Winali 3 - Wunta Mempori

Peteaa umewaio i Ogo, mokole i Basani

¹ Ka to'amba mpelengkuako melako te'aro i Basani. I Ogo, mokole i Basani saru luwuno sorodaduno, me'aiwa rumangkuhi kita ira mpetea i Ederei.

² Sine mepau Ira i Ue ndi ongkue, ”Si doitoakono, hangano Aku meweengakono a ngkaemu, saru luwuno sorodaduno ka witano. Weweuomo kana anu wineweumu ndi Sihono, mokoledo to Amori, anu mo'ia i Hesiboni.”

³ Ka Do'amba i Ue, Ue Alato meweengakono mbo'u i Ogo, mokole i Basani, saru luwuno sorodaduno a ngkaeto. Tomenangio, ranta nahina maupo te'asa mia tola.

⁴ I tempo atuu, tompoko'alao luwuno kotano. Nahina kota anu nahi tomerontuo inso ndi ondae: nomopulu kota, luwuno pinebawaino i Arigo, poparentaano i Ogo i Basani.

⁵ Luwuno atuu kota hinao benteno, saru rere watu anu memantande, pewowa langkai ka luwuno lansono. Umarino atuu, hadio ntu'u kota anu nahi pebente.

⁶ Tomeropu ira luwuno palilino, kana anu wineweuto ndi Sihoni, mokole i Hesiboni, saru rumopu ira palili sompo kota: tama, beine ka nana'ote.

⁷ Sine luwuno pinotuwu ka pinomuru inso a luwuno kota atuu tomerontuo tiato ontaeto.

⁸ Gagi, i tempo atuu tomerontuo inso a ngkaedo orua mokoledo to Amori atuu wita anu i asatowano Koro Yarade, mompu'u inso a Ngkoro Aranoni hawe a ntorukuno Heremoni.

⁹ Kanandiomo to Sidoni mempauo Heremoni atuu Sirioni; to Amori mempauo Seniri.

¹⁰ Tomerontuo luwuno kota i wita mantandeano, luwuno Gileadi ka luwuno Basani hawe i Salika ka Ederei, luwuno kota poparentaano i Ogo i Basani.

¹¹ Butu i Ogo, mokole i Basani anu da tuwu inso i olono toreado to Repaimi. Sekono dasa poturiano, dasa labu. Kombake da kongko i kota Raba inuleno i Amoni? Osio hiku ondauno ka opaa hiku maluano, montonda posongka anu biasa.

Petiaa wita i sabaano oleo Yarade

¹² Kanandiomo wita atuu tompentorokiomo i tempo atuu. Kuweeako ira to Rube ka to Gadi wita inso i Aro'eri i wiwi Ngkoro Aranoni saru entongano mentorukuno Gileadi saru luwuno kotano.

¹³ Wita Gileadi toreano saru luwuno Basani, poparentaano i Ogo, luwuno atuu pinebawaino i Arigo, anu entonga kuweeako ira suku Manase. Luwuno Basani andio pinau witado to Repaimi.

¹⁴ I Yaeri, anano i Manase, umalao luwuno pinebawaino i Arigo hawe tida witado to Gesuri ka to Ma'aka. Wita atuu, Basani, nineeako montonda neeno koroino ”Hawoti-Yaeri”, hawe oleo andio.

¹⁵ Ndi Makiri kuweeakono Gileadi.

¹⁶ A nto Rube ka to Gadi kuweeako ira wita inso i Gileadi hawe Korono Mo'are Aranoni, saru a ntongano korono mo'are atuu gagi petidaa, ka hawe Korono Mo'are Yabo, tida witado inuleno i Amoni.

¹⁷ Araba-Yarade ka Koro Yarade mbo'u gagi petidaa, mompu'u inso i Kinereti hawe a Ntahi Araba, Tahi Me'ohia atuu, a mpuu Torukuno Pisigaa te'aro i sabaano oleo.

¹⁸ I tempo atuu kuparentaa komiu, kanandio, ”Ondae i Ue, Ue Alamiu Doweeakomiu wita andio ka impe'ueo. Sine omiu luwuno mia moroso ka mosia, asalakono impesakiako saru sangka peteamiu i arodo pepaekompomiu, to Isaraeli.

¹⁹ Butu anamiu ka kombiamiu ka pinotuwumiu, anu kuto'orio hadio ndi omiu, moiko dompo'ia a luwuno kota anu kuweeakomiu,

²⁰ ranta ka Dopoweeako ira i Ue rodoa ndi ondae pepaekompomiu, kana ndi omiu. Ondae mbo'u mpope'ue wita anu Doweeako ira i Ue, Ue Alamiu ndi ondae i asatowano Koro Yarade. Umarino atuu moikoomo impekule, singge mia lumako a wita pine'ueno anu kuweeakomiumo.”

²¹ Ndi Yosua kuparentao i tempo atuu, kanandio, ”Ukitaakonomo matamu luwuno anu wineweu-Do i Ue, Ue Alamu, ndi orua mokole atuu. Kanandiomo anu ta wineweu-Do i Ue a luwuno poparentaa, ba isua ulako.

²² Si doitoako ira, hangano Ondae i Ue, Ue Alamu, Ondaemo anu umeu komiu metea.”

I Musa nahi ineheako mewinsokio wita Kana'a

²³ I tempono atuu mo'ema aku pompehohawa-Do i Ue, kanandio,

²⁴ ”Oo, Ue Ala, Mompu'uomo Ipopokitaakono tetenaa-Miu andio langkaino pabawa-Miu ka kae-Miu anu moroso. Hangano, ue ala isemake i langi ka i tolino, anu polio moweweu wineweu mongkokongiri kana Omiu?

²⁵ Ipo'inee akumo mesakiako ka kumitao wita anu moiko anu i asatowano Koro Yarade, wita mentorukuno anu moiko atuu, ka Libano.”

²⁶ Sine, Ondae i Ue tekuda Ira ndi ongkue hangano omiu ka nahi mperorongeakono po'emaku. Mepau Ira i Ue ndi ongkue, ”Sompoomo! Siimo mbo'u pauo mongkona atuu saru Ongkue.

²⁷ Pewuatakomo a punsuno Torukuno Pisiga ka pengkitamo i sumooano oleo, i utara, i selata ka i sabaano oleo. Kitaomo temoiko, hangano nahi kosumakio Koro Yarade andio.

²⁸ Weeakonomo parenta ndi Yosua saru pokorosoo ka pokomoleoo aroano, hangano onaemo anu ta mesakiako i arodo tongku andio ka onaemo anu ta wawa ira ranta ka dompe'ueo wita anu ta kinitamu atuu.”

²⁹ Kanatuumo tompo'ia i lembono i asatowano Beti-Peori.