ndi Ondae i Ue, Ue Alamu, a mpo'ianga anu bininiki-Do, asalakono imebasao songka Taura andio i arodo luwuno to Isaraeli.

¹² Tena iramo tongku atuu ka dompepumpu, tama, beine ka nana'ote saru mia mehawe i kotamu, ka domerongeo, mpepaguru dumoitoako Ira i Ue, Ue Alamu, ka mpetenunu meweweuo luwuno pauno songka Taura andio.

¹³ Ka i'amba luwuno anado anu nahi domento'orio, ira merongeo ka mpepaguru dumoitoako Ira i Ue, Ue Alamu, ilarono imentuwu i wita anu komiu mpentorokio umarino imensakio koro Yarade.”

Parenta-Do i Ue umpeda mateano i Musa

¹⁴ Ka i'amba Ondae i Ue mepau ndi Musa, ”Menteeano rangkuomo tempono mateamu. Poboiomo i Yosua ka pentademo saru onae i laro Kema Tepotowoa, ka Kupoweeakono parenta.” Ka i'amba i Musa saru i Yosua lumako ka mentade i larono Kema Tepotowoa.

¹⁵ Ondae i Ue mepopokita a ngkema atuu a laro nseru-Do, ka seru-Do atuu mentade a mpewowano Kema.

¹⁶ Mepau Ira i Ue ndi Musa, ”To'oriomo, omue komohawe penaa-naa meronga saru uempu'umu. Ka i'amba tongku andio ira mpentade ka mponsosabo mpontonda pinesombai susua i wita, ba isua komiu mpewinso. Ira mebinta Aku ka nahi domentondao pedandia-Ku anu winutu-Ku saru ondae.

¹⁷ I tempo atuu tekuda-Ku ta tensila ndi ondae. Aku binta ira ka wunio rupa-Ku inso ndi ondae, ranta ka domempingko ka i alu ira hadio masolaa saru masusaa. I tempo atuu ira mpotae, ’Kombake masolaa atuu umalu kita, hangano Ondae i Ue, Ue Alato nahi Dokongko i oloto?’

¹⁸ Sine Aku wunio ntu'u rupa-Ku i tempo atuu, hanganoluwuno mosa'o anu domeweweuomo ka dompewolili a mpinesombai susua.

¹⁹ Kanandio-andio, buriomo penani andio ka paguruako ira to Isaraeli. Naao a laro ngangado kai penani andio gagi sakosii-Ku a nto Isaraeli.

²⁰ Hangano Aku wawa ira i wita anu hadio ntu'u susu ka siu hoanino, wita anu Kudandio sura sumpa ndi ondae uempu'udo. Ira mpongkaa ka mowohi saru gagi mewalo, sine ira mpepokule a mpinesombai susua ka mpesomba ndi onae. Ira mpepaukia-Kune ka mehapuo pedandia-Ku.

²¹ Tewala i alu ira hadio masolaa saru masusaa, asalakono penani andio ta gagi sakosii ndi ondae, hangano penani andio ta metako mpiha a wiwino inuledo. Menteeano Kuto'orio tinoodo oleo andio, se'elubi napi Kuwawa ira i wita anu Kudandiao sumpa ndi ondae.”

²² A oleo mbo'u atuu i Musa burio penani andio ka paguruako ira to Isaraeli.

²³ Ndi Yosua, anano i Nuni Ondae i Ue moweeakono parenta, pau-Do, ”Pokorosoo ka perodoo aroamu, hangano kowawa ira to Isaraeli a wita anu Kudandiakono sumpa ndi ondae, ka Aku kumongkomiko.”

²⁴ Umarino i Musa burio luwuno pauno songka Taura atuu a laro asa wunta ranta kai umari,

²⁵ i Musa parenta ira to Lewi puu mpontande Burua Pedandia-Do i Ue, kanandio,

²⁶ ”Ime'alaomo wunta Taura andio ka imenaao i horino Burua Pedandia-Do i Ue, Ue Alamiu, kai gagi sakosii i tu'ai ndi omiu.

²⁷ Hangano kuto'orio motea aroamu ka mpe'ulu watumu. Sekonopo kanandio-andio, da tuwu aku saru omiu, memotea aroa komiumo ndi Ondae i Ue, tamoako te'ingka tewala mate akumo!

²⁸ Tena iramo luwuno mia memota'u a nsukumu, ka luwuno mia mpo'anggamu mpepumpu ndi ongkue. Aku pauo mongkona anu kanandio ndi ondae saru moboio langi ka tolino gagi sakosii ndi ondae.

²⁹ Hangano kuto'orio, tewala mate akumo, komiu mpoweweu tedoa mokoburu ka mepansia inso a nsala anu kutenaakomiu. I lembuino masolaa ta umalukomiu, tewala mpoweweu komiu anu mosa'o a pongkita-Do i Ue, ka mpokotesingkao tekuda-Do hangano wineweuno kaemiu.”

³⁰ Ka i'amba i Musa mohaweo luwuno pauno penani andio a birido luwuno bawaa Isaraeli ranta ka i'umari.