Winali 27 - Wunta Mempori

Watu pepopoto'ori ka meda pontunua pesomba i Torukuno Ebali

¹ I Musa ka luwuno mia memota'u Isaraeli parenta ira mbo'u tongku atuu, ”Impe'inimo a luwuno parenta anu kupohaweakomiu oleo andio.

² A oleo imensakio Koro Yarade melako a wita anu Doweeakomiu i Ue, Ue Alamiu, omiu asalakono mpontade ira watu melolangkai, ka imengkapuruo.

³ Ka i'amba a watu atuu asalakono imeburio luwuno pauno songka Taura andio, umarimiu mensaki komiu mpewinso a wita anu Doweeakomiu i Ue, Ue Alamiu, asa wita anu hadio ntu'u susu ka siu hoanino, kana anu Dodandiakomiu i Ue, Ue Alado uempu'umiu.

⁴ Umarimiu mensakio Koro Yarade, asalakono luwuno watu atuu impontadeo i torukuno Ebali ka imengkapuruo, kana anu kuparentaakomu oleo andio.

⁵ I ra'ai asalakono imewanguo meda pontunua pesomba ndi Ondae i Ue, Ue Alamiu, asa pontunua pesomba inso a watu anu nahi pina'oako parewa labu.

⁶ Asalakono inso a watu anu nahi pina'o imewanguo meda pontunua pesomba ndi Ondae i Ue, Ue Alamiu, ka i wawono asalakono impesombaakono pesomba tinunu ndi Ondae i Ue, Ue Alamiu.

⁷ Impesombaakono mbo'u pesomba tekaduduia, ka i'amba mengkaano i ra'ai ka memawongko i aro-Do i Ue, Ue Alamiu.

⁸ Umarino atuu, asalakono imeburio a luwuno watu atuu luwuno pauno songka Taura andio temengkaa ntu'u.”

⁹ Ka i'amba i Musa ka luwuno sando mpesomba to Lewi mepau a luwuno to Isaraeli, kanandio, ”Impomperodo ka imerongeomo hei to Isaraeli. Ia oleo andio megagi komiumo bawaa-Do i Ue, Ue Alamiu.

¹⁰ Onaemo pu'uno, asalakono imperorongeakono pau-Do i Ue, Ue Alamiu, ka meweweuo parenta ka pompakosi-Do, anu kupohaweakomiu a oleo andio.”

Hopulu ka orua pau pontotonaa

¹¹ A oleo atuu i Musa moweeako ira parenta tongku atuu,

¹² ”Umarimiu mensakio Koro Yarade, onaemo suku Simeo, Lewi, Yehuda, Isakari, Yusupu, ka Benami asalakono mpentade i Torukuno Gerisimi ka doronso ira tongku atuu.

¹³ Sekono suku Rube, Gadi, Asere, Sebulo, Dani saru Napatali asalakono mpentade i Torukuno Ebali ka dototonaa ira.

¹⁴ Ka i'amba luwuno to Lewi ira mpepau meroku ka mpotaeako ira luwuno to Isaraeli,

¹⁵ ’Tetotonaaomo mia anu moweweu tinaha pina'o ke tinaha tinawa, aasa mokoburu-Do i Ue, wineweuno kaeno asa mia puu mpo'angga, ka montadeo mewuni-wuni.’ Luwuno tongku atuu, asalakono mpotae, ’Ami!’

¹⁶ ’Tetotonaaomo mia anu me'uru-uruo ineno ka amano.’ Luwuno tongku atuu, asalakono mpotae, ’Ami!’

¹⁷ ’Tetotonaaomo mia anu mompahe tida wita a mpe'asa miano.’ Luwuno tongku atuu, asalakono mpotae, ’Ami!’

¹⁸ ’Tetotonaaomo mia anu mowawa asa mia morawu a nsala anu nahi mentee.’ Luwuno tongku atuu asalakono mpotae, ’Ami!’

¹⁹ ’Tetotonaaomo mia anu morontu tiano mia hawe, nana'ote nahina amano, ka tuwu beine.’ Luwuno tongku atuu asalakono mpotae, ’Ami!’

²⁰ ’Tetotonaaomo mia anu mewowaliakono kombiano amano, hangano isungkeaomo tapu hawuno amano.’ Luwuno tongku atuu asalakono mpotae, ’Ami!’

²¹ ’Tetotonaaomo mia anu mewowaliakono pinotuwu hapamo koa.’ Luwuno tongku atuu asalakono mpotae, ’Ami!’

²² ’Tetotonaaomo mia anu mewowaliakono pepaekompono beine, anano amano ke anano ineno.’ Luwuno tongku atuu asalakono mpotae, ’Ami!’

²³ ’Tetotonaaomo mia anu mewowaliakono ponino beine.’ Luwuno tongku atuu asalakono mpotae, ’Ami!’

²⁴ ’Tetotonaaomo mia anu mewuni-wuni mompepate pe'asa miano.’ Luwuno tungku atuu asalakono mpotae, ’Ami!’

²⁵ ’Tetotonaaomo mia anu montarima pompowee nahi moleo ta mompepate mia anu nahina salano.’ Luwuno tongku atuu asalakono mpotae, ’Ami!’

²⁶ ’Tetotonaaomo mia anu nahi rongeo pauno songka Taura andio ka weweuo.’ Luwuno tongku atuu asalakono mpotae, ’Ami!’ ”