Winali 29 - Wunta Mempori

Pedandia saru Ondae Ue Ala pinokowo'ohu

¹ Ndiomo pauno pedandia anu winutuno i Musa saru to Isaraeli i wita Moabi montonda saru parenta-Do i Ue, mokosompoo pedandia anu winutu-Do saru ondae i Torukuno Hore.

² I Musa moboi ira luwuno to Isaraeli, ka i'amba motae ndi ondae kana itotono andio. Imengkitaomo luwuno anu wineweu-Do i Ue i wita Masiri i arono matamiu ndi Pirao, luwuno pegawaino ka luwuno witano.

³ Imengkitaakonomo matamiu isa'a luwuno po'ara-arahako anu langkai, luwuno petondoni ka luwuno anu mengkinohali-haliako anu langkai atuu.

⁴ Sine, hawe kanandio-andio nahi Dopoweeakomiu i Ue pompewowolo molino kai mento'orio ke mata kai pongkita ke biri kai poronge.

⁵ Mepau Ira, ”Ilarono pato pulu nta'u Kuwawa komiu mpelempa lumaloo pada one. Sangkamiu nahi unsa a ngkoroimiu, ka sandalamiu nahi masola a ngkarumiu.

⁶ Nahi mpongkaa roti, anggoro ke inua anu mompokomolangu sikoa me'inuo, kai mento'orio nine Ongkuemo Ue, Ue Alamiu.”

⁷ Mansano mehawe komiumo i ndi'ai, i Sihoni, mokole i Hesiboni, ka i Ogo mokole i Basani, meluarako tumowoki kita ka tompetea, sine tomenangi ira.

⁸ Tompoko'alao witado ka meweengakono a nto Rube, a nto Gadi, ka a nsuku Manase anu entongano atuu, gagi tia pusakado.

⁹ Onae atuu kai mpe'inimo a mpauno pedandia andio, kai meme'ura a luwuno anu wineweumiu.

¹⁰ Oleo andio mpentade komiu i aro-Do i Ue, Ue Alamiu: luwuno petewawa sukumiu, ka mia memota'umiu, luwuno anu mpo'angga ka luwuno tama to Isaraeli,

¹¹ luwuno anamiu, luwuno beinemiu ka luwuno mia hawe a mpekemaamiu, maupo luwuno puu mpobansi keu ka luwuno puu mpotambu uwoi i olomiu.

¹² Impentade kai mpewinso i larono pedandia-Do i Ue, Ue Alamiu, sumpa dandi-Do, anu winutu-Do i Ue, Ue Alamiu, saru omiu oleo andio.

¹³ Kanandiomo Dotandekomiu gagi bawaa-Do a oleo andio ka Ondae gagi Ue Alamiu, kana anu pinau-Do ndi omiu ka anu Dodandiako saru sumpa ndi Burahima, i Saki ka i Yako, uempu'umiu.

¹⁴ Komba butu saru omiu Ondae i Ue mowutu pedandia ka sumpa pedandia andio,

¹⁵ sine saru sompo mia anu ndio i ndi'ai a oleo andio meronga saru ontae, anu mpentade i aro-Do i Ue, Ue Alato, saru mbo'u sompo mia anu nahi kongko i ndi'ai a oleo andio meronga saru ontae.

¹⁶ Hangano omiu andio mento'orio, kana'umpe tompo'ia i wita Masiri ka kana'umpe tompelempa inso i tonga-tongano luwuno tongku anu witano imelaloo.

¹⁷ Imengkitaomo pinesombai anu mokoburu ka lahumoado, inso a ngkeu ka watu, wulaa ka salaka, anu hina ndi ondae.

¹⁸ Onaemo pu'uno si hina i olomiu tama ke beine, pe'etu ke suku, anu a oleo andio aroano mewolili binta Ira i Ue, Ue Alato, kai lako mesomba a mpinesombaido luwuno tongku atuu. Si hina i olomiu haka moluarako rasu ke mopa'i.

¹⁹ Sine tewala asa mia i tempono rumongeo pau sumpa andio, irekeo koroino kongko rinonso, ka ipotae: ”Aku koa tekadudui, maupo kupe'ulu watu.” Ranta kai tampula, moiko wita anu me'uwoi maupo anu motu'i.

²⁰ Ondae i Ue nahi Ira umampunio mia atuu. Tekuda ka monsiri-Do i Ue ta tensila ndi onae i tempo atuu. Luwuno sumpa anu teburi a wunta songka andio ta umaluo, ka Ira umoninio i Ue neeno inso i totono langi.

²¹ Ondae i Ue, Ira monsiao mia atuu inso a luwuno suku Isaraeli ka ipohawe masolaa, menunu saruluwuno sumpa pedandia anu teburia laro wunta songka Taura andio.

²² Inule anu lembuiano, luwuno anamiu anu mehina umarino omiu, ka mia hawe anu me'aiwa inso i wita olai, ira mengkitao pohuku ka haki anu pinotii-Do i Ue i wita atuu.

²³ Luwuno witano mo'aiako belera ka ohia, anu nahi rinawo, nahina hapa anu tuwu, ka nahina maupo pinopaho hapa anu me'umbaako inso ndi onae, kana i tempono Dowowangunsuleo Sodomo ka Gumora, Adema ka Seboimi, a laro ntekuda ka mokulano aroa-Do.

²⁴ Ondae ka luwuno tongku ira mpotae, ”Hapake pu'uno ka Doweweuo i Ue kanandio wita andio? Hapake pengkonaano tekuda anu tensila ntu'u andio?”

²⁵ Ira mesangki mia, ”Hangano ondae atuu nahi domentondao pedandia-Do i Ue, Ue Alano uempu'udo, pedandia anu winutu-Do saru ondae tempono Dowawa ira mpeluarako inso i wita Masiri.

²⁶ Melako ira mbo'u mpesomba a pinesombai susua ka mpenggolontu mpesomba ndi onae, pinesombai susua anu nahi domento'orio ka anu nahi domewineeako.

²⁷ Onaemo pu'uno kai haweako tekuda-Do i Ue a wita andio, ranta kai pinotii i wawono luwuno pontotonaa anu teburi a wunta andio.

²⁸ Dobuta iramo i Ue inso i witado a laro ntekuda ka mokulano aroa ka o'alia-Do ntu'u, ka Do'amba metadiako ira i wita susua, kana anu gagi kanandio-andio.

²⁹ Mongkona anu tewuni onaemo tia-Do i Ue, Ue Alato, sine mongkona anu pinokomengkaa onaemo tiato ka inuleto hawe nahina tampulaano, ka tomeweweuo luwuno pauno songka Taura andio.”