Winali 30 - Wunta Mempori

Pinomule umarino tepidia

¹ Tewala luwuno ronso ka totonaa anu kupopo'aroakomu hawe ndi omue, ka imento'orio i laro aroamu i tonga-tongano luwuno tongku, ba isua Dosaarikomiu i Ue, Ue Alamiu,

² ba mpepokule komiu mbo'u ndi ondae i Ue, Ue Alamu, ka imperorongeakono pua-Do menunu saru luwuno anu kuparentaakomu oleo andio, moiko omiu maupo luwuno anamu a tompaano aroamu ka tompaano tinuwumu,

³ onaemo Ondae i Ue, Ue Alamu, Ira mokomoikoo tumuwumu ka mehohawako. Ira wali pumpu komiu inso a luwuno tongku ba isua Dopeweengakomiumo i Ue, Ue Alamiu.

⁴ Maupo luwuno mia anu tesaari ndi omiu kongko i tompano langi, inso i ra'ai mbo'u Ira pumpu komiu i Ue, Ue Alamiu ka wali umalakomiu.

⁵ Ondae i Ue, Ue Alamu Ira wawakomiu mpewinso i wita anu pine'uedo uempu'umu ka komiu mpe'ueo mbo'u. Ira moweweu moiko ndi omue ka weweu komiu mehadio lumaloi ira uempu'umu.

⁶ Ondae i Ue, Ue Alamu Ira balio aroamu ka aroado inulemu, ranta kai mpehohawa Ira i Ue, Ue Alamu tompaano aroamu ka tompaano tinuwumu, kai mentuwu.

⁷ Ondae i Ue, Ue Alamu, Ira motiio sumpa atuu a iwalimu ka anu umo'aliaakomu anu lumulu komiu.

⁸ Komiu wali mperorongeakono pau-Do i Ue ka meweweuo luwuno parenta-Do anu kupauakomu oleo andio.

⁹ Ondae i Ue, Ue Alamu Ira mokohadioo moikoa a luwuno inanggano kaemu, wua mpe'anakaamu, hasilino pinotuwumu, ka hasilino witamu. Hangano Ondae i Ue, Ira wali mawongko hangano omiu a laro manangaiamu kana mawongkodo uempu'umu ndi'ipua,

¹⁰ tewala imperorongeako Ira i Ue, Ue Alamu saru mpe'ini a parenta ka pompakosi-Do anu teburi a wunta Taura andio, ka tewala mpepokule komiu ndi Ondae i Ue, Ue Alamu tompaano aroamu ka tompaano tinuwumu.

Tuwua ke matea

¹¹ Menteeano parenta anu kupohaweakomu ia oleo andio, nahi upemotungkoo lahi, ka nahi olai lahi.

¹² Komba i langi po'iangano, ka impotae, ”Isemake anu ta mewuatako i langi lumako umalaakita, ka moporongea kita ka tomeweweuo?”

¹³ Komba mbo'u i asatowano tahi po'iangaano, ranta ka impotae, ”Isemake anu ta sumakio tahi lumako umalaakita ka moporongeakita ka tomeweweuo?”

¹⁴ Sine pau andio umpeda ntu'u ndi omue, ilaro ngangamu ka ilaro aroamu kau weweuo

¹⁵ Kitaomo, aku mopo'aroaakomu ia oleo andio, tuwua ka manangaia, matea ka masolaa.

¹⁶ Hangano ia oleo andio kuparentaakomu ka upehohawa Ira i Ue, Ue Alamu, saru tuwu montonda sala-Do ka pe'ini a parenta, pompakosi ka atora-Do. Kanatuumo komiu mentuwu tetiangi hadio ka Doronsokomiu i Ue, Ue Alamu i wita ba isua impewinso mpetorokio.

¹⁷ Sine, tewala aroamu mepokule ka nahi mporonge, tendeano komiu mepinokontesaa ka impenggolontu mpelangkaio pinesombai susua, ka mpesomba ndi onae,

¹⁸ ka kupauakomu nine oleo andio manasa komiu memasola. Nahi ta melai tinuwumiu i wita anu komiu mpentorokio umarino imensakio koro Yarade.

¹⁹ Aku moboio langi ka tolino gagi sakosii ndi omiu oleo andio: Kupo'aroakomu tuwua ka matea, ronso ka totonaa. Binikiomo tuwua, ka imentuwumoiko omiu maupo inulemu,

²⁰ pehohawa Ira i Ue, Ue Alamu, rongeo pau-Do ka tumonda Ira. Hangano Ondaemo tinuwumu ka anu weweuakomiu mpo'ia tehine i wita anu dinandi-Do i Ue saru sumpa ndi Burahima, i Saki ka i Yako uempu'umu anu wineeako ndi ondae.